VOV4.M'nông: Ôi 20-10, ta Hội trường Diên Hồng, ta nâm nău ƀư tơm bah kruanh Quốc hội Vương Đình Huệ, Quốc hội ntơm pơk rgum rơh hop tâl bar Quốc hội khoá 15 tĭng trong ƀư pơk sŏng dăng ta bôk ƀoh Hội trường Diên Hồng, Jay Quốc hội n'hanh 62 ntŭk ƀoh ta ăp n'gor, nkual ƀon têh. Tĭng bôk nău kan hŏ dơi uănh an dŏng, ta rơh hop dja, Quốc hội mbra mĭn uănh, an dŏng 02 trong nchrăp luật, 05 trong nchrăp nghị quyết n'hanh an nău rgop 05 trong nchrăp luật.

Quốc hội mĭn uănh ăp si ƀŭt mbơh bah Chính phủ mpeh uănh năl tĭng ƀư trong nchrăp hun hao wăng sa- rêh jêng kon nuĭh n'hanh trong nchrăp sŏk dŏng ngân sách ngih dak năm 2021; mĭn uănh n'hanh n'glêh an trong nchrăp hun hao wăng sa- rêh jêng kon nuĭh năm 2022, trong nchrăp sŏk dŏng ngân sách ngih dak n'hanh trong rƀŏng tâm pă ngân sách trung ương năm 2022 n'hanh Trong nchrăp prăk kaih- ngân sách ngih dak 3 năm 2022-2024; nău ntruch tay nar rgâl n'hao prăk khay tĭng Nghị quyết bah Trung ương n'hanh Quốc hội; pah kan njrăng, n'gang nuh srê Covid-19 n'hanh nô nău tĭng ƀư Nghị quyết mbrô 30/2021/QH15 rơh hop bôk năp, Quốc hội khoá XV; mĭn uănh, n'glêh an trong nchrăp dăp rgum tay jâng wăng sa lvang năm 2021-2025, dăp rgum dŏng neh gưl neh dak lvang năm 2021-2030, uănh ngai tât năm 2050 n'hanh trong nchrăp dŏng neh 5 năm lvang năm 2021-2025 n'hanh du đêt nkô̆ khlay êng ƀa ƀă./.

Nuĭh rblang: Điểu Thân