VOV4.M’nông: Công ty Điện lực Dak Lak mhe ƀư nau pă 4 ngih gŭ kơl an ân ăp rnăk mâp nau jêr tâm xã Ea Ktur, (nkuăl Cư Kuin), xã Cư Kpô (nkuăl Krông Búk) ndrel xã Ra Bông (nkuăl Krông Ana). Du ngih geh công ty kơl an 60 rkeh, rnăk vâl ndrel ăp ntŭk kan tâm nkuăl geh rgop kơl an n’hâm kơl ndrel prăk gay ma ndâk ân nâp lơn tĭng nau ŭch dŏng. Lăp gŭ tâm ngih mhe, yuh H’Nyun Êban, tâm ƀon Jung A, xã Ea Ktur, nkuăl Cư Kuin, ngơi:

‘Gâp rhơn ngăn yor ntơm jêh aơ geh ngih mhe gay ma gŭ. Bah năp nơh ngih hên gŭ tâm ntŭk ngih sat ngăn, rnôk aơ ri mô hôm rvê ôh lah geh bri mih mô lah bri duh nar. Gâp dăn lah ueh ăp gưl n’gâng kan âk ngăn hŏ ndâk ngih gŭ ân rnăk hên”.

Wa Trần Văn Thuận, Giám đốc Công ty Điện lực Dak Lak, mbơh, ntrŭt dăng nau kan kơl an nau rêh jêng du nkah 45 năm ndâk rmôt kan, tâm năm aơ, ndrel ăp nau kan pă ngih ân ăp rmôt kan mpeh ba lơ kơl njrăng rdâng sê, kơl an nau kan rgop prăk ƀư njrăng rdâng srê Covid-19...công ty hôm kơl an rlau 400 rkeh gay ndâk 4 ngih kơl an ăp rnăk hôm jêr:

‘Ndrel hăn nsum đah nau kan ê nkra tăch rgâl ri nau kan kơl an kŏ geh công ty leo ƀư bôk năp. Nau kan ma công ty ndơ̆ luh lah ân geh nsôih ƀư ân jêh ăp ngih bah năp yan mih phŭt. Ri rnôk aơ hŏ jêh ndrel ma pă ăp ngioh nê, kŏ dŭt ma rhơn lah tơm ngih hŏ geh ngih mhe nâp ueh, kŏ lah nau rhơn bah công ty hŏ ƀư jêh nau nchrăp ƀư nau kan”./.

Nŭih rblang: H’Thi