VOV4.M’nông: Săm ji, rdâk hao săk soan an nuĭh ji jêh chôt ndal rse mham rngok dŭt khlay, rgop kơl nuĭh ji rdâk hao tay, mô geh koet rven rvo, ơm plơ̆ tay nău rêh nâm ơm. Rlơ̆ tay, lah jăng lơi “mông nar khlay”, mô săm ơm mbra n’glơi an nuĭh ji âk nău geh mbăn. Nai dak si Chuyên khoa 1 Lương Công Toàn, Kruanh Khoa Phục hồi chức năng, Ngih dak si Y học cổ truyền n’gor mbra nkoch nău aơ tă bah nău ôp bah kơi aơ.

- Ơi nai dak si, nai dak si dơi an gĭt mpeh nău khlay bah nău săm rdâk hao săk soan ơm an  nuĭh ji jêh chôt ndal rse mham rngok  mêh ?

Nai dak si Lương Công Toàn: “He gĭt, nuĭh ji chôt ndal rse mham rngok lah ăp nuĭh geh khuch trong mham rngok. Ta lvang bôk năp, nuĭh ji mbra dơi nsrôih săm đah tây y gay rgâl ăp nău rêh bah nuĭh ji. Nuĭh ji chôt ndal rse mham rngok nkre geh rven rvo n’gul săk, rven ty n’hanh jâng du ding ri nău geh nĕ n’glơi an dŭt mbăn. Nuĭh ji mô dơi hăn nsong, mô lah hăn nsong yơn mô dăng mô lah nuĭh ji mô dơi ngơi, nău nkah gĭt nuĭh ji hŭch, rối loạn thần kinh. lĕ rngôch ăp rối loạn n’glơi an jêh chôt ndal dŭt mbăn lah nuĭh ji knŭng săm nội khoa, săm ndal ri he knŭng dơi mkra nău rêh bôk năp, jêh nĕ lah nuĭh ji mô mât tiăr nti, rdâk hao săk soan mô lah săm ăp nău ji êng ƀa ƀă ri nuĭh ji mbra rwen rwo lôch săk. Yor rĭ, đă nuĭh ji jêh săm nội khoa đăp mpăn ri an săm rdâk hao săk soan ntop đah y học cổ truyền.

- Ndrĭ, ơi nai dak si m’hâm rnôk jêh chôt ndal nti rdâk hao săk soan lah tam ngăn mêh ?

Nai dak si Lương Công Toàn: “Khoa học an saơ, nuĭh ji chôt ndal rse mham rngok ri nti rdâk hao săk soan lơ ơm lơ uĕh. Dơi tâm lvang săm ndal, njrăng ICU nuĭh ji hôm e dơi nti ngăch săk soan, knŭng geh du đêt nău ntĭm rnôk bôk năp, hôm bah kơi nĕ lah đăp mpăn, nai dak si nội khoa an dơi nti tay. Nuĭh ji nti ăp nău ƀư tĭng lvang. Lvang bôk năp rnôk chôt ndal geh he dơi nti mpât ăp rpăk nting, pet săk nuĭh ji. Lah đăp mpăn lơn tay he nti tay rdâk hao săk soan tĭng rnoh bah n’gơch tât mbăn, bah đêt tât âk mô di kâp tât rnôk e lĕ geh chôt ndal mư nti săk soan. Khlay ngăn lah he an tiărr nti tâm 6 khay bôk năp. Nuĭh ji chôt ndal gay rgâl tay nău ji êng, lah tâm 6 khay bôk năp mô nsrôih săm ri bah kơi 6 khay lĕ n’glơi an nău ji nkre re rnôk nĕ he săm mbra mô geh tam, lah geh knŭng mât uĕh nău hăn nsong, mpât săk, hôm ƀa ƀă ăp nău êng dŭt jêr jêng an tiăr nti ngăch hao săk soan lơ ơm lơ uĕh.

- Ơi nai dak si, rnôk bah năp, săk rnglăy rdâk hao săk soan an nuĭh ji jêh chôt ndal rse mham rngok ta Ngih dak si Y học cổ truyền m’hâm mêh ?

Nai dak si Lương Công Toàn: “Ngih dak si Y học cổ truyền lah ntŭk kan gưl n’gor way săm nuĭh ji chôt ndal rse mham rngok, jêng rnoh nuĭh ji ta ăp gưl njŭn tât dŭt âk. Ăp nar Khoa Phục hồi chức năng, Ngih dak si Y học cổ truyền n’gor tiăr nti ăp nău ji jêh chôt ndal an nklăp 100-150 nuĭh ji. Tĭng rnoh khuch, ntŭk khuch ma săk rnglăy săm êng êng. Yơn lah, tĭng uănh lah bah ngih dak si, lĕ rngôch nuĭh ji chôt ndal rse mham rngok jêh rnôk săm ta ngih dak si Y học cổ truyền n’gor geh nklăp 70 tât 80% nuĭh ji dơi hăn tay. Hôm bah 2 tât 30% ri an săm jŏ jong, âk nuĭh lah bah n’hanh dơi hăn tay nâm ơm”.

Ơ dăn lah uĕh ăp nău nai dak si nkoch !

                    Nuĭh rblang: Y Sưng Phê Ja