VOV4.M'nông: Kơt mpôl hên hŏ nkoch, lôch 12 năm an ƀư dak bât 4.400 rmen Krông Pách thượng, tât khay 3 mhe aơ, nuĭh ƀon lan ta trôm n'glău dak bât ntơm ntrơn du tât ntŭk gŭ mhe. Đah rlău 700 rnăk, nklăp 4.000 nuĭh ân ntrơn du, rnoh âk nău kan dăp rgum an nuĭh ƀon lan ta aơ mơ lah nkô̆ nău dŭt têh. Bôk năp mpôl kan dơi kan ta ntŭk dơn mât nău ntop kơl nuĭh ƀon lan. Yơn lah, tă bah nuh srê Covid-19 tât krit nji, ăp mpôl kan an lor ma nău kan njrăng n'gang nuh srê. Rnôk dja, nuĭh ƀon lan hŏ mât uĕh nuih n'hâm tâm rnglăp, nuĭh tât lor kơl nuĭh tât bah kơi rdâk jay, đăp mpăn nău rêh.

          Rnăk wa Ma Thị Sìn ta thôn 9, xã Cư San, nkuâl M’Đrắk ntrơn tât ntŭk gŭ mhe mbrô 1 ntŭk rong ƀư dak bât Krông Pách thượng, xã Cư Elang, nkuâl Ea Kar tâm rnôk nô nău nuh srê Covid-19 tât krit nji ta lĕ bar nkuâl tât n'hanh hăn. Ăp mpôl kan dơi kan ntơm nơh dơn kơl ƀon lan ntrơn du ntŭk gŭ mhe lĕ rngôch hŏ rgum an pah kan rdâng lơh nuh srê. Yơn dŭt lap, ăp rnăk ntrơn du lor, ơm ndrel gŭ du thôn, ndrel gŭ du xã lah băl mpôl bên hŏ ndrel kơl rnăk păng rdâk ƀư jay. Nơm geh kơt nê̆, lôch nklăp bơi 1 pơh, jay hŏ rdâk lôch, rnăk păng hŏ đăp mpăn ta ntŭk gŭ mhe:

         “Tâm ƀon, bu kơl he rdâk jay, lôch nê lah ntưm jay, dăp njŭr ndơ. Kônh wa kơl he kơt nê lah uĕh ngăn hôm.”

          Wa Vàng Seo Pao, manh ƀư groi kruanh thôn ta ntŭk ntrơn du ntŭk gŭ mhe mbrô 1, xã Cư Elang an gĭt, gĭt pah kan njrăng n'gang nuh srê tâm rnôk aƀaơ lah dŭt khlay, tâm rnôk ăp mpôl kan dơi kan dôl mô ru njrăng n'gang nuh srê, kônh wa joi trong tâm kơl nsum. Đah nklăp 130 rnăk hŏ ntrơn du tât ntŭk gŭ mhe, ăp rnăk đă bar pe nuĭh n'hanh thôn njêng 9 rmôt. Ăp rmôt dja tâm pleh nsum kơl ăp rnăk mhe tât rdâk jay, đăp mpăn nău rêh:

         “Njêng dơi 9 rmôt dăp njŭr, rdâk jay. Ăp rnăk tât bah kơi ri đă oh nô kônh wa ƀon lan kơl rdâk jay ri mô geh nău jêr ôh. Rdâk jay ri nar geh 30- 40 nuĭh, rdâk lôch, ntưm lôch tâm nar đŏng, hôm jay ăch chrach ri nuĭh tơm jay ƀư êng. Ntĭt kơt ôi tay geh rnăk Lý Seo Cháo tât ri nô Đông hŏ mbơh an kruanh rmôt hôm. Kruanh rmôt hŏ mbơh an ăp nuĭh tât kơl hôm.”

          Wa Trần Văn Đông, Groi kruanh jrô kan tuch tăm mât rong n'hanh hun hao nkuâl Ea Kar, nhih pah kan rnâng kan wơt nuĭh ƀon lan ntrơn du ntŭk gŭ mhe dak bât Krông Pách thượng, an gĭt, nău nuĭh ƀon lan tâm kơl nsum rdâk jay hŏ nău oi jêr jŏt an nkuâl tâm rnôk nuh srê tât krit nji, mô dơi tâm pă mpôl kan hăn tât kơl ƀon lan. Ta năp măt, nkuâl hŏ ntop kơl ăp rmôt rdâk jay prăk ngêt dak, ndơ dŏng sa khlay, bok put mbung gay njrăng n'gang nuh srê. Yơn đah rnăk mhe trơn du ri dŭt âk, nklăp 230 rnăk ta nkual ntŭk gŭ mhe mbrô 1 n'hanh bơi 500 rnăk ntŭk gŭ mhe mbrô 2, tâm rnôk nuh srê hôm ntoch jong, UBND nkuâl n'hanh Ƀan mât uănh trong nchrăp kan bah n'gor dôl tâm boh kan nsum, njêng trong nchrăp ntop kơl prăk nar luh kan an ăp rmôt kơl rdâk jay.

  Nău dja mbra đăp mpăn n'hâm suan bah nuĭh ƀon lan tâm ban kơt rgŏ jă kônh wa gay pah kan ntrơn du tât ntŭk gŭ mhe dơi tât rnoh ndơ̆ luh tâm nô nău aƀaơ:

         “Prăk ntop kơl ri aƀaơ trong nkra Ƀan mât uănh trong nchrăp n'gor dôl rdâk njêng, nkuâl mbra ƀư rơh hop gay uănh năl nkô̆ mpeh tơm prăk dŏng dja. lôch nê, lah dơi uănh an dŏng ri mpôl hên mbra dŏng tơm prăk dja trok an ăp rnăk ƀon lan râng kơl an ăp rnăk mhe tât ntŭk gŭ mhe, lah 200.000 prăk/nar luh kan".

          Tâm rnôk nuh srê tât krit nji, pah kan ntrơn du rong an ntŭk ƀư dak bât Krông Pách thượng mâp mô đêt jêr jŏt. Đah nuih n'hâm tâm rnglăp, nuĭh ƀon lan ta aơ dôl tâm kơl nsum gay nău ntrơn du tât ntŭk gŭ mhe dơi tât rnoh ndơ̆ luh lah ơm đăp mpăn nău rêh ăp rnăk ƀon lan./.

Nuĭh rblang: Điểu Thân