VOV4.M’nông: Dak bât Krông Pách thượng, n’gor Dak Lak ndơ nchrăp ƀư têh, prăk ntuh kơl rlău 4.400 rmen prăk, yơn kol âk nău jêr jŏt jêng rlău 12 năm mbơh ƀư, hôm e geh mô đêt nău wăk kol. Wăk kol têh ngăn ta rnôk aƀaơ lah trong kan trơn ƀon lan, ntŭk gŭ mhe. Nuĭh ƀon lan ŭch hăn ri mô geh ntŭk gay hăn, nuĭh hăn hôm mô đăp mpăn đah nău rêh mhe. Tâm rnôk nĕ, rnôk yan mih hô đah âk nău ntêt nkri geh âk, dôl tât êp.

          Wa Vàng Seo Pao lah ngoay tâm âk rnăk bôk năp gŭ rđŭng n’glău Krông Pách thượng, xă Cư San, nkuăl M’Đrắk trơn tât nkual ntŭk gŭ mhe mrô 1, xă Cư Elang, nkuăl Ea Kar, n’gor Dak Lak. Wa Pao dơi săch ƀư groi kruanh thôn manh lor tâm rnôk kâp ndâk njêng thôn na nê̆. Wa an gĭt, rnôk bôk năp, rnoh rnăk tât ntŭk gŭ mhe âk, yơn aƀaơ bu tât dŭt đêt, du pơh knŭng 1-2 rnăk. Nkô̆ nău geh tât nău pă neh tuch tăm an kônh wa. Du đêt rnăk mhe knŭng geh pă neh gŭ, mô hŏ dơi pă neh tuch tăm. Du đêt rnăk lĕ dơi pă neh tuch tăm yơn mô tŏng tĭng trong ƀư bah n’gor lĕ uănh an. Tâm rnôk nĕ, geh rnăk dơi pă neh ri lŏ geh nuĭh ta ntŭk tât tâm pit jêng mô janh tuch tăm. Wa Vàng Seo Pao, rvê lah, nu nău aơ mbra ƀư jêr an trong kan trơn ƀon lan nar bah kơi:

           “Du đêt nuĭh lăp ta aơ, jay lĕ trơn hôm yơn lŏ mô geh ma ƀư, neh tuch tăm mô saơ đŏng. Aƀaơ mô geh an neh lâng, mô hŏ chuk neh lâng. Âk nuĭh lah aƀaơ đă dăn ƀan nchrăp ƀư n’gor ngăch chuk neh lâng gay yan bah kơi geh neh ma ƀư, lah mô kơt aơ mpôl hên mô gĭt m’hâm rêh. Ƀan nchrăp ƀư n’gor pah kan m’hâm pah kan mư pơng, nău jêt mô hŏ ƀư ri hôm 500 rnăk êng m’hâm trong mkra”.

Trong kan ntŭk gŭ nău nchrăp ƀư dak bât Krông Pách thượng hôm e âk wăk kol

          Wa Trần Văn Thanh, Kruanh UBND xă Ea Elang nkuăl Ea Kar an gĭt, kơp tât nar 19/8, xă lĕ wơt dơn 130 rnăk, nklăp 600 nuĭh ta xă Cư San, nkuăl M’Đrắk trơn tât nkual ntŭk gŭ mhe mrô 1. Aƀaơ, ntoh du đêt nău nuĭh ƀon lan lăp tâm pit neh đah ăp rnăk ntŭk gŭ mhe. Bôl xă lĕ đah ăp jrô kan ƀan bah nkuăl lăp, mĭn lah nuĭh tâm pit lah di tĭng ăp nău ntrŭnh bah pháp luật. Ăp nuĭh tâm pit lêng lang, lĕ dơi njŭn an ngih pah kan công an mkra, nsrôih mô an khuch tât nău ntŭk gŭ mhe bah nuĭh ƀon lan:

          “Lĕ dŭt âk rơh nkoch trêng, rgŏ jă, rblang, jă hăn UBND xă pah kan, mô geh nkô̆ nău pháp lý gay khân pơng lah neh khân pơng, yơn khân pơng lĕ ndra ƀư. Sam ƀŭt rhăch nău ri mpôl hên dôl ƀư jêh n’hanh ăp nkô̆ nău pháp lý gay njuăl an Công an nkuăl mkra tĭng nău ntrŭnh pháp luật. Mpôl hên ơm bônh đă kônh wa, ntrŭt nsôr kônh wa lah neh dơi jao ri kônh wa djăt ƀư, hôm mpôl hên mbra mât njrăng n’hanh ton, đăp mpăn rnă njrăng n’hanh ndrel đah kônh wa dôh rklaih ăp jêr jŏt”.

