Wa Lơ Mu K’Poh (nuĭh K’Ho Cil) rlău 70 năm deh, ta thôn Srê Đăng, xă Tân Hội, n’gor Lâm Đồng an gĭt: ƀư brah moh săk an kon se mhe deh lah nău way ơm dŭt khlay. Aơ lah di ƀư nău răm rnăk wâl, mbơh an ƀon lan, oh nô gĭt mpeh du hê nuĭh mhe:

Jêh rnôk ŏk r’ah n’hanh jêr jŏt jâk ndŭl deh ji, tât nar mê̆ deh, jêh nĕ rnăk wâl ƀư moh săk tĭng nău way ơm bah rnoi mpôl đêt mpôl hên.. Mpŏng ŭch bah kơi aơ kon se dơi ngăch dăng, têh jêng du hê nuĭh uĕh, kơt tĭng me bơ̆.

Rnôk oh bê deh nklăp du pơh, rnăk wâl ƀư moh săk. Lah nău rêh rnăk wâl mô geh ndơ ƀư sông sa, ri khân pơng ƀư ntĭt mpơl gay oh bê dơi moh săk. Lor rnôk ƀư, rnăk wâl jă ăp bu ranh ƀon, nuĭh nsing nơm, mô lah nuĭh kônh tâm jrŏng rnoi tât ƀư brah. Wa Liêng Hót Ha Kliêng (nuĭh K’Ho Cil) ta thôn Srê Đăng, xă Tân Hội, n’gor Lâm Đồng an gĭt, ndơ ƀư n’hanh dông piăng ƀư moh săk bah nuĭh K’Ho tĭng tâm nău geh ăp rnăk wâl.

Geh sŭr, geh djăr ri gŭch sŭr gŭch djăr; đah mpŏng ŭch oh bê mô geh kop ji, mô geh rluk mâl tâm nău rêh, mbra uĕh lăng n’hanh geh nău lap. Jêh nĕ ntoh măt rnăk wâl jă ăp nuĭh têh pah ty bôk kleng n’hanh dăn an oh dơi đăp mpăn, đah nău mpŏng ŭch oh bê dêr nău m’hik, ƀư ôh tâm rnglăp. Bah kơi aơ, rnôk têh geh nău rêh uĕh, rgop ndâk njêng ƀon lan; nĕ lah nău khlay ngăn bah ƀư moh săk aơ bah rnoi nuĭh K’Ho mpôl hên.

Săk bah nuĭh K’Ho Cil geh nkô̆ nău têh, geh nău boăt nthoi bah jrong rnoi n’hanh nkual gŭ âm bah nsum mpôl. Yor nê, lor rnôk ƀư moh săk, rnăk wâl ôp ăp nuĭh wât mpeh tu tơm jrŏng rnoi, ăp nuĭh ranh, nuĭh nsing nơm tâm rnăk wâl, gay săch an tâm di. Đah K’Ho Cil ta Tân Hội, way kuăl oh bu ur ri mbra moh K’Jiêng, K’Ba; lah oh bu klô ri mbra moh Ha Liang, Ha Kră, Ha Ôñ... Wa Liêng Hót Ha Kliêng an gĭt, nĕ ăp săk tĭng đah nău nuĭh ntoh lư bah kăl e bah jrŏng rnoi, rnôk dơi nkah tât tâm ntŭk gŭ rêh, nuĭh K’Ho Cil dŭt ntô̆ n’hao.

Tĭng nău way bah rnoi mpôl đêt mpôl hên gay moh săk an oh bê ri an săch săk ăp nuĭh bu klô geh nuih n’hâm ŭch ƀon lan, geh soan ndâk njêng ƀon lan mư sŏk săk gay moh an kon. Hôm ăp nuĭh n’glơi an nău mô uĕh ri mô an moh săk nơm. Nuĭh bu ur kơt nĕ đŏng, nuĭh bu ur n’glơi an nău uĕh ri mư sŏk moh săk an kon. Kơt lah wa K’Huệ, K’Ba, wa Ha Liang, Ha Kră... nĕ lah ăp săk gay rnăk wâl săch n’hanh moh an kon nơm, yor khân pơng geh nuĭh n’hâm tâm rŏng, gĭt tâm kơl tâm mât n’hanh rgop soan ndâk njêng n’hanh mât njrăng ƀon lan.

Dơi lah, ƀư moh săk bah nuĭh K’Ho Cil ta Lâm Đồng mô knŭng êng lah du nău ƀư văn hóa, ma hôm lah nău mbơh nkah ntĭnh ăp rơh ryơk tu tơm, mât nău way uĕh bah u che. Tă bah tĭng săk moh, nău rŏng bah rnăk wâl, nău mpŏng kâp đah du nău rêh đăp mpăn, ngăch dăng, wât n’hanh tâm rnglăp dơi njuăl tât oh bê. Đah nău rêh mhe, ƀư moh săk mât nău khlay êng, boăt nthoi lĕ rlău-aƀaơ hin-rgŏ năp, mât rong huêng n’hanh nău uĕh bah rnoi nuĭh K’Ho Cil.