VOV4.M'nông: Ta năp nău lư mpeh nău lăp tâm dak he bah ăp njêng săk mhe BA.4, BA.5 n'hanh lĕ ma njêng săk kon BA.2.12.1 , ăp nar rlău aơ, nuĭh ƀon lan ta n'gor Dak Lak hŏ nsrôih lơn tâm nău hăn chuh nkah tay n'glai 3, n'glai 4 njrăng n'gang COVID-19.

          Ntŭk chuh bah Rgum tơm mât kân Kop ji n'gor Dak Lak bar pe nar aơ khuh n'gôr nuĭh hăn tât chuh vaccine njrăng n'gang COVID -19. Gŭ kâp tât săk he chuh vaccine, yuh Nguyễn Thị Hoa ta phường Thống Nhất, nkual ƀon têh Buôn Ma Thuột an gĭt, lôch rnôk chuh tŏng 3 n'glai vaccine, khay 2/2022 yuh geh ntưp COVID -19. Nar bah ji hŏ jŏ yơn yuh mô hŏ ŭch hăn chuh tay n'glai 4. Yơn lah, rnôk tăng lư tât ăp njêng săk mhe bah COVID -19 hŏ ntoh ta dak he jêng yuh hŏ ŭch chuh tay.

       “Mô nănh chuh n'glai 4 yơn hŏ geh nău klach  hôm, aƀaơ geh njêng săk mhe ri ân hăn chuh dơm, klach ntưp njêng săk mhe, klach ji jru, aƀaơ hăn chuh n'glai 4. Ăp nuĭh ân hăn chuh n'glai 4 gay mât ngăch dăng n'hâm suan an săk he nơm n'hanh rnăk wâl dĭl".     

        Rvê ta năp njêng săk mhe lah nkô̆ ma ur sai wa Nguyễn Văn Hải ta phường Tân Thành, nkual ƀon têh Buôn Ma Thuột, ngăch hăn chuh n'glai nkah tay vaccine njrăng n'gang COVID-19:

      “Aƀaơ ur sai hên hăn chuh tay n'glai 4 yor tăng lư nuh srê plơ̆ ntoh tay ri he wĭ wĕ rvê đŏng n'hanh gâp mĭn lah he ân chuh âk n'glai nkah tay gay ntop n'hao âk  tay rnoh njrăng n'gang đah săk nơm tâm ban kơt nsum mpôl lam ƀon lan uĕh tam đŏng”

       Bác sĩ Võ Minh Hùng, Giám đốc Trung tâm y tế nkual ƀon têh Buôn Ma Thuột an gĭt: Aƀaơ, rnoh âk nuĭh rlău 18 năm deh nkual ƀon têh hŏ an chuh n'glai 3 geh nklăp rlău 45%, n'glai 4 geh rlău 6% n'hanh n'glai 3 an kon se ntơm bah 12-17 năm deh geh rlău 38%. Nău dơi dja lah mô hŏ geh tât rnoh rđĭl đah nău ŭch geh ndơ̆ luh bah Bộ Y tế. Yơn lah, ăp nar rlău  aơ, rnoh âk nuĭh ƀon lan râng chuh vaccine n'glai 3, n'glai 4 hŏ hao dŭt âk, lơn lah tâm rơh 24 n'hanh 25 đah nklăp 20.000 dĭng vaccine, Trung tâm y tế hŏ an chuh lĕ vaccine, mô an geh nău rmeh vaccine lĕ nar dŏng.

     “Nău gĭt êng bah nuĭh  ƀon lan bôk năp hŏ geh nău rgâl âk đŏng tâm pah kan njrăng n'gang nuh srê. Rnoh âk nuĭh ƀon lan hăn tât ăp ntŭk kan dak si tâm dâng mhe aơ gay dơi chuh n'glai 3 n'glai 4 âk đŏng.”

        Bác sĩ Hoàng Hải Phúc, Groi Giám đốc Mât uănh Ntŭk rgum kan mât kân kop ji n'gor Dak Lak an gĭt, tâm pơh mhe aơ, rnoh âk nuĭh ƀon lan hăn tât chuh vaccine njrăng n'gang COVID-19 hao âk ndal. Aơ lah nău mpơl uĕh kơl Dak Lak mbra ƀư lôch jêh rnoh tât lĕ khay 8 lam n'gor geh rlău 90% rnoh âk nuĭh ƀon lan chuh vaccine njrăng n'gang COVID -19 n'glai 3. 

      “Tât khay 8 mpôl hên mbra an chuh tay hôm du tơ̆ đŏng n'hanh mpôl hên hŏ geh si ƀŭt njuăl tât ăp đơn vị ntrôl ngăch chuh n'gang. Gay ƀư dơi nău kan dja nklăp du hê n'gâng kan dak si mô dơi ƀư, ân geh nău rđău đă grêt dêh bah Tỉnh ủy, Thành ủy, Huyện ủy, Thị ủy gay hăn tĭng rlong, goh tĭng mpông đă nuĭh ƀon lan ký ton, đă nuĭh ƀon lan ân tĭng jăp gay chuh n'gang vaccine. Chuh vaccine ta aơ mô di lah njrăng n'gang nău ji ma chuh vaccine gay njrăng n'gang nuh srê nsum lam nsum mpôl tâm ƀon lan."

Nuĭh rblang: Điểu Thân