VOV4.Mnông -Mpôl cán bộ, phóng viên bâh Radio nău ngơi Việt Nam lĕ tât kơl pah kan ta ăp n’gor mpeh ba dâng tâm ăp nar ntŭk aơ dôl nsrôih rdâng đah nuh srê. Mô dơn lah nău kan ma đah ăp nuĭh phóng viên, nhà báo tât râng pah kan lĕ njôt leo nău way kan nơm, mbra hăn ta ăp ntŭk gay ma mbơh nău mhe tât băl djăt radiô ăp nău mhe bâh ngih dak đah play nuih nsrôih kan bâh phóng viên pah kan ta radiô nău ngơi Việt Nam.

            Mpôl cán bộ, phóng viên kơl kan rơh aơ geh 2 nuĭh, hăn tât nkuăl ƀon têh Hồ Chí Minh n’hanh ăp n’gor mpeh ba dâng ngih dak yor đồng chí Phạm Mạnh Hùng, groi Tổng giám đốc Radio nău ngơi Việt Nam leo hăn. Mpôl hăn pah kan geh nău kan n’hao nău ntĭm leo, mbơh nău mhe, mbơh tơih mpeh nău kan njrăng rdâng nuh srê Covid 19 n’hanh du đê̆ nkô̆ nău ta ăp ntŭk kan ntoh rup ntoh ngơi bâh Radiô nău ngơi Việt Nam.

            Tât sŏng dăng ta ntŭk gay ma rgŏ jă mpôl cán bộ, phóng viên kơl kan ta ăp n’gor mpeh ba dâng, Tổng giám đốc Radio nău ngơi Việt Nam Đỗ Tiến Sỹ ŭch ăp nuĭh phóng viên, biên tập ndâk nsơm nău jêr jŏt mpeh nău rêh rnăk vâl, nău gŭ rêh pah kan, hăn ndrel đah ăp mpôl kan bôk năp njrăng rdâng đah nuh srê, tâm kơl đah ăp nău jêr jŏt roh jot bâh ƀon lan, đồng chí gay ma ntop dơi geh nkô̆ mpŏng têh njrăng rdâng n’hanh dơi ntrŭch bah nuh srê.

            Tổng giám đốc Radio nău ngơi Việt Nam lĕ mpơl nău rhơn nsơm nuih n’hâm đah ăp cán bộ, phóng viên, ŭch ăp nuĭh cán bộ, phóng viên kơl kan mô dơn mpơl nkoch nău roh jot, nău nsrôih bâh âk ƀon lan, đồng chí, mpôl kan nai dak si, mpôl kan tahen, công an dôl ăp măng nar pah kan njrăng rdâng nuh srê ma hôm nha geh gĭt kơt nău kan gay ma dơi geh ăp tác phẩm báo chí tâm di đah nău rêh bâh neh dak.

            “Mpôl pah kan kơl kan lah nău mbơh tơih bâh Đảng ủy Radio, aơ lah njôt leo nkre nău nsrôih bâh nuĭh leo kan bâh Radio. Knơm đah ăp đồng chí ơm geh nău nchih báo chí di, khlăy. Gâp knơm tâm rnôk hăn pah kan, ăp đồng chí mbra geh gĭt n’hanh geh saơ âk nău gay ma nchih nkoch, âk nău nkoch tâm nău rêh jêng, geh rgum âk nău nchih nkoch Radiô nău ngơi Việt Nam ndrel đah ntŭk kan tơm ntŭk ntoh rup ntoh ngơi dơi geh nău mbơh nkoch khlăy”.

            Ta nar ntơm hăn kan, ăp phóng viên kơl kan bâh Radio nău ngơi Việt Nam lĕ mpơl nău ŭch mbra nsrôih tât râng hăn ndrel đah ăp nuĭh kan bôk năp, nsrôih mbơh tơih mpeh nău tât nuh srê. Ŭch dơi âk nău nkoch, âk nău mbơh tâm di, mpeh nău kan njrăng, rdâng nuh srê bâh ngih dak. Phóng viên Thành Lương, Ban văn hóa, xã hội (VOV2) an gĭt:

            “Nău gâp ŭch ngăn lah đah nuĭh djăt Radio Nău ngơi Việt Nam, rnôk geh tăng djăt nău hên nkoch. Geh saơ ăp rup hên ndơ̆ bâh ntŭk geh âk ntưp srê rĭ an geh nău knơm ta nău rêh let năp tay”.

            Hôm aơ lah nău nkoch bâh bu ur phóng viên Thi Uyên, Báo điện tử Radiô nău ngơi Việt Nam (VOV.VN).

            “Gâp mĭn ŭch mbra dơi geh nkoch ăp rup ngăn di ta nkuăl ƀon têh dôl rêh n’hanh rdâng đah nuh srê. Gâp mbra mĭn kơt ta rơh tâm lơh kăl e. Mĭn ŭch săk nơm mbra rlet rlău nău jêr aơ n’hanh jêng nuĭh mbra dơi nkoch nău tât aơ an rơh ba kơi”.

Nu^h rblang: Thị Đoắt