VOV4.Mnông-  Nău mbơh ta rơh rƀŭn nchră mbơh mpeh nău kan njrăng rdâng nuh srê ta nkuăl ƀon têh Hồ Chí Minh kêng măng nar 16/9 an saơ rnoh nuĭh ntưp yor Covid-19 ta nkuăl ƀon têh Hồ Chí Minh dôl hŭch mbra tĭng nar, yơn lah, rnoh nuĭh ntưp mhe hôm nha âk. Na nê̆, tâm nar 15/9, nkuăl ƀon têh Hồ Chí Minh kơp dơn geh 160 nuĭh khĭt, dŭt đê̆ tâm rlău 1 khay ba năp n’hanh tâm ban lvang bôk khay 8, geh rlău 2.500 nuĭh bah ji sĭt ta jay, n’hao rnoh nuĭh sĭt ta jay lôch săm ta ngih dak si bâh khay 1 năm 2021 tât aƀaơ hao tât 161 rbăn nuĭh, aƀaơ hôm nha dôl săm an rlău 41 rbăn nuĭh ji. Yơn lah du nău dŭt nkoch lah rnoh nuĭh ntưp Covid-19 hôm nha âk. Mbơh rblang mpeh nău aơ, groi Giám đốc ntŭk kan dak si nkuăl ƀon têh Hồ Chí Minh Nguyễn Hoài Nam an gĭt, nkuăl ƀon têh dŏng ăp ntrong kan xét nghiệm ngăch ta ăp ntŭk n’hanh ƀư âk rơh xét nghiệm ta nkual geh âk srê , nkual mbra geh âk ntưp, geh ntŭk 7-8 tơ̆. Rnoh ntưp mhe lĕ hŭch âk, ntĭm đă knŭng ta rnoh 4 rbăn tât 6 rbăn nuĭh ntưp.

Nuĭh rblang: Thị Đoắt