VOV4.Mnông- Viện Vệ sinh dịch tễ Trung ương mhe geh nău ntrŭnh pă an 8 rkeh dĭng vaccine Vero Cell bâh công ty Sinopham Trung Quốc an 25 n’gor nkuăl ƀon têh ta lam dak. Aơ lah rơh pă Vačcine tal 43 bâh n’gâng kan dak si. Hà Nội lah ntŭk geh pă dŭt âk đah 1.359 rkeh dĭng, tâm lĕ rnoh 8 rkeh dĭng vaccine Vero Cell, dâk tal 2 lah Quảng Ninh đah rlău 700 rbăn dĭng, Lạng Sơn, Hải Phòng, Yên Bái n’hanh nkuăl ƀon têh Hồ Chí Minh ăp n’gor nkuăl ƀon têh geh pă an 500 rbăn dĭng. ăp n’gor Bắc Ninh 400.000; Khánh Hòa, Kiên Giang ăp ntŭk 300.000 dĭng; ăp n’gor Bắc Giang, Nam Định, Thanh Hóa, Nghệ An, Quảng Trị, Bình Định, Long An, Đồng Tháp, Lâm Đồng, Tây Ninh... geh pă ăp n’gor 200 rbăn dĭng. Viện vệ sinh dịch tễ Trung ương  đă ntŭk kan bôk nău chuh n’gang ngih dak tâm rgop gay ma ndơ̆ Vačcine an ntŭk kan chuh n’gang pơk hvi tĭng ta nkual. Ntŭk kan mât uănh nău ji ăp n’gor, nkuăl ƀon têh ƀư chuh vaccine Vero Cell Covid-19 geh pă an nđâp  ma lĕ 2 nglaih chuh.

Nuĭh rblang: Thị Đoắt