Tĭng ntŭk Uănh nđôi kop ji n’gor Dak Lak, kơp bah khay 6 tât nar 29/9, lam n’gor kơp dơn 33.120 nuĭh ji măt chăng, dŭt âk lah kon hŏk. Nău kan dak si n’gor Dak Lak dôl ndĭn ndăn mbơh ƀư ăp trong gay nking n’gang nău ntưp rêng bah srê aơ. Tâm rnoh rlău 30 rbăn nuĭh ji măt chăng ri geh rlău 29 rbăn nuĭh dơi kơp dơn tâm ăp ngih sam ƀŭt. 3 nkuăl kơp dơn rnoh nuĭh ntưp âk ngăn lah Buôn Đôn, Cư Kuin n’hanh Cư M’gar, ta rnoh rlău 2000 nuĭh.

Ta năp nu nău ji măt chăng dôl ntưp rêng ngăch ta lam n’gor, lơn lah ta rơh năm kon hŏk, N’gâng kan dak si n’gor Dak Lak lĕ tâm rgop đah ăp ntŭk kan geh tât n’hao ăp nău ƀư uănh nđôi, nkhah êng n’hanh mbơh mpeh ăp trong njrăng n’gang ta ngih sam ƀŭt n’hanh ntŭk gŭ rêh. Ndrel đah nĕ ăp ngih dak si lĕ nchrăp dak si gay pă an ngăch ăp nuĭh geh ji n’hanh nchrăp rgum dŏng, săm nuĭh ji.