Ngoăy tâm âk nău uĕh lah nău Khánh Hòa na nê̆ mbơh tu tơm mrô mpeh drăp ndơ yău văn hóa Chăm n’hanh mpla nsơ trực tuyến. Nău rgâl mrô kơl ăp nău khlay văn hóa Chăm rlet rlău luh ntŭk ntô mât prăp mô lah ntŭk ơm yău, rhŏ an mĭn njêng, ntĭm nti, mpla nsơ n’hanh boăt nthoi đah năch pâl nđaih tâm dak n’hanh lam ntŭr neh.

Tĭng ăp doanh nghiệp, nău kân jâng năch mô knŭng lah ntŭk ntô ma hôm lah ăp nău nkoch văn hóa bah kơi ăp drăp ndơ yău. Bah trong uănh aơ, văn hóa Chăm mô knŭng lah drăp ndơ an mât ndrăy ma dôl jêng nău dơh an ndâk njêng ăp ndơ pâl nđaih êng mha, geh âk nău blău ơm. Wa Alain Nguyễn, Tổng Giám đốc Nkual rlu rlău Hoàn Mỹ, n’gor Khánh Hoa nkoch:  “Ntuh kơl ta n’gor Khánh Hòa lĕ 10 năm, nar lơ mpôl hên saơ nău khlay, nău uĕh văn hóa Chăm kơl mpôl hên geh âk nău gay nkoch. Jêng, mpôl hên dŭt janh gay mpla nsơ văn hóa Chăm, tă bah nĕ, hun hap ăp ndơ pâl nđaih văn hóa ăp rnoi mpôl đêt. Mô di tât Việt Nam knŭng ŭm dak lêng, mô di knŭng geh sa lah dơi ôh ma an lah văn hóa gay bu mĭn joi, bu nkoch tay an kon sau bah bu”.

Ăp nuĭh way kan năl lah, rgâl mrô dôl pơk luh dơi ndơ̆ drăp ndơ văn hóa Chăm tât êp lơn đah năch pâl nđaih tă bah ăp tu tơm mrô n’hanh công nghệ tâm kơl mhe. Yơn lah, gay wăch rgum năch geh ŭch uănh joi văn hóa jru, rgâl mrô an hăn ndrel n’hao uĕh nuĭh kan. Rmôt nuĭh ntĭm trong, nuĭh ƀư pâl nđaih n’hanh yor nsum mpôl ƀư drăp ndơ yău an dơi năp nău wât, nău blău gay mbơh trêng di jru hvi văn hóa tât năch pâl nđaih.

Groi Giáo sư, Tiễn sĩ Ngô Văn Danh, tă ƀư Hội đồng drăp ndơ văn hóa ngih dak năl lah: “Nâp nâl kỹ thuật ri dŭt uĕh hôm, dơh an mpla nsơ, dŭt uĕh, ngăch. Ndrĭ yơn khlay lah an dơi wât ăp nău khlay văn hóa, nău wât đêt ri knŭng lah nsum nsum dơm. Ngăn lah năch dak bah dih, rnôk khân pơng hăn ta aơ, nău nti nsơm năch pâl nđaih lĕ êng, mô knŭng hăn pâl dơm, khân pơng hôm geh nti rlău lĕ nuĭh ntĭm trong”.

Bah meng nău n’hao uĕh ndơ pâl nđaih văn hóa, nău pơk hvi ntŭk năch dak bah dih đah ăp ndơ ƀư êng an dơi geh nău uănh âk lơn. Du trong hăn mhe dơi uănh tât lah hun hao pâl nđaih Halal hăn ndrel đah văn hóa Hồi giáo Chăm.

Tĭng ăp nuĭh mĭn njêng, ndrel đah nău hao âk rnoh năch tât bah Trung Đông n’hanh ăp dak Hồi giáo, nău ndâk ƀư ăp nău rhŏ tâm di Halal tâm rgop joi ƀư nău uĕh văn hóa Chăm mbra pơk tay năuy rmeh neh ntu hun hao nău kan pâl nđaih. Nô Huỳnh Thanh Tâm, Hội Dân tộc học n’hanh Nhân học Nkual ƀon têh Hồ Chí Minh rblang: “Bôl, nsum mpôl nuĭh Hồi giáo ta nkual ƀon têh Hồ Chsi Minh mô âk yơn aơ lah ntŭk wăng sa bôk năp bah lam dak, dôl wăch rgum nuĭh ntuh kơl, năch bah Trung Đông dơi dŏng ăp nău rhŏ pâl nđaih Halal, hăn ndrel đah văn hóa Hồi giáo Chăm ta nkual ƀon têh Hồ Chí Minh”.

Đah Khánh Hòa-ntŭk dŏng âk tháp Chăm ntoh lư ndrel nsum mpôl nuĭh Chăm gŭ rêh jŏ năm-mât ndrăy drăp ndơ yău hăn ndrel đah ƀư tơm bah nsum mpôl. Wa Thái Thị Lệ Hằng, Giám đốc N’gâng kan Văn hóa, Thể thao n’hanh Pâl nđaih n’gor Khánh Hòa an lah, rnôk nuĭh ƀon lan na nê̆ râng mât rƀăy n’hanh mât na nao nău khlay văn hóa, drăp ndơ yău mô knŭng dơi mât rƀăy ma hôm geh joi nău rêh nâp nâl tă bah hun hao pâl nđaih. “Ndơ lơh he mô mât ndrăy, mô mât na nao ăp nău khlay văn hóa gay rnôk năch tât Khánh Hòa bu mbra ntăm ntŭk ta aơ geh nsum mpôl rnoi nuĭh Chăm, geh âk nău uĕh rnoi mpôl đêt, geh âk ndơ pâl nđaih uĕh gay ƀư ngăn?. Tă bah nĕ, ntĭm nti nău khlay way ơm, ăp nău ƀư văn hóa geh roh dơi mât ndrăy tay”.

Dơi saơ, tâm rach năm mrô, mât rƀăy văn hóa Chăm mô hôm knŭng lah mât ndrăy ăp nău khlay bah lĕ rlău ma geh tay soan rêh mhe an drăp ndơ yău. Rnôk công nghệ, nău gĭt blău n’hanh nsum mpôl hăn ndrel, văn hóa Chăm mbra mô knŭng dơi mât ndrăy ma hôm jêng tơm prăk hun hao pâl nđaih, rgop ndâk njêng nău kan công nghiệp văn hóa n’hanh mpla nsơ rup ndah Việt Nam hăn luh lam ntŭr neh./.