VOV4.M’nông: Nău mbơh ƀư, ƀư tĭng geh săk rnglăy nău kơl trok nkhôm nu nău ntŭk ntô bri lah nău mhe đah nău kan mât tăm bri, nta an nău kơl mhe, nâp nâl, n’hŭch mbak jâk an tơm prăk rgop khlay mât njrăng n’hanh hun hai bri nâp nâl bri Kon Tum. Aơ mĭn lah bah UBND n’gor Kon Tum ta Rƀŭn nchră n’glôch jêh 10 năm ƀư tĭng nău kơl trok nkhôm bri, tăm bri ntrok ta n’gor tâm rgop nkah gĭt 10 năm ndâk njêng Tơm prăk nkrem mât njrăng n’hanh hun hao bri n’gor Kon Tum.

          Nău răk ngơi ntơm rƀŭn nchră, wa Nguyễn Hữu Tháp, groi Kruanh UBND n’gor Kon Tum, Kruanh Hội đồng mât uănh Prăk nkrem mât njrăng n’hanh hun hao bri n’gor lah rjăp, rlău 10 năm ƀư tĭng, bah năm 2011-2020, trok nkhôm ntŭk ntô bri lĕ jêng du nău kơl têh tŏng ăp nău ŭch ngăn dơi ăp gưl n’gâng kan ƀon lan, ăp ngih pah kan, rmôt kan, êng nuĭh tâm ban ŭch kơl, ƀon lan rƀŏng tĭng râng dŭt n’hâm nău kơl ngăch hăn tâm nău rêh n’hanh dơi geh ăp săk rnglăy dơi kơp dơn ndơ̆ nu nău ntŭk ntô bri lah du nău ntoh lư bah nău kan tuch tăm mât rong n’hanh hun hao ƀon lan. wa Nguyễn Hữu Pháp, lah:

          “UBND n’gor ƀư n’glôch jêh 10 năm nău kơl trok nkhôm nu nău ntŭk ntô bri gay uănh lah tâm rnôk ƀư tĭng nău kơl. Âk săk rnglăy dơi geh, ê hŏ dơi ƀư, hôm e, nkô̆ nău bah nĕ geh âk nău dăn đă, nchrŏng trong hun hao ;lvang 10 năm tât 2021-20230. Ta rƀŭn nchră aơ dăn đă ăp đồng chí kruanh ăp n’gâng kan nău kan, kruanh UBND ăp nkuăl, nkual ƀon têh, ăp ntŭk kan tơm bri, ăp ntŭk kan dŏng nu nău ntŭk ntô bri rgum mĭn njêng n’hanh tâm nchră ăp trong mkra gay ƀư tĭng nău kơl trok nkhôm ntŭk ntô bri n’hanh tăm bri ndơn tay nar lơ uĕh n’hŭch tât rnoh đêt ngăn ăp nău hôm e , nău tih vĭ”.

          Rlău 10 năm ƀư tĭng nău kơl trok nkhôm bri, Tơm prăk mât njrăng n’hanh hun hao bri n’gor Kon Tum, sŏk geh dĭng lĕ rnoh prăk 1.900 rmen prăk. Tơm prăk nkrem lĕ pă bơi 1.800 rmen prăk an ăp nuĭh tơm bri lah rmôt kan, rnăk wâl, êng nuĭh, nsum mpôl ƀon lan dơi Ngih dak jao, jao bri n’hanh UBND gưl xă dơi ngih dak jao nău kan mât uănh njrăng n’gang bri. Tơm prăk trok nkhôm nu nău ntŭk ntô bri rgop mât njrăng 384.000ha bri pă an nu nău, geh nklăp 67% rnoh neh bri bah n’gor mô kơp rnoh neh tơm cao su, n’hanh du đêt tơm tăm êng. Mpeh tăm bri ntrok tay, 7 năm bah năp, n’gor Kon Tum tăm geh rlău 2.200 ha bri n’hanh ntop kơl an nuĭh ƀon lan tăm rlău 647 ha bri nkra njêng. Wa Hồ Thanh Hoàng, Kruanh tơm prăk nkrem Mât njrăng n’hanh hun hao bri n’gor Kon Tum mĭn lah, nău kơl trok nkhôm ntŭk ntô bri dôl nar lơ hăn tâm nău rêh n’hanh geh nău khlay đah nău kan mât tăm bri bah n’gor:

