VOV4.M’nông: Khay bah năp, ăp n’gor tâm nkual Tây Nguyên lĕ ntrôl ngăch chuh vaccine njrăng n’gang Covid-19, tâm nĕ uănh khlay tât rnoh năm deh bah 5 tât bah dâng 12 năm deh, rnôk ăp oh ntơm lăp năm nti.

Dak Lak n’gor geh rnoh chuh vaccine njrăng n’gang Covid-19 an kon se bah 5 tât bah dâng 17 năm deh ta Dak Lak hôm e đêt. Tĭng wa Hoàng Hải Phúc, Groi kruanh mât uănh ntŭk uănh nđôi kop ji n’gor Dak lak, nkô̆ nău ƀư rnoh chuh vaccine njrăng n’gang Covid-19 ta rmôt năm aơ geh đêt lah yor mô dơi geh nău tâm ban ŭch bah ăp me bơ̆. Âk nuĭh an lah vaccine geh âk nău khuch êng, khuch tât săk soan n’hanh nău dơi wât nti bah ăp mon... Bah meng nĕ, yor srê Covid-19 lĕ rngơt jêng âk me bŏ geh nău mĭn thơ tha. Gay ntrôl hao rnoh chuh vaccine an kon se bah 5 tât bah dâng 17 năm deh, nău kan dak si mbra ntrôl dăng trong kan tâm rgop đah n’gâng kan ntĭm nti n’gor gay nkoch trêng, rgŏ jă me bơ̆ njŭn kon tât ăp ntŭk chuh, gay đăp mpăn chŏl srê ta ntŭk, dêr geh ntoh tay srê ta ăp ngih sam ƀŭt tâm năm nti mhe.

“Đah kon se bah 5 tât bah dâng 12 năm deh ri an tâm rgop đah nău kan ntĭm nti gay m’hâm ƀư nai, ngih sam ƀŭt rgŏ jă nkoch trêng an kon hŏk, an me bơ̆ wât nău dơi, nău kan bah ăp kon hŏk, ăp me bơ̆ gay m’hâm ƀư an chŏl srê ta ntŭk gŭ rêh. Lah mô geh chŏl srê ntŭk gŭ rêh ri bah năp nău rgâl BA.4, BA.5 dơi lăp tâm Dak Lak dŭt âk. Lah mô geh chŏl srê ntŭk gŭ rêh ri geh Covcid-19 plơ̆ tay lah nău dơi geh”.

Dak Lak ntrôl ngăch chuh vaccine-Covid-19.

Gay nkra rgâl nu nău thơ tha tâm trong kan njrăng n’gang srê Covid-19, khay bah năp, n’gor Lâm Đồng lĕ ƀư âk trong, ngăn lah ntrôl dăng nău chuh njrăng n’gang an kon se rnôk năm nti mhe lĕ ntơm. Gay trong kan njrăng n’gang srê Covid-19 geh săk rnglăy uĕh, n’hao rnoh nuĭh râng chuh njrăng n’gang, n’gor Lâm Đồng dôl ƀư nău kan chuh njrăng n’gang covid-19 ta lam hvi tâm n’gor, tâm nĕ rgum kơl chuh lôch ngai 3 an nuĭh lah kon hŏk bah 12 tât bah dâng 18 năm deh lor rnôk năm nti mhe 2022-2023. Jêh rnôk dơi mbơh ƀư lĕ wăch rgum âk kon hŏk tât ăp ntŭk chuh tĭng nău mbơh bah nău kan dak si. Oh Trần Thanh Vy, kon hŏk ngih sam ƀŭt Trung học cơ sở Lộc Sơn, nkual ƀon têh Bảo Lộc, lah:

“Mon lĕ dăp mông nar n’hanh tât ntŭk chuh di mông, di nar. Rlău ma nĕ, mon hôm kuăl jă băl hăn chuh, ndrel ty ƀư di ăp ndơ Ngih dak n’gluh an gay njrăng n’gang srê Covid-19”.

