VOV4.M'nông: Nkah ndray 110 năm nar deh Đại tướng Võ Nguyên Giáp, ta n'gor Cao Bằng hŏ ƀư âk nău kan ngăn ngăn, geh nkô̆ khlay. Ôi 24/8, ta nkual Têl ơm yău gưl neh dak mha êng Bri Trần Hưng Đạo (xã Tam Kim, nkuâl Nguyên Bình), n'gor Cao Bằng hŏ ƀư mpoh nhang, n'hơr kao si ta Đền thờ Đại tướng Võ Nguyên Giáp.

Lôch ƀư mpoh nhang, n'hơr an kao si ta nkual Têl ơm yău gưl neh dak mha êng Bri Trần Hưng Đạo, n'gor Cao Bằng hŏ ƀư rgum nchră đah nkô̆ “Đại tướng Võ Nguyên Giáp đah ƀon tơm Cách mạng Cao Bằng”.  25 nău nchrăp lor dăn đă ta rnôk tâm nchrăp ăp mpôl ntơh măt rgop kơl ƀư kloh nău khlay têh bah Đại tướng đah trong leo cách mạng Việt Nam, lơn lah lvang năm ntơm bah 1941-1945, rơh Đại tướng gŭ kan na nê̆ ta n'gor Cao Bằng. Âk nău nchrăp lor nsŏng kơl lah rjăp đŏng ăp nău rgop têh kuâng bah rơh kơn ƀon lan ăp rnoi nuĭh n'gor Cao Bằng tâm nău mât nkrum, mpôn mât Cách mạng tâm ban kơt Đại tướng Võ Nguyên Giáp, ntŭk Đại tướng way uănh lah ƀon tơm tâl bar bah he./.

Nuĭh rblang: Điểu Thân