Dơn nklâm ndơ lah prăk măt khlay rlău 20 rkeh prăk bah nău boăt nthoi bah Rmôt pah kan nău rêh jêng bah Ngih dak si Đa khoa nkual Tây Nguyên đah ăp nuĭh lŏng bôk tôr gay ntop kơl mon Phan Đình Cương sôt săk mbăn tă bah pâl pháo, yuh Hồ Thị Hồng Phương me mon Cương, ta thôn 1 xă Ea Păl, nkuăl Ea Kar mô bah răm rhơn n’hanh rngot. Yuh Phương an gĭt, rnăk wâl yuh geh nuĭh kon, tâm nĕ mon Cương lah kon bôk. Khay 2 mhe rlău, yor uănh joi, mon lĕ đah nô mpôl pâl pháo nchăm rwăt tâm mạng n’hanh geh rtoh. Mon Cương sôt săk mbăn du đah măt n’hanh an rek koh jăng 2 mpang ty. Bôl lĕ manh ăp ntŭk, yơn ur sai yuh mô tŏng prăk trok an prăk săm mon. Đă Rmôt pah kan nău rêh jêng bah ngih dak si boăt nthoi đah ăp nuĭh lŏng bôk tôr ntop kơl prăk kơl yuh dôh rklaih nău mbak jâk. Mô knŭng ndrĭ, Rmôt pah kan nău rêh jêng hôm dơi joi nuĭh ntop kơl lĕ rngôch prăk ndôp ty an mon Cương:

“Bah rnôk mon lăp ngih dak si ri ăp nai dak si kơt ăp Điều dưỡng ta Ngih dak si mât săm mon dŭt n’hâm n’hanh dŭt yô̆ mon, n’hanh đă nai dak si ta ngih dak si nkual lĕ kuăl jă ăp nuĭh lŏng bôk tôr kơl mon n’hanh rnăk wâl saơ dŭt lah uĕh. Ndơn măt rnăk wâl lah uĕh ăp nuĭh lŏng bôk tôr ăp nar bah năp lĕ kơl mon dŭt âk ah”.

Oh Y Hoan Ê Ban (20 năm deh) ta buôn Ju, xă Ea Tu, nkual ƀon têh Buôn Ma Thuột geh rmanh tâm tom ndeh ta trong hăn sĭt pah kan. Lăp ngih dak si săm ndal tâm nu nău âk sôt rmanh dôh gŭih, pă nting dôn gŭih, tăch glo nting n’hanh lêt 2 jâng. Bôl Y Hoan lĕ rlet rlău đah nău khĭt n’hanh rêh, yơn ta ưbah rmanh mbăn jêng oh an rek âk tơ̆. Y Hoan kon đơi me bơ̆ bah năm 13 năm deh, rêh đah kônh, prăk an săm rlău nău dơi geh. Knơm nău kuăl jă ngăch bah Rmôt pah kan nău rêh jêng kon nuĭh, Y Hoan lĕ dơi ăp nuĭh lŏng bôk tôr ntop kơl bơi 50 rkeh prăk, tŏng an trok prăk ngih dak si. Wa Y Băn Ê ban, kônh bah Y Hoan nkoch:

“Nău rêh bah mon ri dŭt jêr jŏt, mô geh bơ̆, mô geh mê̆. Pơng têh pơng hăn kan bu, aƀaơ mâp rmanh, lăp ta aơ nai dak si săm ngăch, jêh nĕ săm an mon lŏng kuăl jă nuĭh lŏng bôk tôr kơl an mon geh prăk gay săm an mon, gâp mô gĭt nău ngơi tay, gâp dăn lah uĕh”.

