Tâm jay nhih way ơm, nteh chĭng n’gŭr răm. Ăp nău nteh dơi ăp nghệ nhân djăt, an nkra gay săch nău nthe uĕh geh bah tĭng păng chĭng. Tâm bôr chĭng nĕ geh du bôr chĭng yău ma rnăk wâl wa Siu Chơt (Ơi Rốp), ta ƀon Suối Cẩm, xă Cư Đrăng, n’gor Gia Lai lĕ mât âk rơh kơt du drăp yău. Wa Siu Chơt nkoch: Du păng chĭng geh têh jêt, nău nteh n’hanh moh săk êng, rnôk tŭr geh nău ntil nău nglăp ndrel, boăt nthoi nău blău tŭr ndrel nău wât way ơm dơi mât ndrăy bah jŏ năm. “Aơ lah chĭng M’nâm, chĭng aơ wwa tŭr tâm ăp ƀơ brah geh nău dŭt răm, rhơn ndơ geh, rlău ma nĕ ta aơ hôm chĭng guh, chĭng tơ, chĭng geh klŏ n’hanh chĭng ngăn”.

Tĭng nău nkoch bah wa Ơi Rốp, bôr chĭng lĕ dơi u che, me bơ̆ n’glơi an bah âk nuĭh bah năp. Tâm ăp năm tâm lơh tâm su, nteh chĭng n’gôr gay ăp nuĭh hăn mât njrăng ƀon tơm. Tât aƀaơ, nteh nĕ hôm e n’gŭr tâm rơh chuh tor an oh bê, ƀư rhơn năm, ăp nău ƀư brah bah rnăk wâl, lễ hội nsum mpôl mô lah ăp nău ƀư njŭn nuĭh roh, rgop boăt nthoi nsum mpôl n’hanh mât ndrăy nău uĕh văn hóa Jarai. “Kăl e, lor rnôk hăn lơh rlăng bu way tŭr chĭng gay njŭn tahen hăn trong. Rnôk sa rpu mpôl hên way tŭr chĭng aơ. Du ntil chĭng dơi dŏng tâm rnôk rhơn răm, njŭn nuĭh roh êng êng. Chĭng arap êng, chĭng aơ êng. Nuĭh Jarai mpôl hên lĕ mât chĭng gông an tât nar aơ tâm ăp rơh lễ hội mô lah khĭt ôm geh nău ntoh bah chĭng gông”.

Ŭch bôr chĭng kơt drăp yău n’glơi an bah rnăk wâl, Ơi Rốp răm mprơ nău Jarai saơ nău răm đah nău rêh nơm tâm ăp măng lễ hội. Wa ntô̆ n’hao yor bôr chĭng yău lĕ dơi mât tă bah âk rơh, mô knŭng geh khlay đah drăp ndơ ma hôm drăp ndơ văn hóa uĕh tâm nău rêh nar aơ.

Nteh gâr ntơm an lễ hội bah nuĭh Jarai. Nteh gâr mô knŭng mât rĭng an chĭng ma hôm rgop jêng ăp nău njroh tŏng nău rêh. Ta ƀon Mlăh, xă Phú Túc, nghệ nhân Kpă Bưn lah ngoăy tân dŭt đêt nuĭh hôm e mât tŏng ăp nău njroh gâr ueh nĕ.

Tâm jay nhih bah rnăk wâl nghệ nhân Kpă Bưn, gâr mô knŭng dŏng tâm ăp lễ hội răm kơt rhơn răm jay mhe, rhơn ba mhe, ƀư brah ndrâm dak mô lah ƀư săk me bơ̆. Tâm trôm lah 2 mlâm gâr êng, an êng ăp nău ƀư brah ƀon kơt ƀư brah ntlơi môch mô lah khĭt ôm. Đah wa, du mlâm gâr geh du nău êng, mô dơi dŏng tâm rlŭk đah ăp nău ƀư brah êng.

Nău ƀư ueh êng bah nghệ nhân Kpă Bưn ta nghệ thuật njroh gâr. Ăp rnôk lễ hội ƀư, ndrel đah bôr chĭng, wa lăp ndrel lễ hội đah ăp jâng nsŭn rbân. Ty gŏ măt gâr, rnôk rgâl gŏ săk gâr, rnôk lŏ gŏ măt gâr jêng lăp ndrel đah nteh chĭng. Tĭng nău gŏ rnôk nteh, rnôk rŭch, rnôk hăn đah kiău, đah ma jêng nău têh dăng, rbân r’ên. Âk năm aơ nghệ nhân Kpă Bưn nkre ƀư gâr, nkre ntĭm njroh n’gâr an mon bu klô bah nơm moh lah Ksor Blưh mhe 15 năm deh. “Aƀaơ gâp hôm e ngăch an nsrôih ntĭm an rơh mom ndăm tŭr chĭng, tŭr ăp nău chĭng arap, njroh n’gâr. Rnôk hôm e ngăch gâp way hăn ntŭk aơ ntŭk ri gay tŭr chĭng. Yơn ma ranh hôm gâp knŭng mpŏng rơh druh ndăm ŭch nău nteh chĭng gông. Knŭng ŭch druh ndăm nti lah gâp ntĭm dâl, mô gĭt moh ndơ djăt ôp, gâp gĭt ndâk âk gâp ntĭm tay dĭng nĕ. Tâm nău rêh mhe ri he lŏ ŭch plơ̆ sĭt tay đah tu tơm, mô knŭng djôt chĭng hăn tŭr tâm dak ma hôm hăn lam ntŭr neh tay. Yor rĭ he nsrôih mât nău uĕh văn hóa bah u che kăl e”.