Ntŭk ƀư brah Kđăch Hùng dơi ƀư ta yôk prêh, ta thôn 6, xă n’har bri Dak Buk So, nkuăl Tuy Đức, n’gor Dak Nông. Ta năp nar Giỗ Tổ, kônh wa lĕ rgum nkra ntŭk ƀư brah: nuĭh mpêh klo mpir, nuĭh rwach răk mpêr n’gar, nuĭh dăp tay nsưng gŭ ta jay năch mhe ƀư. Wa Chử Anh Chương, nuĭh Ban tự quản ntŭk ƀư brah, an gĭt, lơ 10/3 âm lịch lah nar răm têh ta nkual neh n’har bri aơ đah ăp nuĭh ngai ƀon tơm Phú Thọ:

 Lĕ rngôch ăp nuĭh rƀŏng sĭt tu tơm, gĭt wât bah kônh wa he lah: “Bôl nuĭh hăn dâng sĭt lơ, nkah gĭt nar giỗ Tổ nar 10/3 ri sĭt”. Kônh wa geh nău lah kơt nĕ da dê. Mpôl hên ndâk ƀư jay ƀư brah aơ gay tâm rơh Giỗ Tổ 10-3 ri ƀư giỗ, hôm lăp ăp rơh dŭt năm ri ƀư mâp măt Hội đồng hương Phú Thọ, nkoch nău blău ơm ƀư sa, kỹ thuật ƀư mir, mât rong mô lah tăch tơr ndoh ndơ.

Ntŭk ƀư brah Kđăch Hùng ta thôn 6, xă Dak Buk So dơi ndâk ƀư ta neh hvi bơi 2.000 m2. Tâm nĕ, jay ƀư brah dơi ƀư tĭng rup gui cung đình ơm yău geh rnoh neh nklăp 40 mét vuông. Jay ƀư brah dơi ƀư rlău 7 dăp ntung gung, đah jâng gung wăr jay. Ta nklang an nsưng ƀư brah rnget rngăt, geh nuĭh mât uănh n’hanh huêng phan bah Kđăch Hùng. Rlău ma jay ƀư brah, kônh wa ndâk ƀư jay wơt năch, ntŭk pâl pah play, ntŭk ƀư njroh mprơ....

Wa Nguyễn Xuân Phúc, ta thôn 8, xă Dak Buk So, nkuăl Tuy Đức, an gĭt, bah rnôk sa nkra (năm 2018), ntŭk ƀư brah lĕ jêng ntŭk ƀư rƀŏng sĭt tu tơm, mât rƀăy n’hanh mât uĕh nău way ơm.

Tâm nar ngai ƀon, kônh wa hên ndâk njêng Hội đồng hương Phú Thọ, jêh nĕ rgop prăk rwăt neh n’hanh ƀư jay ƀư brah nkah gĭt ăp Kđăch Hùng n’hanh ntŭk ƀư rgum rƀŭn nsum mpôl. Mpôl hên mât nău way ơm cách mạng bah u che, ntĭm nti kon sau an gĭt wât rƀŏng tât tu tơm, geh đah nău kan Neh dak, nsrôih ndâk njêng ƀon tơm tal 2 ndrŏng uĕh.

Ta nkual n’har bri Dak Buk So, nklang nkuăl Tuy Đức, Ntŭk ƀư brah Kđăch Hùng lah ntŭk ƀư rgum rƀŭn nsum mpôl. Oh Thị Chí (nuĭh Bunong) ta ƀon Bu Ndrung, xă Dak Buk So an gĭt, oh tĭng chroh Bap, yơn ăp rơh Giỗ Tổ, tât mpoh su nhang nkah gĭt ăp Kđăch Hùng ta ntŭk ƀư brah n’hanh tâm nđŭr đah ăp nuĭh.

Ăp nar lễ Tết, Giỗ Tổ Hùng Vương ri gâp tât mpoh su nhang nkah gĭt ăp Kđăch Hùng. Knơm geh ntŭk ƀư brah, gâp n’hanh kônh wa tâm ƀon dơi tâm rnglăp, tâm rgâl văn hóa, njroh mprơ, pâl rlưn đah kônh wa ƀon tơm ta Phú Thọ lăp ta aơ ƀư mir jan ba n’hanh ăp nkual ƀon êng. Ăp nuĭh ndrel rêh dŭt tâm rnglăp.

Wa Ngô Văn Thương, Kruanh UBND xă Dak Buk So, mbơh, bah rnôk rnôk geh ntŭk ƀư brah, nar Giỗ Tổ Hùng Vương, lĕ jêng nar rgum ntŭk n’har bri:

Rơh Giỗ Tổ Hùng Vương, âk kônh wa tâm n’gor, nkuăl, xă n’hanh gưl ủy n’gâng kan ƀon lan tât mpoh su nhang da dê ăp Kđăch Hùng. Aơ lah nău uĕh văn hóa bah nuĭh ƀon lan ta ntŭk, lơn lah kônh wa nuĭh Phú Thọ gŭ rêh ta ntŭk. Mpôl hên lah xă n’har bri, geh âk rnoi nuĭh gŭ rêh, tă aơ rgop ndâk njêng nău tâm rnglăp lĕ rngôch rnoi nuĭh.

Nău ndâk ƀư ntŭk ƀư brah Kđăch Hùng bah kônh wa ƀon neh Yău ye ta Dak Buk So mô knŭng rgop mât ndrăy nău djăt tĭng, ma hôm mât uĕh nău way ơm cách mạng, nâp nâl nău tâm rnglăp đah ăp rnoi nuĭh ta n’har bri Tây Nguyên. Jay ƀư brah lĕ jêng ntŭk njuăl nău rŏng “ngêt dak kah gĭt tu dak” n’hanh rgop mât, ƀư uĕh ăp nău khlay văn hóa, nău ơm kăl e bah rnoi nuĭh Việt Nam tă bah ăp rơh.