VOV4.M’nông – Nar rlu Lễ Quốc khánh 2/9 jŏ 4 nar, dơh ƀư hao ăp nău geh ntưp chôt srê, rhoăt nău blău ơm bah rơh rlu lễ 30/4 mhe rlău, Thủ tướng Chính phủ lĕ geh công điện đă Kruanh UBND ăp n’gor, nkual ƀon têh tâm Trung ương mât uĕh nău kan đah nău rƀŏng lĕ rngôch yor n’hâm soan, nău rêh bah nuĭh ƀon lan; rgum tay ntĭm rđău, ƀĭt joet ƀư tĭng rjăp, geh săk rnglăy ăp trong njrăng n’gang srê ta ntŭk. Lơn lah, đah ăp ntŭk dôl tâm nar ƀư nkhah êng kon nuĭh, an n’hao ƀư tĭng rjăp, lôch bah nău nkhah êng kon nuĭh tĭng nuih n’hâm “nuĭh ntŭk gŭ ri gŭ ta nĕ”; mô dơi an geh ăp nuĭh rgum âk nuĭh, mô an nu nău nuĭh ƀon lan hăn trơn, hăn bah dih âk tâm rơh rlu lễ Quốc khánh 2/9; rmal rjăp tĭng pháp luật ăp nuĭh tih nău ntrŭnh mpeh njrăng n’gang srê. Ƀư uĕh trong kan đăp mpăn kon nuĭh, rnă njrăng đăp mpăn nău rêh jêng gay nuĭh ƀon lan njrăng, đăp mpăn râng ntop kơl trong kan njrăng n’gang srê. Mô an geh tăch proăt nău pă ndơ rêh jêng, đăp mpăn gĭt dak si bah ơm, bah ngai, bah ƀon lan tâm nar rlu lễ n’hanh ƀư tĭng groi nđôi kon nuĭh.

Nŭih rblang: Y Sưng Phê Ja