VOV4.M’nông: Nau ntruch tay nar gay ma jêh bôk nau kan ƀon lan mhe lah nau ma rđau kan nkuăl Lạc Dương, n’gor Lâm Đồng dôl ma rvê. Yơn đah 2 nau kan lah jêh lôch nau dơi ƀon lan mhe tâm di nar ma nau tât ngăn ri geh nâp nâl ndrel ma ntruch tay nar ndâk njêng ăp nau dơi ân geh nâp nâl, ri nkuăl aơ hŏ săch nau tal 2. Choat mbrơi ân saơ nau nâp nâl tâm trong hăn ndâk njêng “nkuăl ƀon lan mhe”.

            Tât dŭt năm 2020, lam nkuăl Lạc Dương mhe knŭng geh 4 xã geh UBND n’gor Lâm Đồng ntrŭnh nau kơp dơn tŏng nau dơi ƀon lan mhe. Êng xã Đưng K’Nớ geh 14/19 nkô̆. Kan ndâk njêng ngih vâl, gung trong geh ăp nau kan ngăn gay ma kơl an tâm nau rêh, tuch tăm bah ƀon lan tâm ăp xã ƀon lan mhe lŏ geh kơl an bôk năp, hun hao. Ăp nau kan hun hao tuch tăm geh nsum ma nau ndâk tay nau kan tuch tăm, rgâl nau kan văng sa ƀon lan, njêng tâm nau rêh ndrel ma n’hao nau săk geh ân ƀon lan geh kơl an ngăn. Ăp bôk nau kan n’huch ach o, đăp mpăn nau rêh geh ƀư săk tam. Rnơm kơt nê, tât khay 1 năm 2020 nkuăl aơ hôm 122 rnăk ach o, geh 1,8%. Tâm nê, rnăk ach o nŭih rnoi mpôl đê̆ lah 119 rnăk, geh rnoh 2,5%. Nau geh du hê bôk nŭih lam nkuăl năm 2020 geh nklăp 45,9 rkeh prăk.

            Rnôk aơ, tâm nau ndâk njêng ƀon lan mhe nkuăl Lạc Dương, n’gor Lâm Đồng  hôm kol tâm 3 nkô̆ nau tơm lah: Ntŭk ntu, gung trong ndrel xã nkuăl jru Đưng K’Nớ. Mpeh nau kan ntŭk ntu, wa Hoàng Văn Hãnh-Groi jrâu kan Tài nguyên ndrel Môi trường nkuăl Lạc Dương mbơh: Gay đăp mpăn xã Đưng K’Nớ geh dơi nkô̆ nau mpeh nau ndâk njêng ân dơi nkô̆ nau ndâk ƀon lan mhe năm 2021, jrâu kan hŏ đă UBND nkuăl Lạc Dương nkra, n’hao nâp trong hăn đah rnoh ntuh kơl nklăp 4 rmen prăk. Nchrăp nau kan aơ mra jêh tâm năm 2021.

            Lah kơt 2 nau kan ntoh ba lơ nê rklaih rnôk tơm prăk ntuh kơl geh đăp mpăn ri nau doh rklaih têh ngăn hôm e tâm xã Đưng K’nớ. Gay ndâk njêng ƀon lah mhe geh nau dơi năm 2021, nau nkra trong ntuh kơl bah Đưng K’nớ hôm ăp nkô̆: Trong hăn, ngih rƀŭn văn hoá, dak kloh tâm ƀon lan, trong dak hoch ndrel ngăn lah nau n’huch ach o.

            Nsôih chính trị prêh bah nkuăl Lạc Dương hŏ geh ntoh ngăn tâm nau rgum nau kơl an xã Đưng K’nớ. Ndrel tă bah bôk năm 2021, rđau kan nkuăl hŏ hăn mêt uănh ndrel ma rđau ăp nkô̆ nau geh tât nau kan n’hao nau rêh ân ƀon lan tâm Đưng K’nớ. Yor nau ntuh kơl ăp nau kan knŭng lah nau dơi, hôm n’hao nau rêh gay ma njêng nau tâm ban tâm ƀon lah mơ lah nau dơi gay ma tŏng ân nau hun hao lah nsum ndrel geh nau dơi nau nchrâp ndâk njêng ƀon lan mhe năm 2021 lah êng tâm Đưng K’Nớ.

            Tĭng nau nchrăp bôk năp, tât năm 2020, nkuăl Lạc Dương, n’gor Lâm Đồng mpeh nau ndâk njêng ƀon lan mhe. Yơn lah, uănh saơ ăp nau kan geh tât nau mô nâp nâl, yor ri ma hŏ ntrŭnh nau ntruch tay năm tât 2022. Ăp năm nơm nchrăp ân ntruch mô di lah nau kan khlay. Yor lah rlau ma nau nâp nâl bah ăp nau kan, lah nau rêh ueh lăng ân ƀon lan. Yor ri choat ân mbrơi ma ân geh nâp nê lah nau ueh yor nau blau kan lơn ma prêh ri ân geh ndâk njêng nau tơm ân geh nâp nâl./.

                        Nŭih rblang: H’Thi