Năm 2020 n'hanh 4 khay bôk năm 2021, n'gor Dak  Lak hŏ geh tât khuch hô tă bah nuh srê COVID-19 lơh. Âk ƀon lan nkual rnoi mpôl đê̆ geh mpă wêl tă bah nuh srê. Bah năp ăp nău jêr jŏt nê, Ban Dân tộc n'gor Dak Lak hŏ ndrel đah ăp n'gâng kan ntrôl dăng nkoch trêng, rgŏ jă nuĭh ƀon lan n'hao nău gĭt êng tâm pah kan njrăng n'gang nuh srê; kan nsum đah n'gâng kan dak si ntĭm nti nuĭh ƀon lan tĭng ƀư di ăp quy định mpeh njrăng n'gang nuh srê COVID-19. Nơm geh kơt nê̆, nô nău nuh srê COVID-19 ta Dak Lak hŏ dơi mât kân, kônh wa plơ̆ tay nău rêh kơt ơm. Rơh tâm ôp đah wa Hà Huy Quang, Groi Ban Dân tộc n'gor Dak Lak ƀư kloh lơn ăp nău dơi pah kan dja.

- Dăn may an gĭt ăp nău kan ma Ban Dân tộc n'gor hŏ an ƀư tâm rnôk n'gor Dak Lak tâm rdâng đah nău tât nuh srê COVID-19 mêh wa?

Wa Hà Huy Quang: “Năm 2020, 2021 bah năp nău tât bah nuh srê COVID-19 ntoh luh ta n'gor, lơn lah đah ăp thôn, ƀon nkual rnoi mpôl đê̆, nău gĭt êng mpeh nkô̆ nău nê, Ban dân tộc hŏ nsŏng kơl an UBND n'gor rdâk njêng trong nchrăp rđău đă nhih pah kan rnoi mpôl đê̆  ăp gưl ntrôl dăng pah kan nkoch trêng, njrăng n'gang nuh srê COVID-19 tâm nkual rnoi mpôl đê̆ ta lam  n'gor, lơn lah ăp thôn ƀon geh tât khuch hô bah nuh srê. Ma ăp trong nkoch trêng kơt phăt lha siƀŭt, nchih yông n'hanh rgum ăp mpôl kan nuĭh geh nsing nơm hăn tât tĭng rnăk, goh tĭng mpông nkoch trêng, rgŏ jă nuĭh ƀon lan nkual rnoi mpôl đê̆ tĭng ƀư jăp ăp trong njrăng n'gang nuh srê Covid-19 tĭng nău njrăng đă bah n'gâng kan dak si; nơm geh kơt nê̆ nuh srê COVID-19 tâm nkual rnoi mpôl đê̆ tĭng kơn dơi mât kân, bah ir khuch tât săk khĭt rêh bah nuĭh ƀon lan, nsĭt nău rêh bah nuĭh ƀon lan mbrơi mbrơi plơ̆  tay kơt ơm, rgum pah kan jan sa, hun hao wăng sa.

- Hơi wa, he mbra dơi năl lah, vaccine lah ndơ khlay tâm pah kan njrăng n'gang nuh srê COVID-19. Yơn lah, rnôk nuh srê hŏ rngơt oi, du đêt nuĭh ƀon lan ta Dak  Lak geh nău mĭn uănh lhơ jêng hŏ mô lăng uănh khlay tât nău râng chuh vaccine njrăng n'gang nuh srê COVID-19, ta năp nău ngăn geh dja, Ban Dân tộc hŏ moh geh trong ƀư gay nkoch trêng, rgŏ jă nuĭh ƀon lan hăn chuh vaccine mêh wa?

