Bôk nău kan geh rgum ăp nuĭh ƀư gâm ndơ sa n’hanh nuĭh way kan mpeh ndơ sông sa tât bâh Việt Nam, Thái Lan n’hanh Malaysia, 3 ngih dak geh nău dơi mpeh pah kan jan sa, ƀư sầu riêng. Ta talkshow, ăp nuĭh ƀư ndơ sa lĕ geh ƀư nkret gâm 7 ntil ndơ sa. Ăp ndơ sa lah nău tâm rgop đah sầu riêng Đăk Lăk đah nău kan ƀư ndơ sông sa bâh 3 dak, bâh ntơm ndơ ntơm leo sa, tât ndơ sa tât tât ndơ lôch sa.

Âk nuĭh way kan uănh năl, sầu riêng Đăk Lăk geh nău dơi têh gay ma hun hao ăp ntil ndơ sa mhe, ntop n’hao nău khlăy ndơ tăm ndrel đah nău pâl nđaih n’hanh mbơh nău ueh êng. Wa Lý Kim Long, groi kruanh Hiệp hội nuĭh ƀư gâm ndơ sa blău ta Việt Nam nkoch.  “Nar aơ gâp mbra tâm rgop đah ndơ sa lah tui ta dak lêng đah sầu riêng, ndra ma săch tui lah ndơ ƀư gâm n’hanh geh dŭt âk bâh Phú Yên ơm tâm rgop đah sầu riêng lah ndơ sa ntoh lư bâh Đăk Lăk. Lĕ geh ŭch mĭn uănh gay ma dŏng ndơ sầu riêng aơ lăp ta ăp ndơ sa, njêng ăp ntil ndơ sa mhe êng an bu năch, gay ma n’hao nău tăch rvăt, ntop n’hao an nău pala nđaih bâh Đăk Lăk lah êng n’hanh Việt Nam he nơm lah nsum”.

Ting nău mbơh bâh rnâng kan leo kan, talkshow mô dơn geh mbơh ăp nău gĭt dăch mhe tâm nău ƀư sầu riêng ma hôm nha mpŏng tât rdâk njêng ntil ndơ pâl nđaih ntoh lư bâh ndơ tuch tăm ta ntŭk. Du đê̆ ndơ sa tâm di mbra geh mĭn uănh, tâm rgop đah ntŭk răk ngêt sông, ntŭk an năch gŭ gay ma kơl an bu năch ta rơh ƀư lễ hội sầu riêng ta Đăk Lăk geh ƀư ta khay 8 tay. Wa Nguyễn Quốc Hiệp, Groi Giám đốc ntŭk kan văn hoá, thể thao n’hanh pâl nđaih n’gor Đăk Lăk an gĭt. “Mpôl hên jă nuĭh ƀư gâm ndơ sa sĭt ƀư ăp ndơ sa mhe bâh play sầu riêng gay ma uănh năl n’hanh mĭn kan mhe an ăp ndơ sa mhe n’hanh gay ma n’hao nău khlăy bâh sầu riêng tâm ntŭk tăch rgâl tâm dak tâm ban kơt ntŭk tăch rgâl lam ntur neh, nsĭt tay ăp nău khlăy hao âk lơn tay đah n’gâng kan sầu riêng bâh he”.