VOV4.M'nông: Wa Rơ Châm H’Déo (rnoi Jarai), Kruanh Uỷ ban Mặt trận Tổ quốc n'gor Gia Lai ơm dŭt rhơn dơi jao nău kan sơch 9 tơm kơnia bah Tây Nguyên nsĭt Thủ đô gay tăm tâm jâng gung Lăng Kruanh Hồ Chí Minh. Nar pah kan lễ tăm tơm si bah meng Lăng Wa lah du nău kan têh khlay n'hanh rngot đah ƀon lan ăp rnoi nuĭh n'gor Gia Lai. Mpôl ntơh măt bơi 50 nuĭh tă bah wa Rơ Châm H'Déo ƀư kruanh mpôl leo hăn lah ăp bu ranh ƀon, kruanh chroh ntoh lư, ntơh măt ăp rnoi nuĭh dôl gŭ rêh ta me neh Gia Lai. Tâm rnôk huêng khlay rngot rhơn, wa Rơ Châm H'Déo hŏ ntơh măt ƀon lan rnoi nuĭh Gia Lai nkoch nău nkah gĭt jru đah n'hâm suan têh kuâng bah Đảng, Wa Hồ. Rlău 10 năm aơ, ăp tơm Kơnia dôl mbrơi têh jêng, luh mpŭm n'hâm bah meng Lăng Wa, lah ndơ ntĭt bah nuih n'hâm rôih dăng, sôt hơr bah ƀon lan Tây Nguyên du nuih n'hâm tĭng Wa, tĭng Đảng. Nar aơ 2/9, Nkah ndray 76 năm Quốc khánh, ƀon lan wa Rơ Châm H’Déo mpơl nău rŏng:

“Nar 2/9/1945, Wa Hồ răk tuyên ngôn độc lập njêng luh dak Việt Nam. Ntơm bah nar nê tât aƀaơ hŏ rlău 76 năm hôm. Nơm geh đăp mpăn jêng aƀaơ kônh wa Jrai, Bana mơ dơi geh nău rêh răm mƀak. Lôch bah kơi 1945 tât năm 1946 geh Đại hội ăp rnoi mpôl đê̆, rgum lĕ rngôch ăp rnoi nuĭh ta neh dak Việt Nam, nsum ti rgum lơh lơh Prăng nsĭt tay nău dơi đăp mpăn. Ntơm n'gor Gia Lai dơm, kônh wa Jrai, Bana, kơt Wa Hồ hŏ tă lah: “Nuĭh Yăn mô lah bu lơ, Mường, Mán, Jrai, Bana, Êđê, Sedang lah oh nô ndŭl mham, ân tâm rnglăp, kơl suan rlăch ndăng n'hanh mât njrăng neh dak lah nău kan nsum. Yor kơt nê̆ ăp nuĭh ƀon lan ta neh dak dja lah oh nô de nơm, mô an geh du hê ndul êng bah kơi, mô geh nuĭh ntlơi êng, bu ranh, nuĭh quet nte, nuĭh ach o jêr jŏt kơl n'hanh rdâk njêng neh dak da dê".

Nuĭh rblang: Điểu Thân