VOV4.M’nông: Ntơm bah nar 27/6 tât aƀaơ, ta Nhih dak manh ntăm ƀư mbrô 1 nkual ƀon têh Hồ Chí Minh hŏ geh rlău 1.700 nuĭh ntưp Covid-19 dơi luh sĭt bah nhih dak si. Aơ lah ăp nuĭh lôch jêh uănh năl mô hôm ntưp mô lah dôl ntưp yơn rnoh kaman dŭt đêt, mô hôm geh nău dơi ntưp rêng lam ƀon lan.

Nhih dak si manh ntăm ƀư mbrô 1 geh rnoh hvi 4.500 nsưng bĭch ji ƀư ta ký túc xá bah Trung tâm Giáo dục Quốc phòng n'hanh An ninh mpeh Đại học Quốc gia nkual ƀon têh Hồ Chí Minh, dŏng kan ntơm bah nar 26/6. Ta aơ dôl săm 4.423 F0. Nhih dak si geh nău kan dơn săm lĕ rngôch ăp nuĭh geh ntưp mhe n'hanh ăp nuĭh dôl an gŭ rgum êng (F1 rgâl jêng F0). Ntơm bah nar 13/7, Sở Y tế nkual ƀon têh Hồ Chí Minh an rlong rhuăt glêh nar săm F0 mô mpơl ji ta nhih dak si. Tĭng nê, F0 uănh năl mham RT-PCR nar tâl 10 mô hôm mpơl ntưp mô lah hôm ntưp yơn rnoh kaman đêt ri njŭn sĭt an gŭ săm êng ta jay lah tŏng geh ăp ndơ, njrăng n'gang ntưp rêng./.

Nuĭh rblang: Điểu Thân