VOV4.M’nông – Jêh test ngăch n’hanh uănh năl, ôi 25/8, nău kan dơi kan saơ 14 nuĭh ta thôn 7 xă Cư Êbur, nkual ƀon têh Buôn Ma Thuột, n’gor Dak lak ntưp đah Covid-19 ma mô gĭt tu tơm ntưp. Nău aơ lĕ dơi mĭn lah đah trong uănh năl mham RT-PCR yor CDC n’gor n’hanh Viện Vệ sinh dịch tễ Tây Nguyên ƀư.

Rmôt dak si nkual ƀon têh Buôn Ma Thuột ƀư test ngăch an nuĭh ƀon lan.

Jêh rnôk năl ăp nuĭh ji, n’gâng kan ƀon lan lĕ ntơm nchoeng n’gang hẻm 427 trong Y Moan, nkre tâm rgop đah nău kan dak si ƀư uănh năl test ngăch an nuĭh ƀon lan ta nkual jŭm dăr hẻm aơ. Kơt nĕ, knŭng tâm 4 nar, nkual ƀon têh Buôn Ma Thuột lĕ saơ 2 ntŭk srê ta thôn 6 n’hanh thôn 7 xă Cư Êbur đah 31 nuĭh ji. Lĕ 2 ntŭk srê aơ mô gĭt tu tơm ntưp. Bah năp nu nău nĕ, nău kan dak si nkual ƀon têh Buôn Ma Thuột mbra pơk hvi sŏk ndơ uănh năl test ngăch an lam ƀon lan, gay joi ăp nuĭh F0 luh ntŭk gŭ rêh.

Nŭih rblang: Y Sưng Phê Ja