Tâm khay rlu nti, ndrel đah pâl rlưn, druh ndăm rchong kon se jê̆ ăp rnoi mpôl đê̆ ta Dak Lak dơi râng âk nău kan kơt tŭr chĭng goh gong, rklă nău mprĭng mô lah tâm dâl ngơi ma nău dak bah dih. Ăp nău rlău dơi dja kơl ăp kon se geh nar rlu dŭt uĕh mƀak n’hanh đăp mpăn lor rnôk lăp tâm năm nti mhe.

 Tâm khay 7 mhe aơ, ăp ôi nar ngoăy, nar pe, nar prăm ăp pơh, bơi 30 kon se nti tiểu học n’hanh trung học cơ sở rgum ta jay rot bah ama Jiwon, ta buôn Akŏ Dhông, nkual ƀon têh Buôn Ma Thuột, n’gor Dak Lak. Ta aơ geh 2 jrô nti dơm tiếng Anh tă bah ăp sinh viên râng  kơl êng bah n’gor pơk tâm khay rlu nti. Râng jrô nti ăp kon se dơi nkah tay nău tă nti n’hanh tâm dâl nău ngơi tiếng Anh ma ăp nău pâl rlưn, mpât mprơ. Oh Đỗ Thanh Nhã Byă (10 năm deh), ta buôn Akŏ Dhông rhơn nđơr:

“Gâp dơi nti jrô tiếng Anh tă bah ăp yuh nô sinh viên ntĭm. Gâp saơ dŭt uĕh an he. N’hanh tâm khay rlu nti dja gâp hôm kơt nti tay âk ntil đŏng, lơn lah gâp mpŏng mbra blău ăp ntil nău ngơi n’hanh gâp mbra kơt nti dơi trong tâm dâl nău đah ăp nuĭh wăr kiău ma, mô lah nuĭh dak bah dih”.

 Hôm đah oh H Da Rin Ênuôl (15 năm deh) ta buôn Alê B, phường Ea Tam, nkual ƀon têh Buôn Ma Thuột, ăp nar rlu nti lơn ma rhơn mƀak rnôk oh dơi mâp đah văn hóa Rđe ma jrô nti múa xoang tă bah Ntŭk rgum kan nkoch trêng nău lư, Văn hóa n’hanh Thể thao nkual ƀon têh Buôn Ma Thuột ƀư. H Da Rin an gĭt: tâm 1 khay aơ, oh n’hanh ăp băl dơi joi gĭt mpeh nău way ơm lễ hội bah nuĭh Rđe, ăp nău way, ăp nău kan dŏng múa xoang n’hanh ăp nău múa xoang tơm. Bah nê kơl oh gĭt wât lơn n’hanh rŏng văn hóa rnoi nuĭh.

“Gâp hŏ kơt nti tay âk ntil lơn mpeh văn hóa bah rnoi nuĭh he nơm. Gâp gĭt tay âk păk ti múa n’hanh mbra nkre đah nău kơt nti bah ăp nai ntĭm, biên đạo njêng luh âk nău  múa n’hanh mbra trêng nti tay an ăp oh bah kơi tay. Ntơm bah nểi tâm  ăp lễ hội mô lah geh rnôk nê nơh tâm ƀon, tâm phường ƀư ri mpôl hên dŭt nsing nơm nchreng an uănh bah năp ăp nuĭh”.

Du nău kan êng wăch rgum  nău tât râng bah âk kon se  rnoi mpôl đê̆  ta Dak  Lak  rnôk ăp tât khay rlu nti đŏng. Nê lah “Ntŭk kơi năp nti rklă văn học nghệ thuật” tă bah  Hội Văn học Nghệ thuật Dak Lak ƀư. Năm aơ,  nău kan  dja geh bơi 40 kon se nti râng. Aơ  lah ăp kon se nti dơi sơch bah ăp rơh tâm rlong kon se nti blău, tâm rlong nchih siƀŭt njuăl lam ntŭr neh (UPU), ăp kon se nti geh nău blău ta 24 nhih nti THCS n’hanh THPT tâm n’gor.

