VOV4.M'nông: Tă khuch bah nuh srê covid19, âk doanh nghiệp, rnăk ƀư njêng, tăch rgâl ta n'gor Dak Lak ân ât rdâng đah âk jêr jŏt. Nău kan ƀư njêng tăch rgâl bah âk công ty, doanh nghiệp geh mbrơi nkai, roh hêng. Ngân hàng Nông nghiệp Phát triển Nông thôn gŭ kan ta Dak Lak (Agribank ta Dak Lak) lah ngoăy tâm ăp ngân hàng hŏ tĭng ƀư ntoch jong rnon, n'hŭch deh prăk kon an năch manh gay bah ir jêr jŏt. Yơn lah, ngân hàng ngih dak ân rgâl thông tư 03/2021 gay năch geh ndơ ma rdâk tay nău kan, hun hao ƀư njêng.

          Rnăk wa Nguyễn Thị Phơn, ta tổ 3 thị trấn Buôn Trấp, nkuâl Krông Ana geh 3 ha neh tăm tiêu, cà phê, sầu riêng, n'hanh 13ha neh tăm ba lŏ. Đah 13ha neh lŏ, ăp năm aơ wa Phơn dơn srih tăm du tơ̆ ba dơm, hôm ƀa ƀă păng tăm bum prŭm Nhật Bản. Đah trong ƀư tuch tăm dja, nsĭt geh wăng sa âk rlău bar tơ̆ rđĭl đah tăm 2 tơ̆ ba kơt ntơm nơh. Aƀaơ wa Phơn dôl rnon Ngân hàng Nông nghiệp n'hanh Phát triển Nông thôn 2 rmen prăk, rnoh prăk dja lơn âk dŏng gay rvăt ntil n'hanh phân poh an tơm tăm. Năm aơ rnoh khlay phân poh hao, geh ntil kơt phân đạm u-rê hŏ hao rlău 2 tơ̆ rđĭl đah năm e nơh. Ndrĭ ndơ geh ƀư tuch tăm jŭr thuk n'hanh jêr tăch. Wa Phơn an gĭt: rnăk hŏ dơi ngân hàng mbơh n'hŭch 10% deh prăk kon tă bah khuch nuh srê Covid - 19. Tĭng wa Phơn, ƀư tuch tăm tĭng rnoh âk hvi an geh ndơ tăch tâm rơh dja lah dŭt jêr jŏt.

          “Manh nuĭh kan lah mô dơi rgum âk nuĭh. Ma aƀaơ ri lŏ mir ri rnăk gâp geh ƀư đŏng yơn ƀư mô âk. Geh rnôk manh đă bu kan hao tât pe, puăn jât nuĭh du tơ̆. Nuh srê kơt nê̆ ƀư jêr jŏt an nuĭh kan rnôk hăn kan ri mô an rgum âk nuĭh, tă klach mpeh nuh srê đŏng".

          Mhe aơ ta nkuâl Krông Ana, n'gor Dak Lak tĭng ƀư an gŭ srang ngai êng lam rêh jêng kon nuĭh tĭng nău ntrŭnh mbrô 15. Ăp rnăk tăch rgâl, ntŭk kan ƀư njêng dâk gâng, nuĭh mô geh nău kan. Âk rnăk mbăk anh jâk oh kon hăn nti ntŭk êng rsŭn sĭt der nuh srê. Ndrĭ yơn 60 nuĭh kan bah Công ty TNHH ƀư njêng rhŏ dŏng Nam Hà, xã Ea Bông, nkuâl Krông Ana hôm geh nău kan đŏng. Wa Trần Văn Thương, giám đốc công ty an gĭt: prăk khay bah ăp nuĭh kan hôm geh ntơm bah 10 tât 11 rkeh prăk ăp khay. Yơn khay 8 mhe aơ, tă bah ăp ntŭk ƀư rdâk njêng manh rlu kan jêng Công ty Nam Hà bưm rlău 1 rkeh n'gul mblâm gạch. Jêr jŏt, phăn rnon ntoh bah năp măt. Mât rnoh kan n'hanh đăp mpăn prăk khay năn ngăch an nuĭh kan tâm rnôk dja lah dŭt jêr nkra.  

