Mhe aơ, ji măt gŭr ta n’gor Dak Lak geh nău tât jêr năl lor đah rnoh ntưp rêng ngăch. Rnoh nuĭh geh ji măt gŭr lơn âk lah kon se nti ƀư pah kan njrăng n’gang mâp âk jêr jŏt rnôk ăp kon se mhe lăp năm nti mhe.

Dôl gŭ kâp ƀư siƀŭt but săm ta Nhih dak si Măt n’gor Dak Lak, oh Tôn Nữ Yến Nhi, nti jrô 11, nhih nti Phổ thông trung học Ea H’Leo, nkuâl Ea H’Leo an gĭt, tâm jrô nti geh âk băl ji măt gŭr n’hanh dăn rlu nti, săk gâp nơm hŏ ji 3 nar aơ đŏng, hŏ rvăt dak si sĭt ntruh măt yơn mô bah jêng hăn tât nhih dak si:

“Saơ rnôk kah bĭch 2 ding măt păng tâm krêp nsum, dŭt ji. Nar aơ gâp hăn tât but săm ri bác sĩ đă gâp ntruh bar pe ntruh dak si bar pe nar mbra bah oi n’hanh an dŏng êng ndơ mô dŏng nsum đah nuĭh tâm rnăk”

Đah rlău 800 nuĭh dôl tĭng nti,  lôch rnôk lễ khai giảng, nhih nti Tiểu học Lý Tự Trọng, nkual ƀon têh Buôn Ma Thuột hŏ năl geh 156 kon se rlu nti yor nău ji măt gŭr. Êng ntơm bah nar 11/9 tât aƀaơ nhih nti năl geh 139 kon se ji măt gŭr n’hanh du n’gul tâm rnoh nê hôm hăn nti  kơt ơm đŏng. Nai ntĭm Lương Thị Bích Nguyên, hiệu trưởng nhih nti an gĭt, âk kon se nti geh ji măt gŭr yơn nha hôm hăn nti đŏng jêng rnoh ntưp rêng ngăch lơn. Nhih nti hŏ rđău đă mpôl kan dak si nchrăp dak boh sinh lý gay ntruh ngăch an ăp kon se nti; n’hao dăng mât kloh uĕh nhih nti jrô nti lôch ăp mông nti; nkre nkah njrăng ăp me bơ̆, kon se nti geh nău ji măt gŭr ân săm bah ta jay gay der bah tâm ntưp rêng chong cheng.  

“Geh du đêt me bơ̆ yor nău rêh jêr jŏt ân hăn pah kan ngai mô dơi an kon gŭ êng ta jay jêng khân păng ân njŭn kon hăn tât nhih nti, jêng nău ntưp rêng tâm nhih nti mô dơi der bah bol mpôl hên hŏ geh ăp trong njrăng đă ăp kon se dok bil măt gay mât njrăng măt, đă jut rao kloh uĕh nhih nti, mât kloh uĕh săk jăn n’hanh ntĭm nti  ăp kon se mhâm ƀư rpuh muh măt an geh nău tam”.

Nhih nti Mầm non Hoa Lan, phường Tân Tiến, nkual ƀon têh Buôn Ma Thuột geh 2 phân hiệu, đah nklăp 200 kon se dôl tĭng nti ta 10 jrô. Bah năp nê nklăp 1 khay, nhih nti năl geh du đêt nuĭh ntưp ji măt gŭr dơm, yơn lah bar pe nar rlơ̆ aơ nô nău kon se geh ji măt gŭr geh mpơl hao ntưp âk, đah 20 kon se ji măt gŭr. Nai ntĭm Lê Thị Liên, hiệu trưởng Nhih nti mầm non Hoa Lan an gĭt, aƀaơ nhih nti dôl ntrôl dăng pah kan nkoch trêng n’hanh ntĭm nti nai ntĭm, kon se nti tĭng jăp ăp trong njrăng n’gang tĭng nău nkah njrăng lor bah n’gâng kan dak si:

“Pah kan mât kloh uĕh tâm nhih nti ân ndơ̆ lor bôk năp. Bôk năp ndơ dŏng mât kloh uĕh săk jăn ri kon se ân dŏng êng; tâl bar đŏng lah ăp ndơ dŏng tâm jrô nti ri nai ntĭm ân jut rao kloh uĕh; tâl 3 đŏng lah ăp kon se rao ti di rêng. Rnôk saơ ăp kon se geh ji măt gŭr ri nhih nti an gŭ êng mô an kon se nê gŭ rgum đŏng ôh. Rnôk ăp kon se geh ji măt  gŭr ri geh nău kan nsum đah ăp ntŭk kan dak si n’hanh me bơ̆ gay săm uĕh an ăp mon său.”

Tĭng bác sỹ Lê Dương Thùy Linh, Groi giám đốc Nhih dak si Măt Dak Lak, nău ji măt gŭr nê ta Dak Lak ntoh nchah nchrai ntơm bah khay 8. Yơn lah nklăp 2 pơh aơ, rnoh nuĭh ji  hao âk ndal. Aƀaơ rĭng 1 nar, Nhih dak si dơn but săm an ntơm bah 200 -300 nuĭh, lơn âk lah kon se nti. Bác sĩ Linh an gĭt, nău ji măt gŭr way ntưp rêng ma trong dak diu, ăp mbrek dak măt, muh bah  nuĭh ji mô lah ndơ dŏng êng, ndơ pâl, bok ka seng geh ntưp tơm nuĭh ji, dak geh ntưp kaman, lơn lah ăp dak ta n’glău re…

“Rơh nuh srê bah năm aơ dŭt hô, rlău ma khuch tât kon măt ri kaman năm aơ păng geh nău  mpơl lăp tât lao măt n’hanh rnôk khuch păng lăp tâm rsang măt n’hanh păng mbra lơh jêng ngo plâm măt, du đêt nuĭh ji hăn rvăt êng dak si ntruh măt mbra ƀư jêng lơn ma ji jru n’hanh rhoch ntô măt. Nkre ntưp kaman rơh nuh srê dja ri nuĭh ji mbra jêng srim kop, mbra ƀư jêng môr trong n’hôr n’hâm bah lơ, mbra geh nău mpơl tâm rkhul lêk ndơ sa. Aƀaơ mô hŏ geh vaccine gay  njrăng n’gang n’hanh mô geh dak si ntrŭh gay njrăng n’gang yor kơt nê nuĭh ƀon lan mô dơi rvăt êng dak si gay njrăng n’gang n’hanh rnôk ji ân hăn tât ntŭk kan dak si nhãn khoa gay dơi but săm n’hanh nchroh săm ji”.

Tĭng ăp bác sĩ, nău ji măt gŭr lah nău ji nđik n’hanh mbra dơi bah êng ntơm bah 1 tât 2 pơh; nkhêp geh ji jru  mbra ntoch jong tât 1 khay. Yơn lah, lah dơi săm ơm n’hanh di trong ri nău ji mbra ngăch bah n’hanh mô ir jêng geh tât nău ji jru./.