Ndrel đah  nău  dơi  ăp nhà văn, nhà thơ, họa sĩ ntĭm nti nchih rklă ăp ntil văn học, hội họa, ăp kon se nti hôm dơi hăn ngăn ngăn n’hanh tâm nđŭr đah ăp tahen n’har bri;  joi gĭt văn hóa bri, văn hóa rveh ta bri mât Yok Đôn; tâm nđŭr đah ăp kon se jê̆ ta nkual n’har bri; rlong saơ ngăn ta Jrô kan Cảnh sát njrăng n’gang puh n’hât ŭnh sa n’hanh kơl nuĭh geh nău tât, Công an n’gor Dak Lak… Bah nê, kơl  ăp  kon se nti bun dăp nău mĭn, rgum geh nău lư an  nău nchih rklă nău mprĭng mprơ n’hanh vẽ rup. Oh Bế Thị Thu Uyên (13 năm deh, rnoi Tày) ta xã Ea Hđing, nkuâl Cư Mgar nkoch, ăp  nar râng ntŭk kơi năp nti kơl  ăp kon se geh ăp nău rlong saơ mhe,  ntơm bah nê geh tay nău uănh khlay n’hanh nkah gĭt ăp ntil săk nơm dôl geh.

“Mpôl hên hŏ dơi rlong saơ dŭt âk nău kan, ntĭt kơt joi gĭt Bảo tàng Thế giới cà phê, Bảo tàng Ama H’Mai, tât ntŭk n’har bri Việt Nam - Campuchia, Pôih  n’har bri Bô Heng n’hanh dŭt âk nău  kan êng đŏng. Tâm nê gâp dŭt nkah uĕh n’hanh  hăn tât Pôih n’har bri Bô Heng n’hanh ti but tâm  n’gâng ntăm n’har bri Việt Nam - Campuchia. Aơ lah lor bôk năp ma gâp dơi chuat jâng hăn tât n’har bri, dơi ti pah  tâm  n’gâng ntăm n’har bri  ri gâp  saơ  nuih n’hâm dŭt mha êng an gâp”.

Wa Niê Thanh Mai, Kruanh Hội Văn học Nghệ thuật Dak Lak uănh năl, bol mông nar hăn uănh saơ mô âk yơn ăp kon se hŏ mpơl dơi nău mât uănh khlay, nđơr đah ăp nău kan. Lôch ăp năm, bôk nău kan way geh nău rgâl, mô lâp tay gay ăp nkưp gŭ nchih rklă bah kon se nti way saơ uĕh mhe, kơp lĕ ma  ăp kon se hŏ tă râng.

“Mpôl hên saơ lah ăp kon se dŭt n’hâm  ŭch rnôk dơi djăt ăp kônh rblang gĭt mpeh ăp nău way ơm văn hóa ăp rnoi nuĭh mpeh lịch sử, ăp kon se nchih nkah n’hanh dŭt rgum uănh. Ntơm bah ăp ntil nău dŭt jê̆ kơt dâk hăn, ăp rơh tâm mâp đah ăp kônh tahen, ăp kônh cảnh sát njrăng n’gang puh n’hât ŭnh sa, ăp nuĭh dôl  rong an lĕ du bông nău rêh  n’hanh săk druh ndăm bah he gay n’groh an n’hanh rgop an ƀon tơm”.

Wa Mai Văn Chuyền, ta xã Ea Mdroh, nkuâl Cư Mgar, geh kon hăn râng rlong uănh an lah, ăp nău kan hŏ nsĭt tay nău nsrôih uĕh. Lôch ăp nău kan, păng saơ kon he hŏ geh ăp nău rgâl uĕh, jêng brât nănh lơn, nsing nơm lơn n’hanh lor ôp dâl nău ngơi đah ăp nuĭh wăr kiău ma âk lơn.

“Tâm rnôk mon râng n’hanh rnôk plơ̆ sĭt jay ri saơ mon blău lơn, geh nău mblău ôp dâl ngơi, gŭ dâk geh âk nău rgâl uĕh. Uănh nău tâm dâl n’hanh tâm ôp đah mpôl tơm leo ƀư rnôk râng ta rmôt Zalo ri saơ lah mpôl tơm leo ƀư n’hanh ăp nai ntĭm nti dŭt ndê na nê̆ jêng geh ring tam uĕh tât ăp oh mon. Nê  lah du trong rlong gĭt dŭt uĕh an  mon tâm rơh khay rlu nti”.

Khay rlu nti dôl mbrơi mpôch dŭt tay, yơn đah ăp kon se rnoi mpôl đê̆ ta Dak Lak, ăp tơ̆ rlong văn hóa hŏ pơk luh trong geh joi gĭt âk lơn mpeh rup uĕh êng bah ăp rnoi nuĭh. Bah nê bun dăp tay ta ăp kon se nău rŏng đah văn hóa, mât nuih n’hâm, gay rơh khay rlu nti geh âk tay nău uĕh, blău./.