22 năm aơ, geh du hê bác sỹ, aƀaơ hŏ rlău 80 năm deh dôl nar nar trêng nti tay tĭng rplay siƀŭt, tĭng mbâr sa, mât chăm n'hâm suan an kon se quet nte mpeh nău gĭt blău. Nê lah wa Đỗ Thuý Nga, Giám đốc Trung Tâm Hy Vọng, nuĭh geh săk ntơ lư bu ur Thủ đô ntoh lư năm 2022, nuĭh bác sỹ hŏ krêp dêh, ndrel hăn đah bơi 400 kon se quet nte tâm ăp năm rlău aơ.

        Âk năm rlău aơ, kon se nti bah Trung tâm Hy vọng gŭ ta mbrô 82/198, ngõ 290 Kim Mã Ba Đình, Hà Nội hŏ way bên đah bác sỹ Đỗ Thúy Nga hăn tât mpông trung tâm tâm rnôk 8h ôi nar ngoăy, nar puăn, nar prăm ăp pơh gay ntơm nău kan ntĭm nti an kon se quet nte. Trung tâm Hy vọng pơk mpông bah 7h30 ăp ôi aƀaơ geh 53 kon se nti ntơm bah 36 khay tât 16 năm deh geh nău ji đit prêng êng. Geh 12 nai ntĭm râng ntĭm nti ta 4 jrô nti ndrel geh nău kơl bah ăp băl sinh viên thực tập n'hanh nuĭh hăn kơl êng dak bah dih.

          Wa Đỗ Thuý Nga lah rơh bác sỹ lor bôk năp sĭt pah kan ta nhih dak si nkuâl Thạch Thất ƀư Chủ nhiệm khoa Nhi lôch nê sĭt pah kan mpeh Uỷ ban mât chăm me bŭn ntreo, Jrô kan ntĭm nti quận Ba Đình. Năm 1998, rnôk sĭt rlu ranh păng n'hanh rnăk wâl hŏ geh du nău n'glêh an mbrôn suan gay pơk du trung tâm hy vọng:

        "Rơh hôm gŭ kan ta nhih dak si ri geh dŭt âk kon se ji môr ndâr rngok Nhật Bản an tay jêng nău ji jru an rngok lah ăp kon se mô gĭt blău, tâm ban kơt ăp kon se êng ƀa ƀă. He saơ săk nơm mô hŏ ƀư dơn lĕ nău kan bah nuĭh nai dak si, yor kơt nê̆ dĭng gâp rvê lah tât rnôk sĭt rlu ranh he mbra pơk jrô nti an êng ma kon se quet nte dja, ndrĭ lah kon bu ur an gâp manh neh dja ƀư ma tơm prăk tăch jay ta Thành Công gay rdak njêng ƀư trung tâm dja.

          Năm 2002, Trung tâm Hy Vọng dơi njêng, wa Đỗ Thuý Nga nchih tĭng nău lư ta báo gay sơch lăp kon se nti n'hanh nai ntĭm lôch nê n'glăp dŏng bah trung tâm nar lơn ma têh hvi. Mô dơn ntĭm nti siƀŭt, trung tâm lah ntŭk pêt mât bĭch sa ăp nar an ăp kon se nti đŏng.

          Đah 53 kon se quet nte dôl tĭng nti lĕ ma nar đah rnoh prăk nti ntơm bah 2,5 tât 5 rkeh prăk du hê kon se. Bác sỹ Đỗ Thuý Nga nchih: Đah rnoh sŏk kơt nê trung tâm ân tâm rlak sŏk dŏng tâm di n'hanh dơn ăp tơm ndơ kơl gay mât nău kan: 

       "Nău gâp dŭt rvê lah ŭch n'hao prăk khay bah nai ntĭm, công nhân viên, ndrĭ yơn lah n'hao prăk khay ri jêng sŏk prăk nti hao. Ma sŏk prăk nti hao ri dŭt âk rnăk bu jêr jŏt, dơn geh trong mbơh kloh prăk kaih dơm, he mô ndjôt prăk, he jao lĕ an cán bộ nai ntĭm rvê lĕ ăp nău kan nê, gay tât kêng dŭt khay dơi sŏk dŏng ndơ̆ prăk khay, ntĭt lah hŏ trok ăp hôm ri moh khay i hôm rmeh du đêt uănh me bơ̆ kon se i jêr jŏt n'hŭch du đêt an bu.

          Lôch 22 năm njêng tât aƀaơ, trung tâm hy vọng hŏ ntĭm n'hanh kơl an bơi 400 kon se nti quet nte, đah ăp nău ji đit prêng êng. Hŏ geh âk kon se nti rgâl ngăch blău, ntơm lăp nsum đah nsum mpôl. Đah ăp nău rgop an lam rêh jêng kon nuĭh, bác sỹ Đỗ Thuý Nga hŏ dơn geh săk ntơ lư "Bu ur Thủ đô ntoh lư năm 2022”. Nău n'groh an lĕ nău gĭt blău bah he đah nău kan bah wa Nga hŏ dơn geh nău dêh rŏng bah băl mpôl, ndrel kan. Wa Lê Thị Thu, 72 năm deh, nai ntĭm hŏ pah kan 20 năm ta Trung tâm Hy Vọng an gĭt:

        "Rnôk mâp wa Nga tâm ntŭk pah kan mhe, ri gâp saơ bôk năp lah nău dêh rŏng bah wa, wa lah du hê nuĭh geh nuih n'hâm dêh rŏng rŏng. Ntĭt kơt kon se si đah hor muh ri wa ndjôt ndơ but săm jŭr uănh năl an kon se n'hanh wa an dak si ngêt. Đah nuih n'hâm bah wa way dơi ƀư moh ndơ an kon se ri wa ƀư lĕ nău dơi bah he.

        Đah lĕ rngôch nău gĭt blău mpeh dak si n'hanh ntĭm nti wa Đỗ Thuý Nga mbrôn lĕ an Trung tâm Hy Vọng. Ntŭk ma păng hŏ mpoh chông ŭnh chrat ang bah nău rhơn, nău nđơr, nău mpŏng đah ăp rnăk wâl n'hanh đah ăp kon se quet nte di ngăn đah ăp săk moh "Ntŭk rgum nău mpŏng".