Tâm nar rƀŭn, âk nŭih ƀon lan ndrel bu năch geh pâl, uănh âk nau ueh ơm bah Tết Bunpimay kơt lah n’ŭm Phật, kât rse brai, bun choih, m’ơk kao tâm dak, tâm nsach dak dăn nau lap. Aơ lah ăp nau ƀư gay rƀŏng tât nau ƀư ân kloh săk jăn, dăn nau lap ndrel bun joi nau ueh lăng năm mhe.

Đah âk rnăk vâl nŭih Lào rêh jŏ jong ta Buôn Đôn, Tết vay ơm mô êng lah rnôk tâm mâp bah rnăk vâl ma hôm lah ntrong gay ma mât nau tâm tnhoi rjăp đah tu tơm nơm. Wa Khăm Bo Lào, tâm ƀon Trí, xã Buôn Đôn nkoch:

‘Nơm ôp brah ri ân kao, play, bánh kẹo ndrel du đê̆ ndơ ân ma ăp nŭih sư thầy gay dăn nau ueh n’hâm soan, ueh lăng ân lĕ ma rnăk vâl. Nơm kŏ hăn n’ŭm Phật gay ma dăn nau ueh lăng ân lĕ ma rnăk vâl ndrel kon sau đŏng”.

Êp nê, bu năch tât hôm geh rnglăp nsum tâm nau ƀư troh n’gôr, đah nau njroh Lăm Vông, njroh Chăm Pa, nau vơt bu druh năm mhe Nang Sangkhane, nau ƀư hăn tâm trong, râng ăp nau kan pâl n’aih ueh ma rveh, ndrel uănh ăp nau njroh mprơ ndrel nau ngêt sa kah ueh bah ăp rnoi mpôl. Yuh Hoàng Thuý Lư, tâm Phường Ea Kao, n’gor Dak Lak, mbơh:

‘Nar aơ geh tât tâm Buôn Đôn ndrel râng nar sa Tết bah rnoi Lào. Gâp saơ rhơn ngăn ndrel ntô̆ n’hao mpeh nau ơm yau bah rnoi mpôl nŭih Lào ta Buôn Đôn. Gâp saơ ŭch ngăn đah ăp nti nah ao ueh aơ, đah ăp nau kan ƀư sa Tết ta aơ ndrel gâp saơ rhơn rnôk geh râng nau ƀư nsach dak, ăp nŭih pâl dak m’ak ngăn ndrel dŭt n’hâm n’ơr”.

Buôn Đôn, tâm nau Lào nê lah “ƀon kâu”, lah ntŭk gŭ tă bah jŏ bah rhiăng rnăk vâl nŭih Việt tơm Lào ta Dak Lak.

Tĭng wa Nguyễn Cảnh Tùng, Kruanh UBND xã Buôn Đôn, jêh rnôk tâm rnglăp, lam xã geh 15 rnoi mpôl ndrel rêh, tâm nê geh rlau 400 nŭih tơm Lào. Nau kan mât nau sa Tết Bunpimay mô êng ŭch nau ơm yau ueh geh mât, tĭng nuih n’hâm bah nŭih ƀon lan ma hôm njêng ntŭk tâm n’ur, ƀư nâp nau tâm rnglăp, ntrŭt dăng hun hao văng sa, rêh jêng tâm ntŭk đŏng:

‘Nsum mpôl nŭih Lào ta aơ geh nklăp 400 nŭih rêh tâm xã Buôn Đôn. Aơ lah nau ơm ueh yau bah rnoi mpôl Lào dơi geh mât ƀư nâp hŏ geh tă bah jŏ hôm. Phung hên ăp năm hôm ƀư nau sa Tết ân nŭih Việt tơm Lào dôl rêh tâm xã gay njêng nau tâm rnglăp đahj ăp rnoi mpôl tâm ƀon lan, tâm kơl an, tâm kơl nsum tâm ntrong hun hao văng sa rêh jêng tâm xã Buôn Đôn hên”./.