Mbro tâm du khay ba năp, ta ơm ăp ôi, ngih văn hóa ta ƀon Kmrơng Prŏng B, xã Ea Tu, nkuăl ƀon têh Buôn Ma Thuột, n’gor Đăk Lăk ntoh n’gôr tay nău nteh chĭng gong ndrel đah nău rhơn gươm, tâm rlôr, tâm ngơi. Bơi tât 30 mom ndăm dŭt ŭch rhơn rnôk geh nghệ nhân nti tŭr chĭng gong, bâh nău ntơm tŭr bôk năp tât ăp nău blău tŭr âk nău chĭng ngăn, gong rêng mô lah tŭr du nău chĭng tât lôch. Oh Y Thiên Niê nkoch.

 “Ntơm bôk năp hôm mô hŏ blău, ê hŏ gĭt blău tŭr, geh nai ntĭm nti tŭr chĭng dŭt âk, nkra nti an hên jêng lah aƀaơ hên blău tŭr chĭng lơn đah ntơm, jrô nti hên dŭt rhơn geh năi ntĭm nti kơt nĕ.

Tĭng wa Y Wih ÊBan, Bí thư Chi bộ ƀon Kmrơng Prŏng B, jrô nti tŭr chĭng gong lah nău nsrôih bâh âk nuĭh. Lôch tă âk tơ̆ tât ta ăp rnăk vâl gay ma rgŏ jă mê̆ bơ̆ an oh kon hăn nti tŭr chĭng, yan khay rlu nti năm aơ lĕ geh dŭt âk mom ndăm tât râng nti.

 “Pơk jrô nti aơ cán bộ bâh ƀon lĕ dŭt rhơn ngăn, saơ ăp oh mon dŭt nđơr, gơih, âk mom mô geh tâm rnok săk nti yơn lĕ tât râng kơt nti đŏng. Aƀaơ saơ lĕ geh nău dơi. Jêng lah nsrôih ntĭm nti tay, mô êng jrô nti aơ ma tât năm ba kơi lĕ ơm geh kơt nĕ rĭ he mbra tâm rgop ƀư ndrel an ueh dâl”.

Khay rlu nti năm aơ, ndrel đah jrô nti tŭr chĭng ta ƀon Kmrơng Prŏng B, xã Ea Tu, hôm nha geh du jrô nti tâm ban kơt nĕ geh ƀư ta ƀon Kŏ Siêr, phường Tân Lập, nkuăl ƀon têh Buôn Ma Thuột. Aơ lah ăp jrô nti yor ntŭk kan mbơh nău mhe, văn hóa n’hanh thể thao nkuăl ƀon têh Buôn Ma Thuột ƀư tĭng nău nchrăp mât rbăy, n’hao nău ueh way ơm ăp mpôl rnoi đê̆ nuĭh ta nkuăl ƀon têh Buôn Ma Thuột lvang năm 2022-2025, mpŏng uănh tât năm 2030.

Wa Phạm Thị Hải Bình, Groi Giám đốc ntŭk kan an gĭt, ndrel đah ntĭm nti tŭr chĭng, ntŭk kan hôm nha pơk 2 jrô nti njroh xoang way ơm n’hanh nti nău njroh mhe pơk mbro bâh năm 2019 tât aƀaơ, lĕ geh rhiăng mom ndăm tât râng, bâh nĕ ndâk nsơm tay n’hanh mât tay nău ueh ơm gay ma rơh mom nuĭh rnoi đê̆ ntop ŭch rŏng nău văn hóa way ơm.

“Rnôk hăn rgŏ jă ăp oh năm aơ nti rĭ mô geh jêr kơt ăp năm ba năp, rnoh oh tât râng nti năm aơ dŭt âk đŏng.Mpôl hên uănh knơm ta nău mpŏng ta ăp phường, xã ê hŏ pơk jrô nti tŭr chĭng n’hanh nti xoang mô lah ăp jrô nti way nti ma ŭch n’hao mhe tay gay ma pơk ăp jrô nti gay ma geh nău ŭch rŏng tâm ban kơt nău rhơn nđơr tâm rnôk gŭ nti”.

Krêp bên đah nău nti tŭr chĭng tâm lĕ âk năm ba năp, nghệ nhân ưu tú Y Hiu Niê Kdăm ta ƀon M’Duk, phường Ea Tam, nkuăl ƀon têh Buôn Ma Thuột nkoch, nău ma wa dŭt mĭn rvê ngăn lah mhâm ƀư an geh ntĭm nti an na nê̆, dơh vât an mom ndăm. Gay ma bol ma ăp ntŭk hăn rĭ ăp oh mom hôm nha geh gĭt vât đah chĭng gong n’hanh hôm nha tât râng tŭr chĭng an ueh đŏng.

Băng tiếng Êđê: “Nti tay ăp ntil nău ma nơm gĭt vât mpeh ăp nău kan tơm bâh chĭng gong, nđâp ma ăp ntil nău ueh ngăn bâh păng, nđâp ma jrô nti bu klô bu ur ta ăp rpwh khay rlu nri kơt nĕ gâp saơ dŭt khlăy ngăn, ƀư tĭng dơi geh ăp nău kan mât rbăy văn hóa ntoh lư bâh ƀon lan rnoi Rđe. Bon lan ta ƀon nĕ saơ nău khlăy, nău ryơk rhơn đah nău ueh êng bâh rnoi nơm, ndâk nsơm tay ăp nău way ƀư kuăl brah, khân păng kahgĭt tay nău ơm kăl e, ăp nău khlăy văn hóa ntoh lư ma u che he an tay”.

Đah mom ndăm tât râng nti tŭr chĭng, ăp rơh nti lah ăp rơh pâl rlưn ueh yor ăp oh geh gĭt mpeh di sản văn hóa bâh u che kăl e, tât râng tŭr chĭng geh gĭt vât n’hanh tŭr tay ăp ntil nău chĭng ntoh lư bâh rnoi nơm. Ăp nău nti kơt nĕ mô dơn kơl an ăp oh geh tay nău gĭt vât ueh khlăy tâm khay rlu nti ma hôm nha geh ntop nkah tay mpeh ăp nău khlăy way ơm ueh gay ma ăp oh geh mât rbăy n’hanh n’hao ueh mhe.