         “Gâp manh ngân hàng đah rnoh prăk âk. Ngân hàng geh an rong dơh, hŏ hŭch an doanh nghiệp du gâl deh prăk kon hôm. Yơn aƀaơ doanh nghiệp hôm jêr jŏt tay đŏng mpeh nkô̆ nău trok rnon, ri ngân hàng mĭn uănh tay mbra njong tay, mô lah hŭch đêt du gâl deh prăk kon an doanh nghiệp mât tay nău kan gay đăp mpăn nta joi geh nău kan an oh nô nuĭh kan”.

          Công ty TNHH Ntuh kơl tăch rgâl Thông Phát bah ur sai wa Đinh Văn Kháng geh du khách sạn ta trong Hùng Vương, nkual ƀon têh Buôn Ma Thuột. Ntơm nơh năch bah ăp ntŭk tât âk mpưm. Yơn ăp khay aơ khách sạn hôm bar pe nuĭh kâp njrăng ta mpông dơm. Wa Kháng rnê dŭt âk nău kan n'hŭch rnoh khlay deh prăk kon bah Ngân hàng Nông nghiệp n'hanh Phát triển Nông thôn ta Hoà Thắng, ntŭk păng dôl rnon 6 rmen prăk.

         “Ntơm bah rnôk nuh srê ri đah doanh nghiệp khách sạn ri rnoh năch tât bah ăp n'gor bu sĭt đêt, jêng mpeh nău kan tăch rgâl dŭt jêr jŏt yor rnoh năch kơt lah mô geh. Mpeh ngân hàng hŏ an rong dơh dŭt uĕh. Ri ngân hàng geh mbơh an doanh nghiệp lah dơi n'hŭch deh prăk kon 10% tâm lĕ rngôch rnoh manh".

Wa Vương Hồng Lĩnh, Giám đốc Ngân hàng nông nghiệp Phát triển Nông thôn gŭ kan ta Dak Lak an gĭt: rnôk aƀaơ ngân hàng hŏ rgâl deh prăk kon an rlău 50 rbăn năch manh đah n'gluh an geh manh 12.400 rmen prăk, hŭch 10% an manh ta lĕ rngôch ăp nău tâm ton. Rlău ma nê ngân hàng hôm ntêm an 30 rbăn rmen prăk manh an ăp năch lah doanh nghiệp dah găp n'hanh jê̆ đah rnoh deh prăk kon 7%/năm. Tâm bah ri aơ pah kan đăp mpăn lam rêh jêng kon nuĭh dơi ngân hàng an ƀư ngăn ngăn, hŏ ntop kơl n'gâng kan rlău 5 rmen 400 rkeh prăk, tâm nê ntop kơl nhih dak si nkual ƀon têh Buôn Ma Thuột 1 bôk ndeh rdeng nuĭh ji, n'hanh ăp ndơ ntrŭp dŏng kan dak si rnoh khlay 2 rmen 950 rkeh prăk.

Gay kơl năch tât đah tơm prăk kơl du trong kloh rvah, nsĭt tay nău dơi geh ngăn ngăn, wa Vương Hồng Lĩnh dăn đă:

         “Tâm rnôk an ƀư trong ntop kơl năch manh ri Agribank gŭ kan ta Dak Lak hŏ geh du đêt kol khan, nê lah: Ntrŏng năl dơi rnoh năch geh tât khuch covid-19 gay nsing ntŭk n'hŭch deh prăk kon, prăk nkhôm, mât kơt ơm rmôt rnon an năch ri dôl lah wĭ wĕ, mô tŏng geh ntŭk nsing an năl di. Tâl bar, rnon mô dơi ôp sŏk bah Agribank gŭ kan ta Dak Lak mbra hao âk tay, tă bah tơm ndơ năch manh geh tât khuch bah Covid-19. Nău dăn đă bah Agribank gŭ kan ta Dak Lak lah: Ngân hàng Ngih dak mĭn uănh ntoch jong mông nar dăp rgum tay an năch gay droh rklaih an năch trok rnon bah ir jêr jŏt lơn, du trong dơh lơn; tâl bar đŏng lah mĭn uănh, rgâl thông tư 03 năm 2021 bah ngân hàng ngih dak mpeh mĭn uănh ăp rnoh prăk n'gluh an manh bah kơi nar 10/6/2020 an năch manh, gay an năch geh tay ndơ ma rdâk tay nău kan tăch rgâl geh nău tam lơn"./.

Nuĭh rblang: Điểu Thân