Tâm jay kđar chor nói lĕ blak tĭng năm, Nghệ nhân H’Brơi dôl nchah njao njŭng sau đah ăp nău mprơ Bunong ơm bên. Tâm ăp mpir jay lah ăp păng bằng khen, samƀŭt rnê nkhôm dơi mât tă bah âk rơh kơt an saơ nău nthoi bah du rnăk wâl ndrŏng nău way ơm cách mạng.

Nghệ nhân H’Brơi deh năm 1975 tâm du rnăk wâl lĕ mê̆ bơ̆ saơ n’hanh mê̆ deh bah wa râng rmôt dân công hóa tuyến rhŏ an cách mạng B4 Nâm Nung tâm ăp năm khay tâm lơh mprơh rlăng Pháp n’hanh Mỹ rŭn in. Deh rnôk ƀon tơm mhe rklaih đăp mpăn, neh dak kơp dơn, têh tâm nău nteh chĭng bah bơ̆, nău mprơ bah mê̆, nău rŏng văn hóa Bunong lĕ lăp tâm wa bah jêt. Nghệ nhân H’Brơi nkoch:

 Gâp gĭt n’hanh kăr ăp nău mprơ aơ bah jêt. Nar bah năp, ăp rnôk ƀon geh lê hội, gâp way tĭng mê̆ hăn mprơ. Ta jay ri djăt mê̆ mprơ njŭng kon, njŭng mon jêng mbrơi mbrơi lăp tâm săk mô gĭt đŏng lah mô. Nti mprơ mô geh jêr đŏng, khlay lah gơih djăt, nkah gĭt hôm nti mprơ tĭng...

Đah nuĭh Bunong, nău mprơ mô knŭng lah nău mprơ ma hôm mât ndrăy lịch sử, nău way ơm n’hanh nău rêh bah nsum mpôl. Bah ăp nău mprơ n’hĭr, mprơ tâm ơh tât nău mprơ nkoch ot ndrong, lĕ rngôch njuăl ntĭm bah u che đah nău rŏng, nău tâm rnglăp n’hanh nuih n’hâm pah kan. Aƀaơ Nghệ nhân H’Brơi ntĭm nău rŏng tâm pât an rơh bah kơi ndơn tay.

Têh tâm nău mprơ bah mê̆, yuh H’Như, kon bu ur wa H’Brơi ơm tĭng đah ăp nău ƀư văn hóa way ơm bah ƀon. Aƀaơ, yuh lah Kruanh rmôt njroh way ơm Bunong bah xă Nâm Nung.

Bah jêt gâp lĕ tĭng mê̆ hăn nti mprơ, nti njroh ndrel ăp kônh wa tâm rmôt văn hóa dân gian bah xă. Mê̆ lah kruanh rmôt jêng gâp ƀa ƀơ dơi mâp đah nău tâm pât, ăp nău njroh way ơm n’hanh mbrơi jêng nău ŭch đah nău mprơ n’hanh nău njroh Bunong he.

Bí thư Chi đoàn druh ndăm ƀon JaRah, xă Nâm Nung, yuh H’Như uănh nău mât ndrăy văn hóa rnoi mpôl đêt lah nău kan bah druh ndăm. Ăp nar rgum rƀŭn đoàn tâm nar măng mô knŭng ntŭk đoàn viên tâm rgâl trong kan ma hôm jêng ntŭk tiăr nti njroh mprơ. Lĕ rngôch rlău 30 nuĭh, tâm nĕ du đêt druh ndăm dơi săch tâm rmôt njroh bah xă Nâm Nung yor H’Như mât uănh. Yuh H’Như nkoch:

Dŭt âk druh ndăm tâm rmôt njroh lah đoàn viên druh ndăm tâm ƀon jêng nău rgŏ jă râng nti dŭt dơh. Mpôl hên way tâm rgop ăp nar nti njroh, nti mprơ tâm rgum rƀŭn chi đoàn, nkre geh ntŭk pâl uĕh an druh ndăm, nkre rgop mât ndrăy ăp nău khlay văn hóa way ơm.

Ăp rơh lễ hội mô lah njroh mprơ văn hóa way ơm, rup ndah 2 mê̆ kon wa H’Brơi ndrel njroh jêng lĕ bên. Đah nteh chĭng lam ƀon lan, mê̆ mprơ ăp nău mprơ rbân r’ên. Nuĭh kon bu ur lăp ndrel tĭng đah ăp nău njroh rbân r’ên.

Ăp năm dăch aơ, rmôt njroh mprơ xă Nâm Nung na nao râng âk njroh mprơ, tâm nđŭr văn hóa tâm lam dak n’hanh geh âk ndơ nkhôm têh. N’hanh wa H’Brơi, yuh H’Như dôl trêng ntĭm nău ueh nău ŭch văn hóa way ơm Bunong tât rơh druh ndăm. Yuh H’Thương Knul, Groi Kruanh Ban Văn hóa-Xã hội Hội đồng nhân dân xă Nâm Nung an gĭt:

U Nhim (Wa Brơi) aƀaơ lah kruanh rmôt chĭng-mpât mprơ, hôm kon bu ur wa mât uănh rmôt njroh. Tâm âk năm bah năp, 2 mê̆ kon lĕ nsrôih râng mât ndrăy n’hanh trêng ntĭm văn hóa way ơm an druh ndăm. Tâm âk năm bah năp, mpôl nghệ nhân văn hóa way ơm yor Nghệ nhân H’Brơi râng lĕ geh măt ta âk tâm nđŭr, njroh mprơ tâm n’hanh bah dih n’gor. Êng ta rgum njroh mprơ văn hóa way ơm ƀư ta Quảng Trị năm 2024 mhe rlău, rmôt lĕ geh 9 ndơ nkhôm, tâm nĕ geh 4 giải A ndrel âk giải B n’hanh C ta ăp nkô̆ nău njroh mprơ.

Bah mpông jay jêt ta ƀon Jarah, Nghệ nhân H’Brơi dôl nsrôih ntop tay nău way ơm bah rnăk wâl đah nău kan uĕh an ƀon lan. Lah rơh u che rgop soan an cách mạng ri rơh nar aơ dôl rgop soan mât na nao nău uĕh văn hóa rnoi mpôl đêt. Bah nău n’hĭr bâh wa, nău mprơ bah mê̆ tât ăp nău njroh bah nuĭh kon bu ur, tu tơm văn hóa Bunong hôm e nâp nâl hăn rlău ăp rơh, gay nteh chĭng, nău mprơ hôm e nteh mro nklang ƀon nar aơ.

- Jay đah ăp păng bằng khen kơt an saơ nău nthoi tay bah du rnăk wâl âk nău way ơm

-

-

-