Nô Hồ Sĩ Phú-Kruanh jrô kan Điều dưỡng, mât uănh Rmôt pah kan nău rêh jêng bah Ngih dak si Đa khoa nkual Tây Nguyên an gĭt, bah năm 2022 tât aƀaơ, Rmôt kan nău rêh jêng bah Ngih dak si lĕ kuăl jă rlău 1,5 rmen prăk n’hanh bơi 1.000 nklâm ndơ an ăp nuĭh ji geh nău rêh jêr jŏt. Bah meng nău ƀư lŏng bôk tôr hôm ƀư nău kan mât uănh nuĭh năch, ntĭm ăp trong ƀư, but uănh, săm ji dôl ƀư ta ngih dak si; ntĭm nuĭh ji ăp sam ƀŭt, sam tra khlay tâm di đah ăp nuĭh rnôk tât but uănh n’hanh săm; ntop kơl rblang ăp nău wăk kol bah rnăk wâl nuĭh ji mpeh: nu nău nuĭh ji, trong săm bah nai dak si, mât uănh ta jay; Nău dơi geh n’hanh lĕ đah nău kan bah nuĭh ji n’hanh rnăk wâl. Nô Hồ Sĩ Phú an gĭt:

“Rmôt pah kan nău rêh jêng dâk dơn lĕ nău kan wơt dơn ăp nău mbơh ăp nuĭh ji jêr jŏt mpeh prăk săm ji mô lah prăk gŭ âm bah ăp Khoa săm n’hanh jrô kan mpôl hên mbra hăn năl nău mbơh geh di nău rêh jêr jŏt gay ŭch kuăl jă đŏng. Jêh nĕ jrô kan mpôl hên mĭn êng boăt nthoi, tâm mâp ăp nuĭh lŏ bôk tôr gay nuĭh lŏng bôk tôr tât an nuĭh ji gay ntop kơl du gâl prăk săm kơt gŭ âm an nuĭh ji. Jrô kan lĕ mĭn m’hâm ƀư an nuĭh ji đăp mpăn trong săm, mô mĭn rvê đah prăk săm ji n’hanh prăk gŭ âm”.

Tĭng nai dak si CKII Nguyễn Đại Phong-Giám đốc Ngih dak si Đa khoa nkual Tây Nguyên, Rmôt kan nău rêh jêng bah Ngih dak si dơi ndâk njêng bah năm 2016. Tât năm 2021 dơi nglăp nsum jrô kan Điều dưỡng. Uănh lah mpeh săk rnglăy nău kan bah Rmôt kan nău rêh jêng bah Ngih dak si, nai dak si Nguyễn Đại Phong an gĭt:

“Rmôt pah kan nău rêh jêng geh nău ƀư dŭt khlay tâm ăp nău kan boăt nthoi ăp nuĭh ntop kơl gay kơl an ăp nău rêh jêr jŏt ngăn. Lor lah rgŏ jă nuĭh kan, rgŏ jă ăp nuĭh lŏng bôk tôr, đê̆ đŏng lah kuăl jă ăp nuĭh báo gay nchih mbơh rup n’hanh ndơ̆ ăp báo ri lĕ dơi geh nău kơl dŭt âk bah ăp nuĭh lŏng bôk tôr n’hanh ăp nuĭh lŏng bôk tôr ƀư an nuĭh ji bah oi jêr jŏt n’hanh geh prăk trok ngih dak si. Rlău ma nĕ rmôt pah kan nău rêh jêng lĕ dơi ƀư dŭt âk nău nĕ ntĭm, kơl nuĭh ji lĕ rngôch ăp nău ma nuĭh ji mô dơi răk rao êng săk nơm, ƀư an nuĭh ji kơt rnăk wâl nuĭh ji khân pơng dŭt ŭch”.

Nău mbơh ƀư lôch uĕh nău ƀư pah kan rêh jêng tâm ngih dak si gay kơl nuĭh ji mkra ăp nău ŭch khlay rnôk tât ngih dak si, săm ta Ngih dak si lah du njoat hăn mhe tâm trong kan mât rong n’hanh rhŏ an nuĭh ji, rgop n’hŭch nău rngot ji, nău mô tŏng yor mbak nău kop ji bah dŭt âk nuĭh; ntop tay nău răm, nău uĕh, ntop tay ăp nău khlay uĕh lăng tâm nău rêh...