VOV4.M'nông: Măng 20/8, Thủ tướng Chính phủ Phạm Minh Chính hŏ geh rơh kuăl điện tâm nchră đah Kruanh, Giám đốc mât bôk kan Công ty Pfizer, wa Albert Bourla mpeh tâm boh vaccine. Thủ tướng Phạm Minh Chính lah rjăp Chính phủ Việt Nam dôl tĭng ƀư lĕ n'hâm suan trong kan vaccine, nsrôih an ƀư chuh n'gang lam dak gay tât bôk năm 2022 chuh an 70% rnoh nuĭh, đăp mpăn lam rêh jêng kon nuĭh an ƀon lan.

Yor kơt nê̆, Thủ tướng Phạm Minh Chính dăn đă Pfizer an rong lor, uănh khlay n'hanh ntrôl ngăch lơn đŏng jao vaccine an Việt Nam tĭng trong tâm ton, tâm ban ŭch. Kruanh Pfizer ton mbra nsrôih lĕ n'hâm suan, joi ăp trong gay ntrôl ngăch jao vaccine an Việt Nam tâm khay 8, khay 9 n'hanh quý IV năm 2021; nchrăp kơl, ntop kơl Việt Nam dơn geh ndơ̆ rgâl n'hanh ăp trong ndơ̆ jao an vaccine êng ƀa ƀă bah ăp dak; nsrôih ŭch tĭng Chính phủ Hoa Kỳ ntop kơl Việt Nam mpeh vaccine./.

Nuĭh rblang: Điểu Thân