VOV4.M’nông: Yŭr mham kơl nuĭh lah nău ƀư uĕh khlay bah rnoi mpôl he. Đah trong way ƀư “ntruh mham an, du nău rêh gŭ tay”, ntrong leo yŭr mham dôl geh soan treh rêng têh dăng ta nkual Tây Nguyên. Tă bah nĕ, ntop rnoh mham têh an ăp ngih dak si, tŏng ăp ngăch trong kan kơl n’hanh săm nuĭh ji.

Bơi 20 năm aơ, nô Hoàng Minh Trung, kruanh rmôt “Hành trình đỏ” nkuăl Cư Kuin, n’gor Dak Lak râng yŭr mham ŭch êng du năm 2 tơ̆. Aƀaơ nô lĕ geh 38 tơ̆ râng yŭr mham kơl nuĭh. Nô Trung nkoch: Bah năp đaơ, tâm du rơh lăp ngih dak si săm ji nô n’hanh nuĭh bên ŭch tât mham. Rnôk nĕ du dŭng mham an rwăt dŭt khlay. Lah mô geh ăp nuĭh yŭr mham kơl nuĭh, rnăk wâl gâp mâp dŭt âk jêr jŏt. Yor nê, jêh rnôk sĭt ngih dak si ngăch tay gâp râng yŭr mham n’hanh rgŏ jă băl mpôl, kônh wa ndrel hăn yŭr

“Săk gâp nơm lĕ du tơ̆ ŭch mham, n’hanh tâm rnăk wâl geh mê̆ ŭch tât mham jêng gĭt rnôk ŭch mham gay an nuĭh bên bah nơm ri uănh lăng dŭt n’hâm. Mô geh prăk dơi rwăt ăp dak mham kơt nĕ. n’hanh dŭt khlay lơn tay rnôk he hăn ntop mham, rgŏ jă yŭr mham n’hanh dơi ăp nuĭh wơt dơn nĕ lah du nău dŭt uĕh lăng”.

“Nar lam ƀon lan yŭr mham năm 2022” ta n’gor Kon Tum

Ta năm 56, wa Nguyễn Tấn Chờ, gŭ ta xă Quảng Tiến, nkuăl Cư M’gar lĕ âk tơ̆ râng yŭr mham. Wa Chờ an gĭt: Mham AB+ bah wa tâm rmôt mham mpêt jêng du đêt nuĭh ji dŭt ŭch. Wa dŭt răm rnôk ăp dak mham an lĕ kơl mât tay nău rêh an nuĭh ji.

“Tât aƀaơ gâp lĕ yŭr mham 44 tơ̆. Nkah gĭt hô ngăn nĕ lah rơh bôk năp tâm nău rêh gâp yŭr mham kơl nuĭh geh du hê băl. N’hanh bah kơi aơ tay lah yŭr an tiểu cầu kơl rêh an du mon 3 năm deh”.

Tĭng wa Y Wen Hwing, Groi kruanh UBND nkuăl Cư M’gar: Knơm ƀư uĕh trong kan nkoch trêng tât aƀaơ, kônh wa lĕ dơi wât mô khuch tât săk soan ma hôm rgop kơl rêh nuĭh ji.

“Bah năp đaơ nuĭh rnoi Êđê khân pơng dŭt klach yŭr mham. Yơn ma aƀaơ bah druh ndăm tât nuĭh ranh nuĭh Êđê lah êng n’hanh nsum mpôl 24 rnoi mpôl ndrel gŭ rêh ta nkuăl Cư M’gar gơih nđơr râng yŭr mham. Khân pơng yŭr mham dŭt âk tơ̆ n’hanh rnôk ntŭk tăng ŭch mham khân pơng râng yŭr mham dâl”.

