Ăp nar aơ, ta ăp phường Khánh Xuân, Thành Nhất, Tân Hòa n’hanh xă Hòa Thuận, rmôt dak si nkual ƀon têh Buôn Ma Thuột, n’gor Dak Lak dôl rgum soan gay puh dak si hóa chất nkhĭt măch nking n’gang ntưp bah nău ji duh rtoh luh mham rih ta lam nkual.

Ndrel đah ăp cán bộ dak si tât puh hóa chất ta ntŭk srê mhe ntoh ta phường Thành Nhất, yuh Đỗ Thục Vi, mât uănh trong kan njrăng n’gang srê bah Trạm y tế phường Thành Nhất an gĭt, nău nuĭh ƀon lan mô hŏ tĭng nău ntrŭnh mpeh njrăng n’gang srê duh rtoh luh mham rih lah nkô̆ nău khlay an ntŭk srê ntoh:

Jêh rnăk wâl geh duh rtoh luh mham rih aơ ri saơ nău wây nuĭh ƀon lan đêt mpeh răk rao ntŭk ntô gŭ âm chiău ma. Gâp lĕ tâm rgop  đah y tế ta ntŭk hăn ntĭm răk rao ntŭk ntô gŭ âm, răk rao ngih wâl lơn lah tâm yan mih, yan mbra ƀư ji duh rtoh luh mham rih dŭt âk.

Ntŭk srê duh rtoh luh mham rih aơ dơi saơ tâm lơ 19/6 mhe rlău ta rnăk yuh Lê Thị Thuận, trong Nguyễn Phúc Chu, phường Thành Nhất, đah 3 nuĭh tâm rnăk geh ji. Tĭng nău yuh Thuận, 3 me kon yuh tĭng rơh ntoh geh nău ji duh hô, săm êng ta jay mô bah jêng an lăp ngih dak si:

Lĕ rngôch an hăn ngih dak si, bu test mham lah geh duh rtoh luh mham rih, Tĭng nău ji aơ klach yor duh hô, lŏ rtoh luh mham rih tâm trôm tay. Jêh rnôk bah ji sĭt jay gâp răk rao ngih wâl, ntŭk geh dak ri gâp kŭp lơ gâp mô an dak nkân gay mô geh măch rêh.

Lah ngoăy tâm 3 ntŭk djôt dơn rnoh nuĭh ntưp duh rtoh luh mham rêh âk ngăn ta n’gor Dak Lak, đah 84 nuĭh, Ngih dak si nkual ƀon têh Buôn Ma Thuột dôl ntĭm ngih dak si xă, phường mkra rjăp ăp ntŭk srê mô an srê ntoh rêng hvi. Nkre, n’hao uănh nđôi, groi uănh rjăp nu nău kop srê, rgum tâm ăp ntŭk geh srê ơm, geh ntoh srê gay saơ ơm ăp nuĭh ntưp mhe. Tĭng wa Võ Minh Hùng, Giám đốc Ngih dak si nkual ƀon têh Buôn Ma Thuột, ji duh rtoh luh mham rih dôl geh âk rnôk rnoh nuĭh duh rtoh luh mham rih tâm khay 6 geh 50% dĭng lĕ nuĭh bah bôk năm tât aƀaơ. Dôl uănh, lĕ kơp dơn 2 ntŭk srê ta phường Thành Nhất n’hanh phường Khánh Xuân.

Tât rnôk aƀaơ ta nkual ƀon têh ri lĕ rngôch ăp xă, phường lĕ hăn răk rao ntŭk ntô gŭ âm n’hanh Ngih dak si lĕ ndâk ƀư trong nchrăp puh dak si an 2 xă phường geh rnoh nuĭh ji duh rtoh luh mham rih tâm 3 năm bah năp âk lah xă Hòa Thuận n’hanh phường Tân Hòa, mpôl hên mbơh ƀư bah pơh bah năp n’hanh mbra jêh tâm pơh aơ.

