Ndăn dŏng công nghệ mbrô tâm mât ndray drăp ndơ ơm yău ntlơi an tay, nkơnh n’hơ ndơ geh ƀư n’hanh buăt nthoi pâl nđaih, Dak Lak dôl tĭng kơn njêng rgâl mhe tâm trong tât văn hóa. Ma ăp ndơ pơk mbrô, ntŭk gŭ rêh văn hóa way ơm dơi pơk hvi tât dăch lơn đah nsum mpôl, rgop rgâl mhe pah kan nkơnh n’hơ n’hanh ntrŭt ntrôl pâl nđaih hun hao.

Nklang khay 1 mhe aơ, UBND phường Ea Kao, n’gor Dak Lak ƀư nar livestream đah nkô̆ “Buôn Tơng Jŭ, Ea Kao dăn wơt mbah”, pơk sŏng dăng ta ăp jâng nsing mạng xã hội kơt Facebook, Zalo OA, TikTok. Tâm rlău du mông, rup uĕh bri dak, ntŭk gŭ rêh văn hóa n’hanh nău rêh nău kan, tuch tăm bah nuĭh Rđe dơi nkoch mbơh na nê̆ tât âk mpưm nuĭh djăt uănh.

Tĭng wa Trần Công Hữu, Groi kruanh UBND phường Ea Kao, trong ƀư dja mô dơn jêng ngăn ngăn Nghị quyết 57 ma hôm njêng jâng rgâl dăng tâm nău mĭn nkơnh n’hơ n’hanh tăch ndơ geh ƀư ta ntŭk.

“Nar ƀư live stream geh nău ƀư têk ndrêng hợp tác xã cheh tanh Tơng Bông lah êng n’hanh ăp doanh nghiệp ta phường lah nsum hun hao wăng sa mbrô tâm let năp tay. Nar ƀư mô dơn nkoch mbơh ăp rnoh khlay way ơm, ntŭk gŭ rêh, pah kan jan sa mir ba bah nuĭh Rđe ma hôm rgop ntrŭt ntrôl tăch ndơ geh ƀư ta ntŭk, nkre đah hun hao wăng sa đah mât ndray săk tơm văn hóa. Ma trong ƀư live stream dja, mpôl hên ŭch rŏng nsĭt tât ăp nău rlong saơ dăch dêh, n’grêh rêh n’hanh âk nău rhơn”.

Ndrel đah ndơ geh ƀư ma ti, nar livestream hôm nkoch mbơh ndơ sa way ơm n’hanh trong leo pâl nđaih buôn Tơng Jŭ. Đah trong leo ƀư dja, năch mbra hăn uănh pâl ƀon lan, joi gĭt nău kan way ơm, rlong kah ndơ sa, rlong saơ nău rêh, gŭ âm dâm n’guy ndrel nuĭh ƀon lan.

Wa H Yam B.Krông, kruanh rmôt pâl nđaih buôn Tơng Jŭ, phường Ea Kao, n’gor Dak Lak nkoch:

“Râng pâl nđaih kônh wa mbra ƀư âk ntil nău kan, ntĭt kơt tăm biăp, mât rong, tuch tăm, ăp ndơ geh ƀư bah kônh wa dơi tăch ta ntŭk he gŭ rêh dĭl, nê lah nău dŭt di ma rhơn. Jêng rnôk pâl nđaih hun hao ta phường Ea Kao ri săk gâp nơm ndrel đah kônh wa dŭt rhơn, gay geh trong rƀŏng rgâl geh nău rêh ăp nar bah he hun hao lơn. Bah meng nê lah ndrel mât ndray văn hóa bah n’gor”.

Ndrel đah ăp trong ntĭt leo tâm dâng, rgâl mbrô tâm trong kan văn hóa dôl dơi n’gor Dak Lak an ƀư ăp kôp. Ta Bảo tàng Dak Lak, Groi Giám đốc Trần Quang Năm, an gĭt, nău dŏng công nghệ mbrô hŏ ntik n’hao nău tam tâm pah kan rgum joi, tâm pă ntil n’hanh sơch ndơ nha hôm mât ndray, siƀŭt ơm rhŏ dŏng ăp way nkô̆ pla n’hơ. Nkre rgop n’hao săk tam rhŏ dŏng năch uănh pâl.

“Bảo tàng hŏ dŏng keh mbrô mpơl săk ndơ mât prăp, keh mbrô ăp nău way, lễ hội way ơm bah ăp rnoi nuĭh ta n’gor. Dŏng ăp công nghệ AR, VR gay geh nău tâm dâl, rlong uănh saơ đah năch hăn pâl nđaih đah ăp rnoh khlay drăp ndơ ơm yău ntlơi an tay văn hóa way ơm bah n’gor Dak Lak”.

Tât aƀaơ, nsing ta rnoh rgum nchih mbrô rhŏ dŏng an mbơh rblang êng hŏ dơi rdâk ta 3 ntŭk têl ơm yău gưl neh dak ta n’gor Dak Lak, lah Jay nkông krŭng Buôn Ma Thuột, Biệt điện Bảo Đại n’hanh Đình Lạc Giao. Công nghệ thông tin dơi dŏng tâm ban kơt du ntlơi ndơ kan tơm khlay tâm nkơnh n’hơ văn hóa nkre đah pâl nđaih đŏng. Nkô̆ nkoch trêng dơi âk ntil ta ăp ndơ dŏng pơk mbrô, kơl pơk hvi nău dơi tât bah lam nuĭh, wa Trần Hồng Tiến, Giám đốc Sở Văn hóa, Thể thao n’hanh Pâl nđaih n’gor Dak Lak, an gĭt:

“Mpôl hên hŏ pơk dŭt âk jrô kơi năp nti, dŏng công nghệ an cán bộ công chức tâm lam n’gâng kan tâm ban kơt an cán bộ công chức bah jrô văn hóa xã hội bah ăp xã, phường. Kan nsum đah ăp doanh nghiệp công nghệ, rdâk njêng trong nchrăp, an ƀư du đêt nkô̆ geh tât pah kan rgâl mbrô bah n’gâng kan, kơt dŏng mpeh rgâl mbrô tâm trong kan ndơ ơm yău ntlơi an tay, pâl nđaih, thể thao tâm ban kơt tâm ăp nău kan văn hóa”.

Rgâl mbrô dôl njêng tay ntŭk soih lhoi gay văn hóa mpơl kloh rvah lơn tâm nău rêh ngăn ăp nar ta Dak Lak. Bah nê rgop rêng lam rnoh khlay văn hóa, pơk luh trong hun hao joi geh trong rêh an nuĭh ƀon lan n’hanh rƀŏng trong hăn jŏ jong an pâl nđaih ta n’gor tâm rơh mhe.