Wa Nguyễn Đức Phú, Chánh văn phòng Ban rgŏ jă yŭr mham kơl nuĭh n’gor Dak Lak, an gĭt: Lah kơt năm 2003, lam n’gor knŭng rgŏ jă geh bơi 700 đơn vị mham ri tât aƀaơ rĭng du năm rgŏ jă geh rlău 22.000 đơn vị mham. Ăp đơn vị mham rgŏ jă lĕ ngăch kơl săm an âk nuĭh ji.

“Đah trong kan rgŏ jă yŭr mham nuĭh ƀon lan khân pơng dŭt n’hâm ŭch tâm pă ăp dak mham bah nơm an nuĭh ji. Gay nuĭh ji geh mham kơl săm ji. Lah nuĭh geh ăp nu nău mô tŏng mham ri Ban rgŏ jă yŭr mham n’gor lĕ geh trong gay câu lạc bộ yŭr mham nchrăp lor kơt: Đoàn khối ăp ngih pah kan n’gor, ngih sam ƀŭt Đại học Tây Nguyên, câu lạc bộ Huyết hồng bah công an n’gor, câu lạc bộ bah du đêt ngih sam ƀŭt khân pơng mbra yŭr mham gay an tŏng pă mham, kơl săm nuĭh”.

Ăp nuĭh ŭch êng ta Dak Lak râng yŭr mham ŭch êng.

Ntrong leo yŭr mham ta n’gor Dak Lak aƀaơ lĕ rêng hvi tât âk ntŭk ta lam n’gor. Ăp dak mham geh nkô̆ mô knŭng nsĭt tay nău rêh an âk nuĭh ji, ma hôm geh nău rŏng, nău tâm pă, tâm rgop jêng âk nău khlay uĕh.

Mhe rlău, Ban ntĭm rđău rgŏ jă yŭr mham nkual ƀon têh Pleiku, n’gor Gia Lai lĕ tâm rgop đah ăp ntŭk kan ƀư rgŏ jă yŭr mham rơh 1 năm 2022. Đah nău mbơh “Tâm pă dak mham gŭr-An du nău ŭch răm”, nar yŭr mham rơh aơ geh rlău 300 cán bộ, công chức, viên chức, nuĭh pah kan, đoàn viên, hội viên, tahen ăp rmôt vũ trang n’hanh nuĭh ƀon lan ta nkual ƀon têh Pleiku râng. Yuh Võ Thị Quỳnh Trâm, Groi Bí thư Đoàn phường Tây Sơn, nkual ƀon têh Pleiku, nkoch:

“Nar aơ rơh tal 12 yŭr mham bah gâp, gâp geh nău ŭch kơl dak mham aơ gay kơl nuĭh êng tâm nău jêr jŏt, jăch ndăn. Tă bah bôk nău kan yŭr mham ƀư rgŏ jă rơh 1 aơ jêh aơ mbra wăch rgum geh âk đoàn viên lơn tay kơt ăp nuĭh lŏng bôk tôr âk lơn tay. Tâm nu nău srê Covid-19 ri săk gâp nơm lor rnôk hăn yŭr mham lĕ uănh test covid-19 kơt đăp mpăn ăp trong ƀư 5K gay mô khuch tât nsum mpôl”.

Tâm khay 4 aơ, Ban ntĭm rđău rgŏ jă yŭr mham n’gor Kon Tum lĕ ƀư rgŏ jă “Nar lam ƀon lan yŭr mham ŭch êng năm 2022”. Ntoh ngơi ta nar ƀư rgŏ jă, Groi Kruanh UBND n’gor Kon Tum wa Y Ngọc đă ăp ngih pah kan, rmôt kan n’hanh nuĭh ƀon lan uănh mĭn jru lơn, dŭt n’hâm râng rƀŏng tĭng nkô̆ nău uĕh khlay yŭr mham kơl nuĭh. Jêh rgŏ jă, geh rlău 300 đơn vị mham dơi nuĭh ƀon lan n’gor Kon Tum an rgop “ntŭk mât prăp mham hăn ăp ntŭk” rhŏ an trong kan kơl n’hanh săm an nuĭh ji./.

          Nuĭh rblang: Y Sưng Phê Ja