Tĭng nău mbơh bah Ntŭk uănh nđôi kơp ji n’gor Dak Lak tât nar dŭt khay 6, lam n’gor djôt dơn 408 nuĭh ji duh rtoh luh mham rih. Ji ntoh ta lĕ rngôch 15/15 nkuăl, nkual têh, nkual ƀon têh. Wa Hoàng Hải Phúc, Giám đốc Ntŭk uănh nđôi kop ji n’gor Dak Lak an gĭt, trong kan njrăng n’gang ji duh rtoh luh mham rih dôl dơi nău kan dak si ndăn mbơh ƀư.

Băng: N’gâng kan dak si ntĭm rđău Ntŭk uănh nđôi kop ji n’gor an n’hao mbơh tâm nar poăn ăp pơh. Nkre ntĭm rđău ngih dak si Đa khoa nkual n’hanh ăp ngih dak si Đa khoa ta lam n’gor an an mbơh nău ji tâm nar poăn ăp pơh gay ăp nai dak si mư dơi gĭt nău ntrŭnh mpeh nchroh săm duh rtoh luh mham rih mhe ngăn. Nkre mpôl hên lĕ n’hao mbơh nkoch trêng gay nkoch tơih nuĭh ƀon lan an gŭ âm kloh uĕh, mpêh koaih ndŏk nja, răk ntŭk ntô gŭ âm, răk jŭt ngih wâl ăp nar n’hanh rnôk geh ntoh duh an tât dâl ngih dak si.

Ta Gia Lai, Ntŭk uănh nđôi kop ji n’gor an gĭt, duh rtoh luh mham rih lĕ ntoh ta lĕ rngôch 17 nkuăl, nkuaol têh, nkual ƀon têh đah bơi 600 nuĭh ntưp. Ăp ntŭk geh nuĭh ntưp âk lah nkual ƀon têh Pleiku, ăp nkuăl Krông Pa, Krông Chro, Đắk Pơ. Bah bôk năm tât aƀaơ, n’gor Gia Lai djôt dơn 312 ntŭk srê, tâm nĕ 35 ntŭk srê mô hŏ dơi bah. Tĭng nău kan dak si Gia Lai, ăp nuĭh ji duh rtoh luh mham rih hao âk bah khay 5 n’hanh jŏ tât aƀaơ yor tâm yan mih lĕ dơh an măch deh, hun hao.

Duh rtoh luh mham rih mbra hao âk n’hanh geh jêr jŏt tâm khay tât rnôk rnoh mih âk, trôk nar nđik, lah ntŭk ntô dơh an tăp măch rhai dak râ̆. Wa Nguyễn Văn Đồng, Groi Giám đốc Ntŭk uănh nđôi kop ji n’gor Gia Lai an gĭt:

Ntŭk kan tâm rgop đah ăp nkuăl n’hao trong kan puh  trăm gay njrăng n’gang n’hanh nkhĭt rdêl ntŭk srê duh rtoh luh mham rih. Tâm rgop đah ngih dak si mbơh ƀư săm dŭt n’hâm, mât uănh nuĭh ji. Ntĭm nuĭh ƀon lan, lơn lah ta ăp ntŭk srê ƀư kloh uĕh ntŭk gŭ rêh gay n’hŭch tăp rhai dak yor măch deh.

Tây Nguyên dôl tâm yan mih, yan dơh an kop srê duh rtoh luh mham rih hao âk n’hanh dơi ntoh ntŭk srê duh rtoh luh mham rih lam hvi. Gay uănh nđôi srê duh rtoh luh mham rih, ndrel đah nău lăp bah ăp ngih pah kan dơi kan, ăp nuĭh ƀon lan an n’hao wât njrăng n’gang. Ta năp măt lah muih koaih ndŏk mbrâm, răk rao kloh uĕh ăp ntŭk nkân dak gay n’hŭch măch deh tăp rhai dak./.