Bah nklang nkuăl Kbang (n’gor Gia Lai), rnăk wâl yuh Nguyễn Thị Thu Huyền, năch pâl nđaih bah Hà Nội, lĕ geh du hăn dŭt uĕh jong bơi 70km tĭng trong tỉnh lộ 669 gay tât dak leng Lơ Lung, hôm kuăl lah dak leng 3 dăp ta ƀon Kon Bông, xă Đăk Krong. Ta aơ, lĕ rnăk wâl lăp săk tâm dak nđik, kloh rsang n’hanh ntŭk ntô bri têh. Kon se tâm pâl ta ăp ntŭk dak thơl, tâm rnôk nuĭh têh ndar ka n’hanh chŭp rup ta nâm tơm si, gŭ tâm trôk nar nđik bah bri krŏng. Nuĭh ntĭm lah nuĭh ta ntŭk, kơl năch pâl nđaih uănh joi nău rêh jŭm dăr dak leng. Jêh 2 mông pâl rlưn, lĕ rmôt plơ̆ tay ƀon ngêt sa ăp ntil trău kơt biăp bri, ka n’hanh dak sŭt bri. Lĕ rngôch yor kônh wa ta ntŭk tăm êng n’hanh mât. Yuh Huyền nkoch:

Rlet rlău trong ngai gay tât ta aơ lah dŭt tâm di. Hăn ŏk r’ah du đêt yơn ntŭk uĕh! Dŭt têh. Dak leng dŭt uĕh, trôk nar tĭng đah nuĭh. Ngăn ngên lah du rơh hăn dŭt uĕh.

Đah ăp năch rmôt ŭch uănh joi n’hanh rlet rlău văn hóa bah nuĭh Bahnar, ƀon lan mbra jă khân pơng gŭ ta jay rlu rlău. Măng jŭr ngo, năch pâl nđaih mbra dơi djăt chĭng n’hanh lăp ndrel đah soang đah nuĭh ƀon lan ta ntŭk đah ŭnh pôi. Knŭng bah khay 1/2024 tât aƀaơ, ƀon Kon Bông lĕ wơt rlău 40 mpôl năch, đah ăp mpôl bah 20 tât 30 nuĭh. Khân pơng uănh joi nău uĕh ơm bah bri, bah dak lŭ n’hanh dak leng Pe Dăp. Kônh wa nuĭh Bahnar ta aơ mư ƀư bên nău wơt năch pâl nđaih. Yor knơm nău mô way, âk nău ơm aơ năch pâl nđaih lơ ŭch. Wa Đinh Văn Nhú, Bí thư chi bộ, kruanh ƀon Kon Bông nkoch: Kônh wa mpôl hên wơt năch đah nuih n’hâm ngăn.

 Ăp ndơ bah kônh wa tâm ƀon ƀư geh kơt: djăr, sŭr m’ơk lêng n’hanh nuĭh mô măt, dơi năch pâl nđaih dŭt ŭch. Aƀaơ geh âk rnăk wwâl tâm ƀon lĕ geh ndơ n’hanh râng rhŏ an năch. Chi bộ ƀon nkoch trêng an kônh wwa n’hao hun hao wăng sa, tăm tơm sa play, mât rong sŭr he n’hanh kik djăr, n’gôn ndrănh m’êt. Mpôl hên hôm mât nti rmôt chĭng n’hanh rmôt xoang gay rhŏ an năch pâl nđaih.

Nkual Ntêm nkrem sinh quyển lam ntŭr neh Dâng rđŭng Kon Hà Nừng gŭ ta bah lơ n’gor Gia Lai, kâng n’har đah Kon Tum, Quảng Ngãi n’hanh Bình Định, geh dĭng rnoh neh rlău 413.000 ha. Nkual njônh bah ntŭk aơ lah Bri ngih dak Kon Ka Kinh n’hanh nkual Mât ndrăy bri Kon Chư Răng, dŭt âk lah bri krŏng n’hanh bri hon ơm. Wa Nguyễn Hồng Quân, Groi Giám đốc mât uănh Nkual Mât ndrăy bri Kon Chư Răng an lah nău dơi hun hao pâl nđaih sinh thái, pâl nđaih hưt nuih ta aơ dŭt âk. Yơn lĕ rngôch mô hŏ dơi nuĭh uănh tât.

Nkual mât ndrăy bri Kon Chư Răng geh rlău 20 dak leng dơi ndơ̆ an dŏng hun hao pâl nđaih. Ntuh kơl an ăp ntil pâl nđaih lah dơi an mpla nsơ Dâng rđŭng Kon Hà Nừng tât đah rmôt kan tâm n’hanh dak bah dih.

Wa Nguyễn Văn Hoàn, Groi Giám đốc N’gâng kan tuch tăm mât rong n’hanh hun hao ƀon lan bah Gia Lai an gĭt n’gor dôl mbơh ƀư âk nău kan pâl nđaih ntŭk gŭ rêh n’hanh pâl nđaih sinh thái gay joi nău rêh nâp nâl an ƀon lan rnoi mpôl đêt ta nkual. N’gor dôl ƀư tĭng trong nchrăp mât uĕh nău khlay dâng rđŭng Kon Hà Nừng đah ăp nău ƀư na nê̆ gay n’hao nău geh an nuĭh ƀon lan ta ntŭk:

N’gor Gia Lai lĕ ndâk njêng Ban mât uănh nkual ntêm nkrem sinh quyển Dâng rđŭng Kon Hà Nừng, yor groi Kruanh UBND n’gor ƀư kruanh Ban. Tă bah nĕ, n’gor dôl mbơh ƀư ăp nkô̆ nău na nê̆ tâm bôk nău kan mât nău khlay aơ, kơt ndâk ƀư logo ntĭt mpơl n’hanh trang web na nê̆. Lĕ rngôch ndơ lŏ mir dơi nkra njêng ta aơ mbra dơi ntăm ntŭk ntĭm, gay n’hao nău khlay.

Ăp nău nsrôih mât ăp nău khlay văn hóa n’hanh bri dak ta nkual ntêm nkrem sinh quyển Dâng rđŭng Kon Hà Nừng bah n’gor Gia Lai dôl pơk luh trong hăn mhe an nău hun hao nâp nâl. Rup ndah ơm ma kuăl jă bah kon nuĭh ta ntŭk yôk prêh, bri krŏng sop nkăp, dak nor tâm nău nđĭk nho, dak leng rsang têh... mbra lah ntŭk tât nar lơ âk năch pâl nđaih tâm dak n’hanh dak bah dih. Kon Hà Nừng lĕ dơi kuăl dâk./.