VOV4.M’nông – Tĭng N’gâng kan dak si nkual ƀon têh HCM, nar bah năp, âk n’gor, nkual ƀon têh dăn đă ntop kơl nuĭh ƀon lan dôl gŭ rêh ta nkual ƀon têh HCM dơi sĭt ƀon lan. Gay nta nơih an nuĭh ƀon lan sĭt ƀon đăp mpăn, N’gâng kan dak si jao an Ntŭk uănh nđôi kop ji nkual ƀon têh HCM tâm pă sinh phẩm an ngih dak si nkuăl n’hanh nkual ƀon têh Thủ Đức gay uănh năl kop srê an nuĭh ƀon lan geh nău ŭch sĭt ƀon tơm.

Nuĭh ƀon lan ta nkual ƀon têh HCM mbra dơi ntop kơl uănh năl kop srê gay sĭt ƀon tơm

N’gâng kan dak si đă UBND ăp n’gor, nkual ƀon têh njuăl UBND ăp quận nkuăl n’hanh nkual ƀon têh Thủ Đức săk na nê̆ ăp nuĭh nchrăp sĭt ƀon tơm gay ƀư nkô̆ nău an ăp quận nkuăl ƀư. N’gâng kan dak si nkual ƀon têh HCM đă UBND ăp quận nkuăl, nkual ƀon têh Thủ Đức tâm rgop đah ngih dak si quận nkuăl ƀư uănh năl ngăch kaman Sars-CoV-2 an nuĭh ƀon lan n’hanh ăp nuĭh ntop kơl dak si êng tĭng nău ntrŭnh. Đah ăp nuĭh geh ntưp ri mkra tĭng nău ntrŭnh.

Nuĭh rblang: Y Sưng Phê Ja