Tâm mông nar khuh n’gôr bah Nar rgum pâl, ntŭk ta Quảng trường 16/4 mprang uĕh gŭr ntơr ndơ cheh tanh n’hanh n’gloh nteh ăp ndơ uh goh way ơm. Nklang nău nteh gâr Paranưng, mbuăt Saranai ntrŭt ntrôl nuih n’hâm nuĭh, nô David, du hê năch tât bah Hoa Kỳ, rhơn nkoch:

“Gâp dŭt gân djăng đah ndơ uh goh bah nuĭh Chăm, saơ geh nkô̆ hôr, lăp jru tâm nuih n’hâm, wât tay mpeh nău rhơn mƀak bah kon nuĭh. Aơ lah ndơ nsoh way ơm bah nuĭh Chăm tât bah ƀon hăr blău ti kan Mỹ Nghiệp, lah ndơ geh ƀư khlay gay mât ndray an nău rêh let năp tay”.

Nar rgum pâl hŏ tanh jêng du păng rup văn hóa âk săk ntơr, n’gôr gră nău rhơn n’hanh bêng ler nău nđơr nsan hao tâm rơh hun hao mhe. Suan rhôp bah nar rgum mô dơn n’glĕ ta drăp ndơ ơm yău ntlơi an tay uĕh êng ma hôm ta nuih n’hâm krêp dêh, wăch rgum săk ntơr bah ƀon lan tât bah ăp nkual. Dâk nklang quảng trường ntơr uĕh cờ kao, wa Mô Ha Mad, tât bah n’gor An Giang, rhơn nđơr nkoch:

“Rup uĕh êng bah tĭng nkual dơi mpơl kloh. Gâp lah nuĭh Chăm Hồi giáo, hôm ta aơ lah Chăm Bà Ni, Chăm H’Roi… Ăp nkual geh rup uĕh ntĭt êng, geh nău tâm rlai lăp nsum, bah nê, n’hao dăng tâm rnglăp”.

Nar rgum Văn hóa rnoi Chăm đah nău têh lam dak lah ndơ an saơ n’grêh rêh an n’hong hoch mô dơi dŭt roh bah săk tơm rnoi nuĭh tâm rơh rgâl mhe. Đah nuih n’hâm n’gor Khánh Hòa, nar rgum geh nkô̆ khlay dŭt n’hâm mha êng. Lôch n’glăp nsum, Khánh Hòa jêng geh du ntŭk hun hao mhe— ntŭk rgum âk drăp ndơ têl ơm yău kăl e, dak lêng gôl dak ndrel săk geh têh mpeh pâl nđaih, khoa học công nghệ n’hanh wăng sa dak lêng. Aơ lah nău dơh uĕh gay n’gor buăt nthoi lăp tâm ban đah mât ndray drăp ndơ ơm yău đah hun hao jŏ jong, đah mât ndray săk tơm đah rgâl blău ƀư mhe. Lah rjăp nău khlay bah nău mât ndray săk tơm, wa Nguyễn Việt Hùng, Kruanh UBND n’gor Khánh Hòa lah kloh:

“Mpôl hên mĭn lah ŭch hăn ngăch ân ntuh kơl ntŭk ntô ndơ dŏng yơn ŭch hăn ngai ân ntuh kơl an văn hóa, an kon nuĭh. Nê mô dơn lah trong sơch bah n’gor Khánh Hòa ma lah nău dơn kan bah n’gor Khánh Hòa đah nău hun hao jŏ jong bah neh dak, bah rnoi nuĭh. Ăp rơh kơn dơn hăn ndrel đah neh dak du njăr trong dơm yơn văn hóa mbra ndrel hăn rnoi nuĭh mbro mbrăng”.

Gay tĭng ƀư trong uănh jong nê, Khánh Hòa dôl nsrôih kan nsum đah ăp n’gâng kan Trung ương, ăp nuĭh khoa học n’hanh nsum mpôl gay rdâk njêng hồ sơ UNESCO nchih săk drăp ndơ ơm yău mô mpơl săk “Tĭng ƀư ôp mbah me Thiên Y Ana” bah rnoi Chăm tâm Săk nchih drăp ndơ ơm yău văn hóa mô mpơl săk ntơh măt an ntil kon nuĭh. Aƀaơ Khánh Hòa rƀŏng tât ntik n’hao nău khlay kan rgum tơm mât ndray, gŭ mĭn n’hanh nkơnh n’hơ văn hóa Chăm bah lam nkual duyên hải Nam Trung Bộ n’hanh Tây Nguyên.