Gay ntrôl ngăch chuh vaccine, mhe aơ, UBND n’gor Dak Nông ƀư lễ “Rgŏ jă chuh vaccine njrăng n’gang Covid-19” năm 2022. Bôl lĕ geh rlău 87% rnoh nuĭh rlău 18 năm ta Dak Nông dơi chuh vaccine njrăng n’gang Covid-19, dâk tal 6 ta lam dak, yơn ngăch chuh vaccine Covid-19 ta âk ntŭk ta Dak Nông dôl geh nsrŭng tay, ngăn lah chuh nglai 2 an kon se bah 5 năm tât bah dâng 12 năm, nglai 3 an kon se bah 12 năm tât bah dâng 18 năm. Ta năp nu nău nĕ, UBND n’gor Dak Nông đă ăp ngih pah kan ntŭk kan tâm n’gor n’hao nuih n’hâm nău kan, rgum ntrôl ngăch chuh tŏng an kon se bah 5 năm deh tât bah dâng 12 năm deh; nsrôih jêh ơm ngăn nău chuh ngai 4 an nuĭh ƀon lan bah 18 năm deh let lơ n’hanh ntrôl ngăch chuh nglai 3 an nuĭh bah 12 năm deh tât 18 năm deh tĭng nău ntŭnh bah n’gâng kan dak si. Wa Nguyễn Văn Toàn-Kruanh n’gâng kan ntĭm nti Dak Nông an gĭt, nău ƀư “Rgŏ jă chuh vaccine Covid-19: tâm rnôk năm nti mhe ntơm tât dŭt khlay, n’hanh kon hŏk ăp gưl lah nuĭh dơi uănh ngăn.

“Gay nchrăp an năm nti tât ri N’gâng kan dak si lĕ tâm rgop đah N’gâng kan ntĭm nti ƀư trong nchrăp, bah aƀaơ tât rnôk ntơm ƀư lah n’hao chuh vaccine an ăp mon tâm rnoh năm deh. Tâm nĕ tâm rgop gay ƀư ăp trong mkra gay njrăng n’gang âk ntil srê lơn lah duh rtoh mham rih. Nkô̆ nău aơ aƀaơ lĕ dơi ntĭm rđău bah Ủy ban an tât 2 n’gâng kan n’hanh ăp gưl geh tât, lơn lah Ủy ban nhân dân nkuăl nkual ƀon têh gay ƀư nău aơ, n’hanh kơp ăp rnoh an. Ăp phường, xă, nkuăl têh ma geh rnoh vaccine chuh đêt ngăn ri đah dŭt n’hâm uănh gay dơi geh nău rƀŏng ma chính phủ ntrŭnh”.

Dak Nông ƀư “Rgŏ jă chuh vaccine njrăng n’gang Covid-19.

Tâm ban ma nĕ, ngih pah kan dơi kan n’gor Gia Lai dôl ƀư âk trong gay n’hao rnoh chuh vaccine Covid-19 an kon se bah 5 tât bah dâng 12 năm deh. Wa Đinh Hà Nam-Groi kruanh n’gâng kan dak si Gia Lai an gĭt, gay n’hao rnoh chuh vaccine Covid-19 an rmôt năm aơ, Gia Lai lĕ n’hanh dôl nsrôih ƀư âk trong kơt: tâm rgop rjăp đah nău kan nkoch trêng, nău kan ntĭm nti nkoch trêng, rgŏ jă me bơ̆ kon hŏk; n’hao uănh nđôi, ntrŭt đă ƀư chuh bah gưl ƀon lan. Wa Nam an gĭt, aƀaơ, du nar n’gor Gia Lai hôm e kơp dơn âk nuĭh ntưp Covid-19. Yor nĕ, nău kan dak si ntrŭt đă me bơ̆, an geh kon se chuh tŏng ăp gay đăp mpăn chŏl srê an kon se, ngăn lah rnôk êp năm nti mhe.

“Tât ăp jay kuăl, điện thoại an me bơ̆ rdêng ăp mon tât ntŭk chuh. Khay tât, trong kan nkoch trêng hôm e bôk năp. Khlay ngăn lah ban ntĭm rđău ƀon lan, gưl xă, phường, nkuăl têh ndrel ăp ngih sam ƀŭt săch năm aơ hăn chuh. Nău kan dak si mpôl hên pơk ntŭk chuh ta ăp ngih dak si, nchrăp pơk ntŭk chuh ăp ntŭk tât ta thôn, ƀon. Mpŏng ŭch têh ngăn bah mpôl hên lah me bơ̆ an oh kon nơm hăn chuh gay đăp mpăn chŏl nău ji an êng nuĭh n’hanh ntŭk gŭ rêh”.

Đah âk trong mkra êng êng, n’gâng kan ƀon lan n’hanh nău kan dơi kan ta ăp n’gor tâm nkual Tây Nguyên lĕ n’hanh dôl ntrôl ngăch chuh vaccine Covid-19 an ăp rnoh năm deh êng êng, tâm nĕ uănh tât kon se, rnôk năm nti mhe êp tât.

          Nuĭh rblang: Y Sưng Phê Ja