Ta n'gor Gia Lai, tâm bah ri aơ nơh, trôk nar tât ndal, lĭn lơ duh nđik geh mbro tâm ăp nar ƀư rnoh âk kon se lăp nhih dak si săm ji geh tât trong n'hôr n'hâm hao âk ndal.  Mhe aơ, Nhih dak si kon se n'gor Gia Lai dơn lăp bah 300 – 400 tơ̆ nuĭh but săm/ nar geh tât ăp nău ji trong n'hôr n'hâm.

Ntơm bah bôk năm tât aƀaơ hŏ geh bơi 1000 kon se lăp nhih dak si tă bah ăp nău ji trong n'hôr n'hâm kơt: môr klơm soh, môr mơr dơ̆, ji hiăn..., hao âk rđĭl đah ndrel khay dja năm 2022. Tĭng Thạc sỹ, Bác sĩ Từ Thị Mai Linh - Groi Giám đốc Nhih dak si kon se n'gor Gia Lai, âk kon se ji tă bah me bơ̆ ŭanh lhơ jêng rnôk lăp nhih dak si hŏ ji môr klơm soh jru, kop duh hô, kruăt suan....Nhih dak si njrăng đă ăp rnăk ân njrăng ŭanh khlay tât trong n'hôr n'hâm n'hanh ji trong proch an kon se tâm rơh trôk nar kơt aƀaơ. Nkre, ân ơm năl saơ ăp nău  mpơl ji gay njŭn kon se tât ntŭk kan dak si năn ngăch.