VOV4.M’nông: Tĭng Kruanh n’gâng kan dak si Nguyễn Trường Sơn, rnôk geh ânậlh duh jêr ngăn bah nau njrăng rdâng đah srê Covid-19 rơh tal 4 lah ntơm lơ 23/8 tât 30/9. Rnôk aơ, n’gâng kan dak si hŏ ntrŭnh nau kan xét nghiệm geh nau tơm ndrel ƀư ngăch lơn nau ntưp rêng bah srê SARS-Cov2. Rnơm kơt nê, rnoh nŭih ntưp mhe geh saơ ơm ngăn, mra dơi leo ndơ̆ ăp nau kan gay ma mât, njrăng săm ân tâm di. N’gâng kan dak si kŏ geh ăp nau rgâl tâm nau ƀư nau săm ân nŭih ntưp srê Covid-19, leo lăp dŏng ăp ntil dak si mhe...ndri ma, rnoh nŭih ntưp mhe, rnoh nŭih khĭt n’huch ndrel rnoh nŭih geh mbơh bah ji ri âk lơn tâm ăp nar. Nau kơp bah N’gâng kan dak si tât rnôk aơ ân saơ, rnoh ntưp tâm ƀon lan n’huch 44,7% rđil bar pơh bah năp. Nau ngăn lah, hŏ geh 91% rnoh nŭih ntưp srê Covid-19 geh mbơh bah ji. Hŏ geh 7 tâm rnoh 62 n’gor, nkuăl ƀon têh rlau 14 nar mô geh nŭih ntưp mhe, 12 n’gor, nkuăl ƀon têh mô geh nŭih ntưp êng tâm 14 nar rlau aơ./.

Nŭih rblang: H’Thi