VOV4.M’nông – Nar 27/8, n’gor Dak Lak lĕ ntơm ƀư trong nchrăp uănh năl ngăch kaman Covid-19 an lam nuĭh ƀon lan nkual ƀon têh Buôn Ma Thuột gay uănh săch lor, saơ ngăch F0 tâm ntŭk gŭ rêh. Tâm nar bôk năp, nkual ƀon têh Buôn Ma Thuột lĕ uănh năl an nklăp 10 rbăn rnăk ta 2 phường Thống Nhất n’hanh Tự An đah 62 ntŭk sŏk ndơ uănh năl. Wa Đoàn Ngọc Thượng, Groi Kruanh UBND nkual ƀon têh Buôn Ma Thuột an gĭt, gay trong kan sŏk test ngăch COVID-19 đăp mpăn tĭng di nău ntrŭnh, nkual ƀon têh lĕ ndâk njêng 70 Rmôt sŏk uănh năl n’hanh 2 rmôt sŏk uănh năl ăp ntŭk ntơm sŏk ndơ uănh năl ngăch kaman Sars-CoV-2 an nuĭh ƀon lan ta 21 xă phường. Du rmôt ƀư uănh năl nklăp 400 nuĭh du nar. Mông nar sŏk uănh năl nchrăp mbra jêh tâm 5-7 nar đah rnoh uănh năl nklăp 375.000 nuĭh. Nar 27/8, ta ăp rmôt sŏk uănh năl ta 2 phường Thống Nhất n’hanh Tự An mô saơ nuĭh ntưp đah Sars-CoV-2.

Nuĭh ƀon lan phường Thống Nhất ƀư test ngăch tâm nar 27/8

Ntơm bah 6h kêng măng, nar 26/8, Nkual ƀon têh Buôn Ma Thuột, n'gor Dak Lak hŏ tĭng ƀư an gŭ srang ngai êng lam rêh jêng kon nuĭh tĭng nău ntrŭnh mbrô 16. Tĭng nê, tâm 5 nar  bôk năp, nkual  ƀon têh đă nuĭh ƀon lan mô dơi luh bah dih jay gay mbrôn suan uănh năl ngăch joi F0 tâm lam ƀon lan. Tâm rnôk dja, UBND nkual ƀon têh Buôn Ma Thuột jao an ăp xã, phường njêng “siêu thị 0 đồng” gay rhŏ dŏng an ăp rnăk jêr jŏt, nkre tĭng ƀư trong ntĭt leo "Săm hăn chợ kơl an ƀon lan". Lor bôk năp, ăp siêu thị, ntŭk rgum tăch rgâl ta nkual ƀon têh Buôn Ma Thuột tĭng ƀư tăch ndơ klŭp tĭng ăp “combo ndơ ngêt sa khlay" ơm geh ăp rnoh khlay ntơm bah 100.000 tât 500.000 prăk gay tŏng an nău ŭch geh dŏng sa bah nuĭh ƀon lan. Aƀaơ geh 5 ntŭk pă an ndơ tăch ta nkual ƀon têh lah siêu thị Go Buôn Ma Thuột, siêu thị Co.opmart Buôn Ma Thuột, siêu thị MM Mega Buôn Ma Thuột, ăp ntŭk tăch ndơ Vinmart, ntŭk tăch ndơ Bách hoá xanh mbra dŏng trong tăch ndơ online, tăch tĭng combo n'hanh ƀư đăp mpăn rnoh khlay đah âk ntil ndơ tăch dŏng sa khlay./.

Nŭih rblang: Y Sưng Phê Ja