VOV4.M’nông: Văn Lem, Đăk Tô lah xă dŭt jêr jŏt bah n’gor Kon Tum, lam xă geh bơi 2.900 nuĭh, rnoi mpôl đêt geh 98% rnoh nuĭh. Ƀư tĭng njêng oh nô tĭng nuih n’hâm Nghị quyết 04 bah n’gor uỷ Kon Tum, 5 năm bah năp, ndrel đah nău kơl xă njêng oh nô mât uănh, njrăng n’gang n’hanh hun hao bri, Prăk nkrem mât njrăng n’hanh hun hao bri n’gor Kon Tum lĕ tâm rgop rjăp đah Đảng uỷ, n’gâng kan ƀon lan n’hanh ăp nsum mpôl bah xă nta an rgâl mhe dŭt âk hun hao wăng sa-rêh jêng, đăp mpăn rnă njrăng n’hanh rgâl uĕh nău rêh nuĭh ƀon lan.

          Ur sai yuh nô A Vinh n’hanh Y Vân ta ƀon Đăk Xanh, xă Văn Lem, nkuăl Đăk Tô geh tât 8 nuĭh kon. Yor âk kon lĕ rngôch nău geh sa knŭng kâp tâm rnoh neh bum, ba jêng rnăk wâl wăr năm mô tŏng sa. Năm 2018 ngoay tâm 5 rnăk dơi Tơm prăk nkrem mât njrăng n’hanh hun hao bri n’gor Kon Tum săch gay ndâk njêng ntrong kan “Ntop kơl, ntĭm rnăk wâl mât rong sŭr rwanh deh kon” hun hao wăng sa. Dơi geh tơm prăk ntop kơl 2 mlâm sŭr ntil, 1 mlâm sŭr nkuăng n’hanh kỹ thuật mât rong sŭr, prăk rwăt ndơ ƀư ndrung, ndơ sa bôk năp, tât aƀaơ mpôl sŭr bah rnăk nô A Vinh geh mro rlău 10 mlâm sŭr. Aƀaơ mpôl sŭr lĕ geh ndơ ƀư sa khlay bah rnăk wâl. Nkre ndăn an sŭr sa, nô A Vinh nkre răm rhơn, an gĭt tâm rnôk mât sŭr bah rnăk wâl:

          “Bah năp đaơ mô geh n’gar loih ri sreh glê, ngâr jêh nĕ ƀư n’gar kiău ma. Rnôk bôk năp an pơng sa bum đah kô| trau gâm si\n jêh nĕ an pơng sa đah lư̆k phe. Jŏ jŏ tăch gay joi prăk rwăt bôh sa, rwăt ƀŏt ngot ndrĭ dơm”.  

          Bah ăp ntrong kan dơi tơm prăk nkrem mât njrăng n’hanh hun hao bri n’gor Kon Tum ndâk njêng ta xă njêng oh nô Văn Lem, kơt: “Nti n’hanh ƀư tĭng ntoh lư, nău mĭn, nău rêh Hồ Chí Minh”; “ntop kơl, ntĭm rnăk wâl mât sŭr rwanh deh kon” “ntĭm, ntop kơl kỹ thuật tăm n’hanh mât chăm cà phê”.v.v. lĕ kơl nuĭh ƀon lan tâm xă rgâl uĕh nău mĭn, trong ƀư hao rklaih ach o. Tât aƀaơ ăp ntrong kan yor Tơm prăk nkrem ndâk njêng lĕ rêng hvi tât ăp thôn ƀon, dơi âk rnăk nti, ƀư tĭng. Mô đêt rnăk bah năp đaơ geh nchih sam ƀŭt “ach o nâp nâl”, aƀaơ lĕ geh ndơ sa đăp mpăn rklaih nău ach o. Wa A Hùng, Kruanh UBND xă Văn Lem an gĭt:

          “Năm bah năp tơm prăk mât njrăng n’hanh hun hao bri lĕ tâm rgop rjăp đah n’gâng kan ƀon lan  tâm trong kan mât uănh njrăng n’gang bri kơt uănh mĭn, ntop kơl kônh wa nuĭh ƀon lan ta xă Văn Lem mpeh hun hao wăng sa, rêh jêng. Tơm prăk nkrem n’hanh hun hao bri kơl an kônh wa jŭt jăng ach o, ji ngot kơt đăp mpăn nău rêh bah kônh wa. Tơm prăk mât njrăng n’hanh hun hao bri Kon Tum kơl an ƀon lan mpeh trong kan jŭt n’hŭch ji ngot ach o kơt đăp mpăn nău rêh jêng kon nuĭh”.

          Kơp lĕ bah tơm prăk mât njrăng n’hanh hun hao bri n’gor Kon Tum an saơ tâm 5 năm ƀư tĭng njêng oh nô, ndâk njêng xă dŭt jêr jŏt Văn Lem, Tơm prăk nkrem lĕ ƀư uĕh trong kan rêh jêng kon nuĭh đah dĭng lĕ rnoh prăk ntop kơl hang rhiăng rkeh prăk. Ntoh lư ăp nău ƀư yor Chi bộ n’hanh Chi đoàn bah Tơm prăk nkrem rgŏ jă, kơt rsơl plơng tay, mât uănh an nuĭh ach o, kon se, kon hŏk geh nău rêh jêr jŏt; ăp năm ntop kơl ƀư Nar rgum nklâm ƀănh chưng… Nkoch mpeh nău ƀư njêng oh nô, ndâk njêng an xă Văn Lem bah Tơm prăk nkrem mât njrăng n’hanh hun hao bri n’gor Kon Tum, wa Lê Trọng Thọ, Bí thư Đảng uỷ xă, an gĭt:

          “Tơm prăk nkrem mât njrăng n’hanh hun hao bri lĕ ƀa ƀơ uănh tât tâm rgop đah Đảng uỷ xă Văn Lem ƀư, mbơh tơih ăp nău kan mpeh hun hao wăng sa, rêh jêng đăp mpăn mât njrăng bri dak, rnă njrăng kơt ndâk njêng trong chính trị ta xă. Tơm prăk nkrem ƀa ƀơ uănh mĭn ntơm bah bôk năm tâm rgop đah xă ndâk njêng trong nchrăp ƀư an tâm di đah nu nău ngăn bah ƀon lan. Ăp rơh ăp khay, tâm pă cán bộ tâm rgop gay uănh lah săk rnglăy mbơh ƀư ăp nău kan. Tâm rnôk mbơh ƀư geh âk jêr jŏt wăk kol ri ntŭk kan dôh rklaih mô lah uănh lah tât ăp gưl dơi mkra”.

           Jêh 5 năm njêng oh nô, ndrel soan, hăn ndrel đah Đảng uỷ, n’gâng kan ƀon lan, ăp nsum mpôl n’hanh nuĭh ƀon lan xă Văn Lem, Tơm prăk nkrem mât njrăng n’hanh hun hao bri n’gor Kon Tum lĕ geh ăp nău rgop khlay đah nău hun hao nsum bah xă. Bah du xă tâm rnoh jêr jŏt ngăn, ƀon lan rnoi mpôl đêt geh tât 98% rnoh nuĭh, tât aƀaơ Văn Lem lĕ n’hŭch geh rnoh rnăk ach o jŭr hôm 19,5%. Xă lĕ geh 14/19 rnoh ndơ ƀư an ndâk njêng ƀon lan mhe.

          Nuĭh rblang: Y Sưng Phê Ja