Rlău ma ntŭk gŭ mhe mrô 1, n’gor Dak Lak hôm pă ntŭk gŭ mhe mrô 2 an nuĭh ƀon lan nkual klŭng n’glău Krông Pách thượng, ta xă Cư Bông, nkuăl Ea Kar. Yơn lah, tĭng Jrô kan tuch tăm mât rong n’hanh hun hao ƀon lan nkuăl Ea Kar, ntŭk gŭ mhe mrô 2, mô hŏ dơi wơt dơn nuĭh ƀon lan yor dôl kâp mkra sŏk neh lâng n’hanh ntuh kơl ntung trong.

An nkra ơm ăp wăk kol ta ăp nkual ntŭk gŭ mhe gay nta an tâm ban ŭch bah nuĭh ƀon lan

Mpeh nkô̆ nău mbrơi ntŭk gŭ mhe, ntoh măt ntuh kơl, wa Phạm Văn Hạ, Kruanh Ƀan mât uănh nău nchrăp ƀư ndâk nkra ndơ dŏng lŏ mir n’hanh ntung trong Dak Lak an gĭt, nkual ntŭk gŭ mhe mrô 1 n’hanh mrô 2 bah năp đaơ jao an UBND nkuăl Ea Kar (nuĭh tơm ntuh kơl ơm) ƀư. Tâm rnôk ƀư bah năp đaơ geh âk nău jêr, tih ƀư an ntŭk kan wơt uănh dŭt jêr ƀư. Ta nkual ntŭk gŭ mhe mrô 1, bản đồ địa chính nkual ndrĭch lŏ 22ha n’hanh gưl pơk hvi 110ha lĕ dơi UBND nkuăl Ea Kar ƀư tĭng trong kan vĕ neh yơn tât aƀaơ lĕ rngôch file bản đồ tơm lĕ vĭ. Jêng tât mô tŏng nkô̆ nău gay nkra rgâl di bản đồ n’hanh xuất trích lục, khuch têh tât sŏk neh lâng. Gay geh nkô̆ nău ƀư, an geh ƀư tay trong kan vĕ nkă neh. Đah ntŭk gŭ mhe mrô 2 dôl ntuh kơl ndâk ƀư, lôch jêh ntung trong nkual neh gŭ. Hôm neh tuch tăm, mhe knŭng ta lvang mbơh an ăp gưl dơi mkra uănh an rgâl nău ŭch dŏng neh bri.

Wa Phạm Văn Hạ an gĭt, N’gor ủy, UBND n’gor dôl ntĭm rđău dŭt n’hâm, ăp nău kan, ăp gưl dôl nsrôih lăp đah dŭt n’hâm tât dŭt năm aơ mbra ntơm jêh nău sŏk neh lâng nkual n’glău n’hanh ntŭk gŭ mhe an rlău 700 rnăk, nklăp 4.000 nuĭh. Đah nău rvê dak băm tâm yan mih, wa Hạ an gĭt:

Yan mih dak lip 2020, nkual klŭng n’glău Krông Pách thượng geh tât 5 tơ̆ geh dak băm hô. Trong kan trơn nuĭh ƀon lan aƀaơ dơi n’gor Dak Lak đă ƀư dŭt n’hâm gay jêr ăp nău khuch

          “Dŭt năm ri yan mbra dak băm n’hanh mpôl hên mbra joi trong mkra nu nău aơ. Aƀaơ, nău khlay ngăn lah trơn ƀon lan, ăp rnăk ta rnoh dak đêt, ntĭt nsa prêh rbông 484m bah dâng rnôk băm lah nuĭh ƀon lan mô geh khuch. Nuĭh ƀon lan ta ntŭk prêh nĕ lĕ dơi trơn lĕ. Mpôl hên mĭn lah mông nar mô dơi an jŏ, đăp mpăn an nuĭh ƀon lan lĕ kâp 10 năm aơ hôm, bu lơ sĭt ơm nkual gŭ mhe ri lơ dơh oi ŏk r’ah, nău rêh lơ ơm đăp mpăn”.

          Jêh 12 năm kâp, nău nchrăp ƀư dak bât rbăn rmen prăk Krông Pách thượng lĕ dơi soih luh, nuĭh ƀon lan ntơm tâm ban ŭch n’hanh trơn tât ntŭk gŭ mhe. Yơn lah, trong kan ƀư ntŭk gŭ mhe aƀaơ lŏ mâp du đêt wăk kol đah neh lâng n’hanh neh tuch tăm. Gay nuĭh ƀon lan đăp mpăn tât ntŭk gŭ mhe n’hanh đăp mpăn nău rêh, ăp gưl n’gâng kan ƀon lan n’gor Dak Lak an ơm mkra ăp nău jêr jŏt, wăk kol aƀaơ. Nău nsrôih an dơi rgâl đah nău ƀư n’hanh mro mrăng bah gưl n’gor tât gưl nkuăl, xă, geh kơt nĕ mư dơi, geh tâm ban ŭch bah nuĭh ƀon lan./.

          Nuĭh rblang: Y Sưng Phê Ja