Tâm tach tâm rlong ta thôn như Ngọc, xã Phước Hữu, n’gor Khánh Hoà, ma rhiăng bu ur druh, bu klô ndăm rnoi chăm tâm nah ao ueh bah rnoi nơm râng nau njroh mprơ tâm nau nteh gâr Paranưng ndrel mbuăt Saranai khuh n’gôr. Ăp nau njroh mprơ geh ndâk ƀư ueh ngăn, ndâk tay nau rêh, nau kan ndrel pah kan jan sa bah rnoi chăm, tă bah rup sah ba, thay lŏ, tanh njuh tât ăp nau njroh mprơ vay ơm geh âk ntil. Tâm rnglăp nsum âm ăp bu năch râng nar pâl rlưn, wa Đàng Thị Hơi, tâm xã Phước Hữu, n’gor Khánh Hoà, nkoch:

‘Nau rgum ƀư tâm năm aơ geh ƀư ntơm bah bôk ƀon tât dŭt ƀon ngăn, khuch răm ngăn. Dŭt n’hâm ueh m’ak, ăp nau njroh, nau mpơ kŏ ueh đŏng, ăp nŭih ƀon lan ndrel nŭih ndrel njroh mprơ ri n’or ngăn, dŭt gơih ueh tâm nau rhơn ƀư’.

Rija Nagar lah nau vay vơt năm mhe bah rnoi Chăm, đah ăp nau ơm ƀư dăn ân mih lăng prăng bri, mbo ba, tơm tăm chăt jêng ndrel nau rêh geh đăp mpăn ân ƀon lan. Ăp ƀon rnoi chăm ƀư nê kan jŏ tâm 2 nar đah ăp nau ƀư ôp brah vay ơm, yơn lah mông nar ƀư dơi êng êng ri ma nau ngêt sa jŏ nar geh tâm ƀon lan. Yuh Trần Thị Dung, bu năch tă bah Hà Nội, nkoch:

‘Gâp râng uănh âk nau ƀư lễ hội tâm ăp nkuăl neh, ntơm bah mpeh ba lơ lăp tâm nkuăl ba dâng, yơn aơ lah nau ƀư lễ hội bah rnoi chăm, ngăn lah păng dŭt n’hâm ueh, dŭt n’hâm êng ngăn. Nê lah nau kan bah nau tâm rnglăp bah rnoi mpôl, ryơk ăp nau ơm ueh bah nkuăl neh tâm aơ. Gâp saơ ŭch, ueh, nkah gĭt, rhơn rnôk geh râng tâm Lễ hội tâm nkuăl neh aơ”.

Lễ hội Rija Nagar hôm geh mât âk nau njroh mprơ ơm ueh bah rnoi chăm, ntơm âm nhạc, njroh ân tât ăp nau ôp brah vay ơm. Aơ lah ntŭk gay mât ăp nau ơm ueh ngăn ngên lŏ geh mât ndrel pă nau dơi ân ăp rơh ba kơi.

Groi Kruanh mpôl chroh, Lưu Sanh Thanh, xã Phước Hữu, n’gor Khánh Hoà mbơh:

‘Lễ hội năm aơ lah lơ 1 khay 1 tĭng lơ Chăm, tâm di lơ 16/4 dương lịch, kŏ lah nar nkah nar rklaih đăp mpăn n’gor Ninh Thuận (ơm), kônh wa ăp rnoi rhơn ngăn. Đảng ndrel Ngih dak rơh rlau aơ kơl an âk ngăn tât nau rêh bah kônh wa. Phung hên ŭch lễ hội Rija Nagar lŏ geh mât ân ueh, ƀư tĭng ân ueh ndrle ơm geh leo lăp tâm rnoh moh săk ndơ ơm yau mpơl săk gưl neh dak”.

Ăp nau nteh gâr Paranưng ndrel n’hôm Saranai ƀlông tâm ăp yan lễ hội, ndrel ma nau tâm rnglăp ƀon lan ndrel mât ăp nau ơm yau ueh bah rnoi chăm. Ndrel ntơm bah nau ƀư lễ hội ơm kơt Rija Nagar, nau ơm ueh bah rnoi chăm lŏ geh mât tay, trêng tay tâm nau rêh ƀon lan nar aơ./.