          “Bah tơm prăk mât njrăng bri lĕ dôh rklaih nău jêr jŏt đah prăk kaih an nău kan mât tăm bri gay ntuh kơl an trong kan mât uănh n’hanh hun hao bri lah nsum ta n’gor, ngăn lah ăp Công ty lâm nghiệp geh prăk gay mât nău kan tâm rnôk rlu sŏk kăl si bri hon êng, nu nău nkra njêng, tăch rgâl mâp âk jêr jŏt. Mât đăp mpăn n’hanh nar lơ pơk hvi ăp ndơ sŏk bah prăk mât njrăng ntŭk ntô bri gay ntuh kơl an trong kan mât uănh njrăng n’gang bri n’hanh hun hao bri ta n’gor. Ăp tơm bri lah n’gâng kan ƀon lan gưl xă rdâk nkra nu nău mô tŏng mpeh prăk kaih, lĕ nchrăp đah tơm prăk ăp năm gay mbơh ƀư ăp nău kan ntuh kơl an trong kan mât njrăng n’gang hun hao bri, rgop đăp mpăn rnoh neh bri geh n’ăp đah rnoh, uĕh jêng n’hanh hun hao bri mhe. Nău rêh bah cán bộ, phung pah kan, nuĭh ƀon lan râng mât njrăng bri dơi rgâl na nê̆, đăp mpăn trong kan n’hanh krêp dêh đah bri”.

          Ndrel đah nău dơi geh, ta rƀŭn nchră n’glôch jêh 10 năm ƀư tĭng nău kơl trok nkhôm ntŭk ntô bri, tăm bri ntrok tay ta n’gor tâm rgop nkah gĭt 10 năm ndâk njêng Tơm prăk nkrem Mât njrăng n’hanh hun hao bri n’gor Kon Tum, ăp đại biểu sŏng dăng ntĭm luh du đêt nău hôm e, mô hŏ dơi ƀư an rdâk nkra gay hun hao uĕh lơn săk rnglăy dơi geh bah nău kơl, na nê̆ kơt: Hôm e mô hŏ dơi kơp, mbrơi ndơ̆ prăk bah du đêt ntŭk kan dŏng nu nău ntŭk ntô bri; du đêt tơm bri mô hŏ năl n’hanh ntrok prăk ntŭk ntô bri an rnăk wâl, êng nuĭh, nsum mpôl mpôl ƀon lan dơn mât uănh bri ngăch... Ntoh ngơi n’glôch jêh rƀŭn nchră, wa Nguyễn Hữu Tháp, Groi Kruanh UBND n’gor Kon Tum, Kruanh Hội đồng mât uănh tơm prăk mât njrăng n’hanh hun hao bri n’gor Kon Tum n’gluh an du đêt trong gay rdâk nkra ăp nău hôm e mô hŏ dơi ƀư tâm nău ƀư tĭng nău kơl trok nkhôm ntŭk ntô bri, tâm nĕ lah rjăp ngăn nău ƀư tơm bah nău kan tuch tăm mât rong ndrel đah Tơm prăk mât njrăng n’hanh hun hao bri n’gor:

          “N’gâng kan tuch tăm n’hanh hun hao ƀon lan tâm rgop đah Tơm prăk nkrem mât njrăng n’hanh hun hao bri, ăp ntŭk kan geh tât ntĭm tay ăp ntŭk kan bri ƀư tĭng nău kơl tĭng di nău ntrŭnh. Ƀư uĕh trong kan uănh nđôi nău mât uănh, dŏng prăk ntŭk ntô bri bah ăp tơm bri lah rmôt kan. Mbơh ƀư nău uănh nđôi, groi uănh trong kan tăm bri ntrok tay ta n’gor. Chi cục Kiểm lâm tâm rgop đah ăp ntŭk kan geh tât geh trong mkra ăp rmôt kan, ăp nuĭh, ăp ntŭk kan mô tĭng jăp nău ký ton ăp ding tâm jao trok nkhôm ntŭk ntô bri, mbơh kơp prăk trok nkhôm ntŭk ntô bri tĭng nău ntrŭnh n’hanh ăp tơm bri lah ăp rmôt kan ngih dak trok mô tŏng, di khay prăk ntŭk ntô bri an nuĭh dơn mât uănh bri”.

          Đah nău ƀư tĭng geh săk rnglăy Nău kơl trok nkhôm ntŭk ntô bri, nkhêp di nkah gĭt 10 năm ndâk njêng, Mât njrăng bri n’hanh hun hao bri n’gor Kon Tum lap râng wơt dơn Cờ tâm rlong bah Thủ tướng Chính phủ an nsum mpôl dơi geh săk rnglăy ntoh lư, lĕ rngôch nău kan leo bôk năp ntrong leo tâm rlong rŏng dak n’gor Kon Tum năm 2020. Di rơh aơ Kruanh UBND n’gor Kon Tum an bằng khen an 3 rmôt, 5  nuĭh, 12 thôn, 6 rnăk geh nău uĕh pah kan tâm nău ƀư tĭng nău kơl trok nkhôm nu nău ntŭk ntô bri n’hanh tăm bri ntrok tay ta n’gor tâm 10 năm bah năp./.

                    Nuĭh rblang: Y Sưng Phê Ja