Nklang dor yôk Trường Sơn, ăp nar n’gul khay puăn dja, hang rbăn nuĭh ƀon lan kâng n’har đah Kà Lừm, n’gor Sê Kông (Lào) grŭ gră hăn jâng tât xã Hùng Sơn, nkual ƀon têh Đà Nẵng gay wơt Tết Bunpimay. Nar Tết way ơm bah dak băl jêng rnôk gay nuĭh ƀon lan bar ding n’har bri tâm mâp, nkoch bri lô ka, bun dăp nău tâm rnglăp krêp dêh tâm ban kơt du rnăk wâl.

Nklang nar duh n’heng ntŭk  bri neh têh hvi Trường Sơn, bah ơm ôi rŭ, tĭng n’hoch nuĭh bah ăp ƀon lan mpeh nkuâl Kà Lừm, n’gor Sê Kông, Lào – nkual dăch n’har bri đah xã Hùng Sơn, nkual ƀon têh Đà Nẵng (nkuâl Tây Giang, n’gor Quảng Nam ơm) hŏ tâm kuăl nsum sĭt thôn A Tu 1, xã Hùng Sơn kơt hăn pâl rlưn. Tâm n’hoch nuĭh bah kăl ti n’har bri hăn tât, lĕ dĭng nuĭh nsoh bok ao dŭt uĕh mhe da dê.

Ăp nău gơm rum tum bem kơt nê ma mpơl bah muh măt ram nar sa da dê. Geh nuĭh hăn tĭng bu ranh, kon se jê̆. Geh  nuĭh anh nkre ndơ bah ƀon tơm…Wa Savandi rhơn nkoch, an gĭt bah xã Hùng Sơn ƀư Tết Bunpimay, kônh wa tâm ƀon lĕ dĭng nuĭh nđơr da dê, tâm jă hăn nsum.

“Ăp năm hăn tât Tết Bunpimay, kônh wa tâm ƀon mpŏng kâp ngăn…Hăn tât ta aơ lĕ dĭng nuĭh rhơn, răm đŏng. Aơ lah Tết bah he, ma ăp băl Việt Nam ƀư nchrăp ăp dăp ngăn, tâm ban kơt Tết way ơm bah khân păng nơm. Hăn tât ta aơ dơi mâp oh nô, dơi ngêt sa, pâl rlưn, Tết nsum…rhơn kơt Tết ta jay he nơm”.

Ta xã Hùng Sơn, ăp ndơ sa way ơm bah nuĭh Cơ Tu dơi nchrăp ăp dăp, đâng dơ lĕ ma  nuih n’hâm dêh bên năch bah nuĭh ƀon lan nkual yôk yang. wa Plong Rang, Bí thư Chi bộ thôn A Tu 1 rah rơch, lĕ dĭng nuĭh uănh aơ lah nău kan nsum bah ƀon, rgop êng suan, rgop êng nar.

“Rdâk nkưp, nchrăp sân khấu; rgŏ jă kônh wa tôch biăp, rôk bum gay gâm trău way ơm rhŏ dŏng an mpôl hăn tât râng Tết Lào. Ăp ndơ sa kah kơt sŭr, djăr, ka, mƀêt prung, bánh nke rpu dơi nchrăp gay wơt kônh wa dak băl Lào. Mông nar dŭt rhơn nđơr”.

Nar kêng dŭt pơh, hang rbăn nuĭh bah 5 ƀon nkuâl Kà Lừm, n’gor Sê Kông nsĭt nkre mông nar Tết Bunpimay khuh n’gôr lam ntŭk n’har bri Hùng Sơn. Nău gơm ngơi tâm rlŭ nsum đah nău nteh nhạc n’gloh nklang bri neh têh hvi. Ăp nău pâl rlưn way ơm kơt têk rse, ntrôl mâng, nsăt bao ƀô… ƀư khuh n’gôr, wăch rgum âk mpưm kônh wa bar ding n’har bri ndrel râng, ntroh n’gôr.

Ntŭk rgum tơm bah nar pâl lah rơh tăch ndơ Tết Bunpimay tâm rnglăp dêh bên n’har bri Việt – Lào. Ta nê, kônh wa mô dơn hăn dơm chợ ma hôm “wơt Tết” đah ndơ sa way ơm đŏng. Ăp nklâm ndơ ngăn ma răm mƀak kơt phe, mì tôm, ka khô, kho ao mhe… hôm lĕ ma kŭk, pel, ăp ndơ dŏng ăp nar, dơi ndơ̆ tât ti kônh wa kơt du nklâm ndơ Tết dêh rŏng.  

Đại tá Hoàng Văn Mẫn, Chính ủy Ban Chỉ huy Tahen n’har bri Đà Nẵng lah rjăp, ăp nklâm ndơ ngăn ngăn, ndơ dŏng nsum an ƀon lan, tât ăp nău kan văn hóa, thể thao… rƀŏng sĭt mpeh kônh wa nuĭh Lào tâm ban kơt rnăk wâl he nơm da dê.

“Tâm rnôk Tết Lào mô lah Tết Việt, mpôl hên ƀư gay kônh wa ndrel râng da dê; kônh wa Lào dơi geh nău rhơn rnôk ƀư Tết Việt, n’hanh kônh wa Việt dơi geh nău rhơn rnôk Tết Lào tât đŏng. Ăp năm mhe aơ, nău rŏng đah ƀon lan bar ding n’har bri, ăp mpôl mât njrăng n’har bri, n’gâng kan bar ding n’har bri lah dŭt krêp dêh, rgop gay rdâk njêng n’har bri tâm rnglăp, tâm boh.”

Nklang dor yôk Trường Sơn, Tết Bunpimay năm aơ hôm du tơ̆ tay đŏng nthoi dăch ăp njuat jâng bar ding n’har bri. Ăp mpang ti tâm ndơ̆ an, ăp nău gơm tâm mâp tay… nău way ngăn dơm ma răm nuih n’hâm./.