VOV4.M'nông: Âk doanh nghiệp pâl nđaih ta Đà Lạt – Lâm Đồng dôl jêr jŏt tă bah mô hŏ tŏng nău dơi pơk tay mpông wơt năch. Nkô̆ lơn âk nuĭh tâm n'gâng kan mô hŏ chuh ăp 2 n'glai vaccine tĭng di nău way.

Ntơm bah nar Chính phủ an dŏng nghị quyết 128 mpeh "quy định manh an bên di đăp mpăn, ngăch ngăr, mât kân bah nuh srê Covid-19”, n'gor Lâm Đồng ntrôl dăng rhŏ dŏng nău kan ƀư njêng, tăch rgâl tâm nô nău mhe, wa Lê Hồng Thanh, Nuĭh tơm mât uănh rgum du ntŭk manh gŭ pâl nđaih ta nklang nkual ƀon têh Đà Lạt dŭt rhơn. Yor rlău n'gul năm khách sạn ntĭl mpông tă bah Covid-19, aƀaơ hŏ geh rnôk plơ̆ dŏng kan tay. Ndrĭ, aƀaơ khách sạn bah păng mô hŏ dơi dŏng kan tay đŏng yor ăp nuĭh kan mô hŏ chuh tŏng ăp 2 n'glai vaccine tĭng di quy định. Wa Thanh rngot, lah:

“Ntơm bah 6/2021 tât aƀaơ ntŭk manh gŭ bĭch an rlu kan, bol ma hŏ an pơk tay mpông yơn mô dơi wơt năch tă bah rnoh di ma Bộ Y tế ndơ̆ luh lah ân chuh tŏng 2 n'glai vaccine an nuĭh rhŏ dŏng pâl nđaih, tâm rnôk khách sạn mpôl hên mhe geh chuh 1 n'glai dơm. Tĭng quy định, lah chuh 2 n'glai ri ân roh 6 pơh, jêng lah tât kêng dŭt khlay 11 mơ dơi chuh. N'hanh lah ntop dŏng tay 14 nar đŏng, jêng lah tât n'gul khay 12, jêng lah tât lĕ năm mơ wơt năch. Nê lah nău roh têh an pâl nđaih Đà Lạt”.

Tĭng wa Nguyễn Viết Vân, Giám đốc Sở Văn hóa, Thể thao n'hanh pâl nđaih n'gor Lâm Đồng, lam n'gâng kan pâl nđaih geh bar pe jât rbăn nuĭh kan, êng rêng kan khách sạn, ta ntŭk an manh  gŭ geh tât rlău 18.500 nuĭh kan geh nău ŭch chuh vaccine. Bol ma n'gor Lâm Đồng nsrôih tâm pă lor tơm vaccine an n'gâng kan pâl nđaih, ngoăy tâm ăp n'gâng kan wăng sa tơm bah n'gor, yơn tât aƀaơ mhe geh chuh 1 n'glai dơm. Yor kơt nê̆, hôm mô tŏng nău dơi an kan, rhŏ dŏng năch pâl nđaih ơm. Nău dja mpôl hên dăn đă UBND n'gor Lâm Đồng gay joi trong nkra.

“Mpôl hên hŏ hăn ôp uănh lĕ rngôch ăp ntŭk manh gŭ nde, nkual, ntŭk pâl nđaih n'hanh dŭt n'hâm tâm pă đah ăp nhih pah kan pâl nđaih tâm bah ri aơ nơh. Lơn lah ta Đà Lạt, rnôk ma nsĭt geh n'gâng kan pâl nđaih âk tât 79% yơn hŏ ntĭl mpông bơi du năm aơ. Đah chuh vaccine, aƀaơ đah mpôl kan ƀư pâl nđaih bah Đà Lạt an tât Cát Tiên hŏ dơi chuh yơn mhe geh 1 n'glai dơm. Gâp hŏ dăn đă đah Ƀan rđău đă tâm ban kơt UBND n'gor mbra an chuh lor dŭt ơm an n'gâng kan pâl nđaih gay tŏng nău dơi, droh rklaih ăp jêr jŏt, kŏ kol an lĕ rngôch ăp ntŭk kan pâl nđaih tâm let năp tay.

Ndrel đah nău nsrôih nkra ăp nkô̆ nău chuh 2 n'glai vaccine, đăp mpăn geh ndơ ma rhŏ dŏng năch pâl nđaih, n'gâng kan pâl nđaih n'gor Lâm Đồng dôl ntrŭt ntrôl ƀư lôch jêh rnoh tât kan Đăp mpăn tâm njrăng n'gang nuh srê đah nău kan pâl nđaih bah n'gor. Geh kơt nê̆, Đà Lạt - Lâm Đồng mơ lah ntŭk tât đăp mpăn bah năch pâl nđaih tâm nô nău mhe./.

Nuĭh rblang: Điểu Thân