VOV4.M’nông:  Ta nkuăl n’har bri Tuy Đức bah n’gor Dak Nông, ăp nar bah năp lĕ geh rlău 1.200 nuĭh plơ̆ sĭt bah ăp n’gor mpeh bah dâng. N’gâng kan ƀon lan tâm rgop đah ăp rmôt kan, êng nuĭh nsrôih ntop kơl dak si, ndơ sa, dŏng dŏng gay khân pơng đăp mpăn ƀư nkhah rgum njrăng, n’gang chôt srê Covid-19.

Tâm nkual nkhah rgum an ƀư ta Ngih sam ƀŭt mầm non Họa My ta thôn 5, xă Quảng Tâm, nô Lương Văn Lý, nuĭh plơ̆ sĭt bah Bình Dương, an gĭt:

“Gâp sĭt nar 3 khay 10, tĭng ntĭm rđău bah nai dak si ta ntŭk ri an nkhah rgum 14 nar, Bah rnôk sĭt ta aơ ri gâp dơi test ngăch Covid-19 âk tơ̆, jêh uănh năl mô ntưp da dê. Ntŭk gŭ bĭch sông sa nkhah êng kloh uĕh, ngêt sa tŏng ăp nar 3 tơ̆, đăp mpăn săk soan. Gâp saơ đăp mpăn rnôk khah êng ta aơ”.

    Du nkual nkhah rgum ta xă Quảng Tâm nkuăl Tuy Đức, n’gor Dak Nông

Wa Nguyễn Quốc Hải-Groi Kruanh UBND xă Quảng Tâm an gĭt, xă aƀaơ geh rlău 60 nuĭh ƀon lan sĭt bah nkual srê ăp n’gor mpeh bah Dâng dôl an nkhah êng rgum. Kơl kônh wa đăp mpăn nkhah êng njrăng n’gang srê, xă kuăl jă ăp rmôt kan, êng nuĭh ntop kơl prăk, ndơ sông sa, ndơ dŏng, gâm n’gôn an dơm rhŏ nkual nkhah êng:

“Tĭng nău ntrŭnh bah gưl ka lơ ri sŏk du nar lah 80 rbăn prăk sa/du hê, mô hŏ kơp prăk ngêt dak, n’ha rđaih ăch chrach mô lah ăp prăk êng. Tĭng nău ntrŭnh lah kơt nĕ yơn mpôl hên mô geh du prăk. Aƀaơ ta lam xă mpôl hên dôl kuăl jă ăp nuĭh lŏng bôk tôr kơl, kơl ƀư “jay sa mô sŏk prăk” an kônh wa tâm nkual nkhah êng. Kônh wa ta aơ hôm e dŭt âk jêr jŏt, mpôl hên nsrôih kuăl jă kơl gay tâm pă jêr jŏt ndrel njrăng n’gang srê tâm rơh aơ”.

Tâm âk khay bah năp, nkuăl n’har bri Tuy Đức (Dak Nông) wơt rlău 4.000 nuĭh ƀon lan plơ̆ sĭt bah ăp n’gor geh srê Covid-19. Êng bah bôk khay 10 tât aƀaơ lĕ geh rlău 1.200 nuĭh sĭt ƀon lan. Lam nkuăl lĕ kơp dơn 16 nuĭh ntưp đah Covid-19, saơ ta ăp nkual nkhah êng da dê, mô geh nuĭh ntưp tâm ntŭk gŭ rêh.

Du hê lŏng bôk tôr ta xă Quảng Tâm tât ntop kơl prăk n’hanh ndơ sông sa an nkual nkhah rgum.

Wa Trương Đức Minh-Kruanh Ngih dak si nkuăl Tuy Đức, mbơh, ta năp nău ƀon lan plơ̆ sĭt bah kual srê hao âk, UBND nkuăl lĕ ndâk njuêng 7 nkual nkhah rgum ta ăp xă n’hanh du nkual ta Ngih Chính trị nkuăl. Nkhah rgum lah trong mkra uĕh gay njrăng n’gang srê ntưp rêng ntŭk gŭ rêh. Tĭng nău ntrŭnh ri nuĭh nkhah rgum an trok prăk 80.000 prăk sa du nar. Bôl ndrĭ, nkuăl ƀư kuăl jă kon nuĭh tâm rgop đăp mpăn mô sŏk prăk gay ntop kơl nuĭh ƀon lan nkhah êng:

“Đah nău kơl ri ăp nuĭh tâm rnăk ach o ri mô sŏk, dơi an dơm, hôm đah nuĭh êng ri hôm e sŏk prăk. Đah nkuăl Tuy Đức ri bơi kơt mpôl hên rgŏ jă, tâm rgop lah âk. Nău ndơ̆ sĭt nkhah êng ta ăp xă lah nău ntrŭnh uĕh, săk rnglăy. Rnôk nuĭh ƀon lan dơi ndơ̆ sĭt ăp xă nkhah êng, khân pơng geh nău saơ lah kônh wa bên bah nơm plơ̆ sĭt, jêng nău rgŏ jă rgop ƀư ntop kơl n’gôn piăng trau n’hanh rhŏ an ri dŭt tam”.

          Tâm rnôk chôt srê mro mrăng, nău way ơm uĕh lăng “Tâm yô̆ tâm kơl, nuĭh geh kơl nuĭh mô geh” bah rnoi mpôl Việt Nam lĕ n’hanh dôl dơi nuĭh ƀon lan ta nkuăl ach o Tuy Đức mât uĕh săk rnglăy. Nuih n’hâm tâm rnglăp, tâm pă lah dĭng “vaccine” tam rgop njrăng n’gang chôt srê Covid-19./.

          Nuĭh rblang: Y Sưng Phê Ja