VOV4.M’nông – Ta năp nu nău jêr jŏt bah srê Covid-19, gay gĭt saơ F0 tâm ntŭk gŭ rêh, UBND nkaul ƀon têh Buôn Ma Thuột, n’gor Dak Lak lĕ an trong nchrăp uănh năl ngăch kaman Covid-19 ta lam nkual ƀon têh rơh tal 2. Tĭng nĕ, nkual ƀon têh mbra ƀư uănh năl test ngăch an 16 xă, phường geh ntŭk srê jêr jŏt tâm nar bah năp geh: phường Ea Tam, Tân Tiến, Tự An, Tân Lợi, Tân Lập, Tân An, Thắng Lợi, Tân Hòa, Thành Nhất, Thành Công, Tân Thành, Thống Nhất, xă Cư Êbur, xă Hòa Thuận, Hòa Thắng n’hanh xă Ea Tu. Nar ƀư bah nar 6/11 n’hanh lôch bah năp nar 9/11/2021.

Nkual ƀon têh Buôn Ma Thuột mbra ƀư test ngăch an nuĭh ƀon lan

Gay đăp mpăn di nar, nkual ƀon têh mbra ndâk njêng 204 rmôt uănh năl, du rmôt ƀư uănh năl nklăp 500 nuĭh du nar. Nău sŏk n’hak muh uănh năl mbra ƀư tĭng trong “ntŭt bêl”, du rnăk mbra sŏk du hê tĭng trong ƀư rgop mô rlău 3 nuĭh du ntil n’hak muh rgop nsum.

Nuĭh rblang: Y Sưng Phê Ja