Aơ lah nar rgum rƀŭn ăp khay bah Câu lạc bộ “Mât ntĭm kon uĕh” bah chi hội bu ur thôn 1, xă Đưng K’Nớ, nkuăl Lạc Dương, n’gor Lâm Đồng. Dơi ndâk njêng tâm khay 8 năm 2012 đah 10 nuĭh, tât aƀaơ Câu lạc lĕ geh 61 nuĭh. Yuh Bôn Niêng K’Pớt, Chủ nhiệm Câu lạc bộ an gĭt, bah năp đaơ oh yuh bu ur thôn 1 wât hôm e đêt tât nău mât uănh, ntĭm nti oh kon, ndâk njêng rnăk wâl mô hŏ gĭt blău rgâl hao, bah rnôk geh Câu lạc bộ tât aƀaơ, oh yuh lĕ n’hao gĭt wât, geh nău uănh tât mât rong ăp kon tŏng ăp lơn:

Bah rnôk ndâk njêng Câu lạc bộ tât aƀaơ ri oh yuh lĕ dơi gĭt nău ƀư tơm bah bu ur tâm nău rêh wăng sa rêh jêng n’hanh rnăk wâl. Rnoh deh kon tal 3 hŭch âk. Kăl e nklăp 50%, hôm aƀaơ geh 10% dơm. Rnoh brêt têh hŭch âk, bah năp đaơ mô hŏ geh câu lạc bộ rnoh brêt têh rlău 45%. Nuĭh tâm câu lạc bộ geh kon gĭt nău, blău nti, rnoh ntlơi nti n’gul gưl hŭch dŭt âk.

Đah âk trong kơt: Rgum nchră, ôp nău, phăt sam ƀŭt, nkoch trêng đah mbung, nău pâl tôch nkao dân chủ... n’hanh tâm rgop âk nkô̆ nău nkoch trêng, Câu lạc bộ lĕ năp an nuĭh tâm rmôt ăp nău wât mpeh Luật ur sai rnăk wâl, deh kon đêt, ndơ ƀư sa kah an bu ur bŭn, trong mât rong, deh kon khoa học, gâm ăp ndơ sa kah tŏng ăp chất n’hanh ăp trong njrăng n’gang kop ji an kon hun hao ngăch dăng... Yuh Rơ ông K’Yồng, nuĭh tâm rmôt câu lạc bộ nkoch:

Kăl e rnôk mô hŏ râng Câu lạc bộ ri knŭng geh sa trau đah piăng dơm, aƀaơ gĭt gâm an kon, geh tăp kik, geh piăng ri he gâm an oh bê sa pơng geh chất lơn.

Tă bah ăp nar rgum rƀŭn, âk oh yuh janh lơn. Nchrăp mĭn joi âk nkô̆ nău mpeh mât rong kon, mât chăm rnăk wâl, tă bah nĕ kơt dŏng tâm nău rêh. Knơm nĕ rnăk wâl nuĭh tâm rmôt ntop tay uĕh lăng hơm răm. Yuh Bon Niêng Kđơng, geh rlău 1 năm rgum rƀŭn ta câu lạc bộ nkoch:

Dơi ăp oh yuh nkoch mpeh nău blău ơm mât ong kon tâm rnăk wâl, bah nĕ gĭt djăt n’hanh wât ntrŭt đă gay kơl kon rlet rlău ăp jêr jŏt.

Wa Bon Niêng Ha Krai, Groi Kruanh UBND xă Đưng K’Nớ an gĭt, thôn 1 aƀaơ geh 207 rnăk, 859 nuĭh đah rlău 90% lah nuĭh rnoi mpôl đêt. Bah rnôk Câu lạc bộ pah kan, lĕ rgop rgâl nău wât bah kônh wa. Knơm nĕ, rlău 10 năm bah năp, ta lam thôn 1 mô hôm kon se brêt têh, mô geh kon hŏk ntlơi nti; 5 năm dăch aơ mô geh nuĭh gŭ ur sŏk sai ơm, ur sai êp dak mham, lĕ rngôch kon se tâm năm dơi tât ngih sam ƀŭt da dê, 100% rnăk wâl geh rnăk văn hóa.

Tâm năm mhe rlău Câu lạc bộ aơ geh âk nău ƀư, ngăn lah tâm trong kan mât ntĭm kon uĕh, mô geh nău tâm lơh rnăk wâl, moh rmanh nău rêh jêng. Gưl bah lơ geh âk bằng khen đŏng, sam ƀŭt rnê rhơn câu lạc bộ aơ. Tâm năm bah năp tay, tĭng nău hun hao bah Câu lạc aơ ri pơk hvi ăp thôn ƀon, uănh aơ lah ntŭk nsing nơm, ntrŭt đă gay rêng hvi tâm ăp thôn.

Câu lạc bộ “Mât ntĭm kon uĕh” ta thôn 1, xă Đưng K’Nớ lĕ mât uĕh săk rnglăy đah âk nău ƀư ngăn ngên n’hanh ngăn jêng ntung nthoi kơl oh yuh tâm rgâl, djăt ăp nău wât uĕh, nău blău đah mât ntĭm kon, kơt ăp trong uănh đah rnăk wâl n’hanh nău rêh jêng, rgop ndâk njêng ƀon lan ndrŏng uĕh tay, rnăk wâl ăp nuĭh rmôt bu ur ntop tay hơm răm, uĕh lăng.