VOV4.Mnông- Lôch rnôk chính phủ geh Nghị quyết 128 mpeh gŭ rêh nsum đăp mpăn, mât njrăng geh săk rnglăy đah nuh srê Covid-19, âk doanh nghiệp ta ăp n’gor mpeh ba dâng pah kan tay rĭ nuĭh pah kan ta ăp n’gor Tây Nguyên ntơm plơ̆ pah kan tay. Ta trong Quốc lộ 14, ăp nar dăch aơ lĕ geh âk bôk ndeh máy hăn sĭt let ăp n’gor mpeh ba dâng, nuĭh pah kan plơ̆ pah kan tay đah âk nău mĭn ŭch rnôk geh nău mĭn rvê lĕ geh doanh nghiệp ton pă nău kan.

            Lôch rlău 1 khay plơ̆ sĭt ta jay der nuh srê ta nkuăl Chư Pưh, n’gor Gia Lai nô Nguyễn Minh Khánh n’hanh rmôt kan bơi tât 20 nuĭh tâm jă plơ̆ tay ta Bình Dương gay ma pah kan. Tâm rnôk der njrăng srê, nô Khánh lĕ geh chuh du nglai vacxin njrăng Covid-19 n’hanh ê lor hăn kan nô lĕ geh xét nghiệp uănh năl mô geh ntưp đah Covid-19, mơ dơi geh hăn đah bar n’gor Dak Lak, Dak Nông. Nô Khánh pah kan ta du công ty way bun dăp ndơ, prăk khay ntơm nơh klâp ma 6,5 rkeh prăk.khay. Rnôk plơ̆ tay pah kan, công ty ton mbra n’hao rnoh prăk khay hao 8,5 rkeh prăk, jêng nô mbra hăn kan tay n’hanh nău rvê đah nuh srê lĕ mô ir rnôk công ty lah mbra nchrăp ntŭk gŭ an nuĭh pah kan tĭng trong 3 ta ntŭk, mât đăp mpăn săk soan.

            “Gâp bun drăp ndơ, bánh kẹo, dak njŭnh. lăp ta nĕ kan, gŭ, sa nkre ta ntŭk kan dâl, du khay 8,5 rkeh prăk khay. Gâp gŭ ta ntŭk kan mô rvê geh ntưp srê, tâm ntŭk mât prăp ndơ, mô geh luh bah dih, mô geh tâm mâp đah bu”.

            Dôl hăn ta trong nsum đah bơi tât 30 nuĭh, geh băl mpôl , oh nô plơ̆ sĭt ta n’gor Đồng Nai pah kan, nô y trinh Bya,ta nkuăl têh Buôn Hồ, n’gor Dak Lak an gĭt, 3 khay sĭt der nuh srê geh âk nău jêr jŏt yor mô geh nău kan. Dŭt lap lah công ty ƀư jep ntŭk nô y Trinh pah kan kơl an nuĭh kan đah rnoh prăk 1,5 rkeh prăk du khay tâm rnôk kâp plơ̆ kan tay. Aơ lah nău nsrôih gay ma ăp nuĭh pah kan kơt nô plơ̆ kan tay lôch chính phủ geh Nghị quyết 128 mpeh rêh nsum đăp mpăn, mât njrăng ueh săk rnglăy nuh srê Covid-19, doanh nghiệp pơk kan tay. Mĭn rvê têh ngăn bâh nô Y Trinh lah mô hŏ geh chuh Vacxin, yơn doanh nghiệp lĕ ton mbra ơm chuh lĕ rngôch an ăp nuĭh kan.

            “gâp pah kan ƀư Jep, njŭr ndơ, công ty kuăl hăn kan tay rĭ an geh chuh vacxin mơ dơi kan. Công ty kơl n’hanh ton mât đăp mpăn hôm”.

            Rnôk nuh srê ntưp âk, doanh nghiệp ntâl mpông, nuĭh pah kan ta Tây Nguyên bâh nkuăl ƀon têh mpeh ba dâng sĭt ƀon tơm dŭt âk. Yơn lôch geh chính phủ geh Nghị quyết mpeh rêh nsum đăp mpăn, mât njrăng săk rnglăy nuh srê Covid-19, âk doanh nghiệp pah kan tay rĭ nuĭh pah kan ăp n’gor ta Tây Nguyên plơ̆ pah kan tay. N’hanh nău ngăn, ăp nar lĕ geh bơi tât 1 rbăn nuĭh pah kan mpŏng sĭt let ăp n’gor ba dâng. Aơ lah nău ueh rhơn gay ma ndâk nsơm tay nău wăng sa ta nkual wăng sa tơm mpeh ăp n’gor ba dâng lôch nuh srê.

Nuĭh rblang: Thị Đoắt