Wa Hà Huy Quang: He mbra dơi năl lah, nău chuh vaccine njrăng n'gang nuh srê COVID-19 lah păng khêl nking nchăng geh nău dŭt tam tâm pah kan njrăng n'gang nuh srê; kơt he hŏ tă saơ tâm rơh bôk năp nơm geh trong nchrăp kan di, năn ngăch bah gưl ủy, n'gâng kan ăp gưl, lơn lah pah kan "Tâm boh joi  tơm vaccine dak bah dih" ngăch ngăr bah Đảng, Chính phủ he hŏ geh du rnoh vaccine âk năn ngăch gay chuh n'gang an ƀon lan ăp nkual geh dơh ntưp nuh srê hô, nơm geh kơt nê nuh srê tĭng kơn dơi mât kân, rnoh nuĭh khĭt tă bah nuh srê hŭch ngăn, nău rêh nuĭh ƀon lan plơ̆ tay kơt ơm; ntơm bah nê jêng nău mĭn tâm ƀon lan, lơn lah tâm nkual ƀon lan rnoi mpôl đê̆ geh nău mĭn uănh lhơ, thơ tha, mô  gơih nđơr đah nău chuh n'gang vaccine. Gĭt dơi nău nê, nsing ta nău ntĭm nti bah n'gâng kan dak si ăp gưl, Ban dân tộc n'gor hŏ lor nchrăp kan nsum đah Radio nău ngơi Việt Nam way  gŭ kan ta nkual Tây Nguyên n'hanh Radio ƀoh rup n'gor Dak Lak an ƀư pah kan nkoch trêng njrăng n'gang nuh srê ma bar ntil nău ngơi, pơk ta radio ƀoh ngơi bah n'gor n'hanh nkual ntrôl dăng pah kan nkoch trêng n'hao nău gĭt êng bah nuĭh ƀon lan tâm nkual rnoi mpôl đê̆ gĭt kloh mpeh nkô̆ khlay bah nău chuh n'gang vaccine Covid-19 tâm pah kan njrăng n'gang nuh srê COVID-19, rgŏ jă nuĭh ƀon  lan nkual rnoi mpôl đê̆ râng chuh n'gang vaccine nuh srê COVID-19 năn ngăch, ăp tŏng. Bah nê, tĭng nău mbơh rgum bah n'gâng kan dak si tât aƀaơ rnoh nkrum lam vaccine nuh srê COVID-19 tĭng rmôt nuĭh geh nău dơi uĕh; rgop tĭng kơn ntrôl rŭch nuh srê COVID-19 ta lam n'gor.

- Kơt may mhe nkoch mpeh pah  kan nsum đah ăp nhih pah kan thông tấn báo chí gay geh âk trong nkoch trêng gay n'hao nău gĭt êng bah nuĭh ƀon lan tâm pah kan njrăng n'gang nuh srê COVID-19, wa Hà Huy Quang uănh năl mpeh nău plơng ơh bah nuĭh djăt uănh n'hanh tâm let năp tay mhâm mêh. Ban Dân tộc n'gor Dak Lak moh geh bôk nău kan nsum gay mbơh gĭt lam lĕ rngôch nău lư mpeh ăp trong kơl an nkual ƀon lan rnoi mpôl đê̆ mêh:

Wa Hà Huy Quang: “Nê lah du nău mpơl đŏng n'hanh nău tam uĕh tâm pah  kan nkoch trêng njrăng n'gang nuh srê COVID-19 đah nău kan nsum đah Nhih pah kan báo đài bah Trung ương tâm ban kơt n'gor gay n'hao nău gĭt êng, nău dơn kan bah nuĭh ƀon lan tâm pah kan njrăng, n'gang nuh srê. Mât uĕh ăp nău dơi hŏ geh, pah kan nkoch trêng njrăng n'gang nuh srê COVID-19 tâm let năp tay lah ân rgum tâm du  đêt nău kan na nê̆ lah: Kan nsum tay đah ăp nhih pah kan nkoch trêng kơt Radio nău ngơi Viêt Nam nkual Tây Nguyên (VOV), Radio ƀoh rup  n'hanh ƀoh ngơi n'gor n'hao âk rơh nkoch trêng mbro, jru hvi tâm nkual rnoi mpôl đê̆; lơn lah mât uĕh nău khlay kan bah Nuĭh geh nsing nơm ntrôl dăng pah kan nkoch trêng njrăng, n'gang nuh srê, kơl nuĭh ƀon lan nkual rnoi mpôl đê̆ gĭt dơi nău khlay bah nău tam chuh vaccine njrăng n'gang nuh srê, lor nchrăp tay ăp trong nkra njrăng n'gang nuh srê: Bok put mbung, puh nkhĭt kaman, vaccine, dak si, săm ji, công nghệ n'hanh ăp trong ntĭm nti bah nhih pah kan dak si  ăp gưl; nkre đah leo tĭng ƀư jăp pah kan rnoi mpôl  đê̆ n'hanh trong kơl an  ƀon lan rnoi  mpôl đê̆ ta n'gor, lơn  lah an tĭng ƀư jăp rnoh tât bôk nău kan gưl neh dak  mpeh hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021-2030. Rgop ơm ntrôl rŭch nuh srê Covid-19, rgum hun hao wăng sa, n'hao geh nău rêh, mât đăp mpăn rnă njrăng chính trị n'hanh đăp mpăn lam rêh jêng kon nuĭh tâm nkual rnoi mpôl đê̆; huêt bah tâm ƀah mpeh nău rêh đah ƀon lan nkual rnoi mpôl đê̆  đah rnoi nuĭh Yăn, đah nkual ƀon lan n'hanh nkual ƀon têh./.

Ơ dăn lah uĕh wa!

Nam Trang/Nuĭh rblang: Điểu Thân